“Disiembre 4–10. Apocalipsis1–5: ‘Dayag, ken Pannakabalin ti Adda Koma … iti Kordero iti Agnanayon,’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Disiembre 4–10. Apocalipsis 1–5,” Umaykayo, Sumurot Kaniak—Para kadagiti Indibidual ken Pamilia: 2023
Disiembre 4–10
Apocalipsis 1–5
“Dayag, ken Pannakabalin ti Adda Koma … iti Cordero iti Awan Inggana”
Ibilangmo ti panangisurat kadagiti saludsod nga adda kenka maipapan iti no ania ti binasam iti Apocalipsis. Mabalinmo ti agsukisok kadagiti saludsod wenno ilawlawag dagitoy iti maysa a miembro ti pamilia wenno kadagiti klase iti Simbaan.
Isuratmo dagiti Impresionmo
Nagkarigatanka kadi a nangiyebkas kadagiti dadduma no ania ti nariknam kabayatan ti nabileg a naespirituan a padas? Mabalin a makarikna iti kinakurang ti inaldaw a pagsasao tapno mangiladawan kadagiti naepirituan a rikna ken impresion. Nalabit a daytoy ti gapu no apay nga inusar ni Juan ti kasta a nabaknang a simbolismo ken panangiladawan a pangiladawan iti nangayed a paltiingna. Simple lang koma ti panangdakamatna a nakitana ni Jesucristo, ngem tapno makatulong kadatayo a maawatan ti padasna, inladawanna ti Mangisalakan nga ar-aramatenna dagiti balikas a kas kadagitoy: “Dagiti matana kas da la gumilgil-ayab nga apuy,” “ket iti ngiwatna rimmuar ti maysa a kampilan a dua ti tademna,” ket “daydi rupana kas la panaglawag ti init no karaniagna” (Apocalipsis 1:14–16). Bayat ti panangbasam iti Apocalipsis, padasem a takuaten dagiti mensahe a tinarigagayan ni Juan a sursuruem ken riknaen, uray no dimo maawatan ti kaipapanan iti likudan ti tunggal simbolo. Apay koma nga indiligna dagiti pagu-ummongan iti Simbaan iti pagsilawan, ni Satanas iti dragon ken ni Jesucristo iti kordero? Kangrunaanna, saan a kasapulan a maawatanyo ti tunggal simbolo iti Apocalipsis tapno maawatan ti kapatgan a temana, agraman dagiti kalatakan a temana: Agballiginto ni Jesucristo ken dagiti pasurotna kadagiti pagarian ti tattao ken ni Satanas.
Dagiti Kapanunotan para iti Bukod a Panagadal iti Nasantuan a Kasuratan
Isuro ti parmata ni Juan maipapan iti plano ti Nailangitan nga Ama a mangisalakan kadagiti annakna.
Ti libro ti Apocalipsis mabalin a narigat a maawatan, ngem saanka koma a maupay. Mabalin a paregtaennaka ti kari ni Juan nga agtultuloyka iti panagkagumaan: “Nagasat dagiti agbasa, ken dagiti dumngeg ken makaawat kadagiti balikas daytoy a padto, ken mangtungpal kadagiti banag a naisurat dita, ta asidegen ti yaay ti Apo” (Patarus ni Joseph Smith, Apocalipsis 1:3 [iti Pangiwanwan iti Nasantuan a Kasuratan], nainayon ti panangyunay-unay).
Maysa a wagas a panagadal iti Apocalipsis ket ti panagsapul kadagiti koneksion iti plano ti pannakaisalakan. Mabalin a makatulong kenka daytoy sapasap a pakagupgopan:
-
Ti kapitulo 5 ken 12 iladawanda dagiti pasamak iti biag sakbay daytoy a biag.
-
Dagiti kapitulo 6–11, 13–14, 16–19 iladawanda ti biag iti daga ken dagiti pasamak iti pakasaritaan ti daga.
-
Dagiti kapitulo 2–3, 15, 20–22 iladawanda ti Maudi a Panangukom ken ti gloria nga agur-uray kadagiti napudno.
Bayat ti panagbasam, saludsodem iti bagim, “Ania ti isuro daytoy maipapan iti plano ti Dios? Ania ti inaramid ti Dios a mangtulong kaniak a mangparmek iti dakes ken agsubli Kenkuana? Ania dagiti karina kadagiti napudno?”
Mabalin pay a makatulong a mangammo nga ilawlawag ti Doktrina ken Katulagan 77 ti sumagmamano a simbolo a nausar iti Apocalipsis. Kas nayon, ilawlawag ti Patarus ni Joseph Smith ti sumagmamano a binatog iti Apocalipsis, isu a masansan a kitaem dagiti footnote ken ti Bible appendix.
Kitaen met iti Pangiwanwan iti Nasantuan a Kasuratan, “Juan,” “Paltiing ni Juan.”
Ni Jesucristo ti Sibibiag nga Anak ti Sibibiag a Dios.
Iladawan ti umuna a kapitulo ti Apocalipsis ti panagparang ni Jesucristo ken ni Juan iti maysa a parmata. Nalabit a mabalinmo nga ilista ti amin a banag nga ibaga daytoy a kapitulo maipapan ken ni Jesucristo, agraman ti kinasiasinona, no ania ti aramidenna para kadatayo, ken no ania ti pakaipadaanna.
Aggapunto manipud kadagiti simbolo ti sumagmamano a banag a masursurom. Utobem no ania ti mabalin a padpadasen nga isuro ti Apo kenka maipapan iti Bagina babaen kadagitoy a simbolo. Kas pagarigan, makita nga awagan ti Mangisalakan ti Bagina iti “ti pangrugian ken ti paggibusan” ken “ti umuna ken ti maudi.” Apay iti panagkunam a napateg dagitoy a pangawag? Ania ti isuro dagitoy a pangawag maipapan iti Mangisalakan?
Personal nga am-ammonak ni Jesucristo ken tulongannakto a mangparmek kadagiti karitko.
Ipalgak dagiti balikas ti Mangisalakan iti Apocalipsis 2–3 a naawatanna dagiti balligi ken panagkarigatan a naidumduma iti tunggal sanga ti Simbaan iti aldaw ni Juan. Dinayawna dagiti panagkagumaan dagiti Santo ken binallaaganna pay ida kadagiti banag a nasken a balbaliwanda. Ania ti masursurom manipud iti panagdayaw ken pammallaag ti Mangisalakan?
Maawatan pay ti Mangisalakan dagiti balligim ken panagkarigatam, kas iti tarigagayna a tumulong kenka. Kitaen dagiti masansan a kari nga idiayana kadagiti mangparmek. Ania ti makaawis iti riknam maipapan kadagitoy a kari? Ania ti mabalin a kayat ti Apo a parmekem? Ania ti mabalinmo nga aramiden tapno umawat iti tulongna?
Ni laeng Jesucristo ti makaaramid iti pannakaipatungpal ti plano ti Nailangitan nga Ama.
Ania ti masursurom maipapan iti Nailangitan nga Ama manipud iti Apocalipsis 4 ken maipapan ken ni Jesucristo manipud iti Apocalipsis 5? Ibilang no ania koma ti kayariganna no naamiristayo nga aramiden a posible ni Jesucristo (ti “Kordero”) ti plano ti Nailangitan nga Ama (mabalin a luktan ti Mangisalakan ti libro, ken … warwarenna dagiti pito a selio” [Apocalipsis 5:5]). Apay a ni Jesucristo laeng ti nakaaramid iti daytoy? Kasano a maipakitam ti pammatim Kenkuana a kas Mangisalakanmo?
Kitaen met iti Job 38:4–7; Doktrina ken Katulagan 77:1–7.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Apocalipsis 1:20.Apay nga indasig ni Jesus ti Simbaanna kadagiti pagsilawan? (kitaen iti Mateo 5:14–16). Agkansion maipapan no kasano a makapagbalintayo a kas silaw iti pagsilawan, kas iti “Shine On” {Children’s Songbook, 144).
-
Apocalipsis 2–3. Agpammarang a naidawat ken ni Juan a mangted iti maysa a mensahe iti pamiliam a kapada ti intedna kadagiti simbaan idi panawenna. Ania koma ti sawenna a sumaysayaaten? Kasano a makapagdur-aska?
-
Apocalipsis 3:15–16.Kalpasan ti panagbasa kadagitoy a bersikulo, mabalin nga uminum ti pamiliam iti maysa a banag a kalalainganna ti pudotna a naim-imas ti ramanna napudot wenno nalamiis. Ania ti kayat a sawen ti agbalin a kalalainganna iti kinaespirituan?
-
Apocalipsis 3:20.Mangipakitaka iti ladawan ti Mangisalakan nga agtugtugtog iti ridaw (kitaen iti udi daytoy a balabala) bayat ti panangbasa ti pamiliam iti Apocalipsis 3:20. Apay nga agtugtog ni Jesus imbes a sumrek latta koman? Mabalin nga agsisinnublat dagiti miembro ti pamilia iti panangtugtog iti ridaw. Kalpasanna mabalin nga isingasing ti maysa a miembro ti pamilia ti maysa a wagas a pakabalinantayo nga “ilukat ti ridaw” iti Mangisalakan ket pastreken iti uneg ti miembro ti pamilia. Kasano ti rikna ti kaadda ti Mangisalakan iti pagtaengantayo?
-
Apocalipsis 4:10–11.Ania ti kaipapanan ti agdaydayaw iti Nailangitan nga Ama? Ania ti ammotayo maipapan Kenkuana a mamangtarigagay kadatayo nga agdaydayaw Kenkuana?
-
Apocalipsis 5:6, 12–13.Apay a maawagan ti Jesucristo a “Kordero”? Ania ti isuro kadatayo daytoy a pangawag maipapan Kenkuana?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a himno: “Jesus, Once of Humble Birth,” Hymns, no. 196.
Panangpadur-as iti Panangisurotayo
Yallukoy dagiti saludsod. Dagiti saludsod ti mangipakita a nakasagana dagiti miembro ti pamilia nga agsursuro ken mangted iti nalawag a pannakaammo ken pannakaawat iti no kasanoda nga agresponde iti no ania ti maisursuro kadakuada. Isurom iti pamiliam no kasano ti mangsarak kadagiti sungbat iti nasantuan a kasuratan. (Kitaen iti Panangisuro iti Wagas ti Mangisalakan,, 25–26.)
Pastreken, ni Greg K. Olsen