Naan-anay nga Ayat, ni Del Parson

Nobiembre 27–Disiembre 3

1–3 Juan; Judas

“Ti Dios Isu ti Ayat”

Bayat ti panagbasam ti Dagiti Surat ni Juan ken Judas, agkalikagum a maaddaan iti pammaregta maipapan iti no kasano a maipakitam ti ayatmo iti Dios. Isuratmo dagitoy nga impresion ken agtignay kadagitoy.

Isuratmo dagiti Impresionmo

Idi insurat da Juan ken Judas dagiti suratda, nangrugin a mangiturong ti narugit a doktrina iti adu a Santo iti apostasia. Sumagmamano a palso a mannursuro ti nagduadua pay no pudno a nagparang ni Jesucristo “iti lasag” (kitaen, kas pagarigan, iti 1 Juan 4:1–3; 2 Juan 1:7). Ania ti maaramid ti maysa a lider ti Simbaan iti kasta a situsion? Nagresponde ni Apostol Juan babaen ti panangibinglayna iti bukodna a panangsaksi iti Mangisalakan: “Daytoy ti pammaneknek a maitedmi maipapan iti dayta a manipud iti punganay, a nangngegantayo, a makitatayo iti matatayo, a saantayo koma kimmita ken kadagiti imami ti maiggaman no saan, ti Balikas ti biag” (Patarus ni Joseph Smith, 1 Juan 1:1 [iti 1 Juan 1:1, footnote a]). Ket kalpasanna insuro ni Juan maipapan iti ayat: Ti ayat ti Dios kadatayo ken ti ayat a nasken nga adda kadatayo para Kenkuana ken dagiti amin nga annakna. Kalpasan ti amin, maysa met a saksi ni Juan iti dayta. Napadasanna mismo ti ayat ti Mangisalakan (kitaen iti Juan 13:23; 20:2), ken tinarigagayanna a marikna dagiti Santo ti kasta met la nga ayat. Kasapulan ita ti pammaneknek ken dagiti pannursuro ni Juan maipapan iti ayat, no mapagduaduaan ti pammati ken ni Jesucristo ken agraira dagiti palso a pannursuro. Ti panangbasa kadagiti surat ni Juan ti makatulong kadatayo a mangsango kadagiti rigat ita nga addaan iti tured, gapu ta “awan ti buteng ken ayat; no di ket ti ayat a nagdanunan paksiatenna ti buteng” (1 Juan 4:18).

Dagiti Kapanunotan para iti Bukod a Panagadal iti Nasantuan a Kasuratan

1 Juan; 2 Juan

Ti Dios ti silaw, ken ti Dios ti ayat.

No pumilika iti maysa wenno dua a balikas a mangiladawan iti Dios, ania koma dagitoy? Kadagiti suratna, masansan nga inusar ni Juan dagiti balikas a “silaw” ken “ayat” (kitaen, kas pagrigan, iti, 1 Juan 1:5; 2:8–11; 3:16, 23–24; 4:7–21). Bayat ti panangbasam iti umuna a dua a surat ni Juan, utobem dagiti padas ni Juan iti silaw ken ayat ti Mangisalakan. Kas pagarigan, ibilang no ania ti nasursuro ni Juan manipud kadagiti pannursuro ni Jesus iti Juan 3:16–17; 12:35–36, 46; 15:9–14; 19:25–27. Makitam kadi dagiti ania man a pagpapadaan dagitoy a pannursuro ken no ania ti isuro ti 1 Juan maipapan iti silaw ken ayat ti Dios? Ania dagiti padas a nangisuro kenka a silaw ken ayat ti Dios?

1 Juan 2–4; 2 Juan

“No agiinnayattayo, agtaeng kadatayo ti Dios.”

Masarakamto pay dagiti balikas kas iti “agtalinaed” ken “agtaeng” a naulit kadagiti intero a surat ni Juan. Sapulem dagitoy a balikas, nangnangruna no basaem ti 1 Juan 2–4 ken 2 Juan. Ania iti panagkunam a kayat a sawen ti “agtalinaed” wenno ‘agtaeng” iti Dios ken iti doktrinana? (kitaen iti 2 Juan 1:9). Ania ti kayat na a sawen kenka nga adda ti Dios nga “agtalinaed” wenno “agtaeng” kenka?

1 Juan 2:24–3:3

Makapagbalinak a kas ken ni Jesucristo.

Ti kadi panggep a tun-oyen a panagbalin a kas ken ni Cristo ket kasla awan inggana a kinapasindayag kenka? Ibilang ti makaparegta a balakad ni Juan: “Annakko a dungdunguen, agtaengkayo kenkuana; tapno inton maiparangarang, addanto panagtalektayo … [ken] agbalintayonto a kas kenkuana” (1 Juan 2:28; 3:2). Ania ti masarakam iti 1 Juan 2:24–3:3 a mangted kenka iti panagtalek ken liwliwa kas maysa a disipulo ni Jesucristo? Bayat ti panangsursurom kadagiti surat ni Juan, sapulem dagiti dadduma pay a pagbatayan wenno balakad a makatulong kenka iti panagkagumaanmo nga agbalin nga ad-adda a kas ken ni Jesucristo.

Kitaen met iti Moroni 7:48; Doktrina ken Katulagan 88:67–68; Scott D. Whiting, “Becoming like Him,” Liahona, Nob. 2020, 12–14.

1 Juan 4:12

“Awan kadi ti tao a nakakita iti Dios uray kaano”?

Ilawlawag ti Patarus ni Joseph Smith, 1 Juan 4:12 nga “awan ti tao a nakakita iti Dios uray kaano, malaksid kadakuada a namati” (iti 1 John 4:12, footnote a; kitaen met iti Juan 6:46; 3 Juan 1:11). Naisurat dagiti nasantuan a kasuratan ti sumagmamano a gundaway idi impakita ti Dios nga Ama ti Bagina kadagiti napudno nga indibidual, pakairamanan mismo ni Juan (kitaen iti Apocalipsis 4; kitaen met iti Dagiti Aramid 7:55–56; 1 Nephi 1:8; Doktrina ken Katulagan 76:23; Joseph Smith—Pakasaritaan 1:16–17).

1 Juan 5

No aramatek ti pammatik ken ni Jesucristo ket mayanakak manen, maparmekko ti lubong.

Bayat ti panangbasam iti 1 Juan 5, sapulem no ania ti nasken nga aramidentayo a mangparmek iti lubong ket magun-od ti biag nga agnanayon. Ania ti mabalin a kayarigan iti biagmo ti panangparmek iti lubong? Mabalin met masarakam dagiti sungbat ken dagiti nalawag a pannakaammo ken pannakaawat iti mensahe ni Elder NeilL. Andersen “Overcoming the World” (Liahona, Mayo 2017, 58–62).

Judas 1

“[Bangonenyo] ti bagbagiyo iti kasantuan a pammatiyo.”

Ania ti isuro kenka ti Judas 1:10–19 maipapan kadagiti bumusor iti Dios ken iti aramidna? Ania ti masursurom manipud kadagiti bersikulo 20–25 maipapan iti no kasano a pagtalinaedem a natibker ti pammatim ken ni Jesucristo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Juan 2:8–11.Tapno matulongan ti pamiliam a mangutob kadagiti pannursuro ni Juan, agummong iti nasipnget a siled tapno mapadas dagiti miembro ti pamilia ti paggidiatan ti magmagna “iti kasipngetan” ken magmagna “iti lawag.” Kasano a ti gura ti makaigapu kadatayo a magna iti kasipngetan ket maitibkol? Kasano a ti panaggiinnayat iti tunggal maysa ket mangisangbay iti lawag iti biagtayo?

1 Juan 3:21–22.Ania kadagitoy a bersikulo ti mangpapigsa iti “panagtalek” nga adda kadatayo iti Dios ken iti kabaelantayo nga umawat kadagiti sungbat dagiti kararagtayo?

Makatulong kadatayo ti panagtungpal kadagiti bilin ti Dios a mangparmek iti lubong.

1 Juan 5:2–3.Adda kadi dagiti ania man a bilin a saantayo nga ibilang a “nadagsen” wenno narigat a suroten? Kasano a mabalbaliwan ti panagayattayo iti Dios ti wagas a mariknatayo maipapan kadagiti bilinna?

3 Juan 1:4.Ania ti kayat a sawen ti “magna iti kinapudno”? Mabalin nga usarem daytoy a gundaway a mangisarita kadagiti miembro ti pamiliam no kasano a nakitam idan a nagna iti kinapudno ken isaritam maipapan iti rag-o nga isangbay daytoy kadakayo. Mabalin a magustuan dagiti miembro ti pamilia ti panangisurat wenno panangidrowing iti papel kadagiti kinapudno a nasursuroda iti sinantugot ti saka [footprints] ken panangusar kadagitoy a mangramid iti dana a mabalin nga agkakadua a pagnaan ti pamiliam.

Judas 1:3–4.Adda kadi dagiti ania man a naespirituan a peggad a “simrek” iti biagtayo ken iti pamiliatayo? (Judas 1:4). Kasano a masurottayo ti balakad ni Judas a “makidangadangkayo a sibibileg gapu iti pammati” ken mangkedked kadagitoy a peggad? (Judas 1:3). Ania ti mabalintayo nga aramiden tapno masigurado a ti “talna, ken ayat, umaduda koma” iti pamiliatayo? (Judas 1:2).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Where Love Is,” Children’s Songbook, 138–39.

Panangpadur-as iti Bukod a Panagadal

Sapulen ti ayat ti Dios. Insuro ni Presidente M. Russell Ballard, “[Ti] ebanghelio ket maysa nga ebanghelio ti ayat—ayat para iti Dios ken ayat para iti tunggal maysa” (“God’s Love for His Children,” Ensign, Mayo 1988, 59). Bayat ti panangbasam kadagiti nasantuan a kasuratan, ibilangmo ti panangisurat wenno panangmarka kadagiti pakakitaan iti ayat ti Dios.

Makipagnakayo Kaniak, ni Greg K. Olsen