Ni Cristo nga agikaskasaba iti Lubong ti Espiritu, ni Robert T. Barrett

Nobiembre 20–26

1 ken 2 Pedro

“Agrag-okayo iti Di Mayebkas a Rag-o ken Napno iti Dayag”

Bayat ti panangbasam iti Dagiti Surat ni Pedro, mabalin a makaawatka kadagiti naespirituan a parikna. Dagus nga isuratmo dagitoy bayat ti “kaaddam iti Espiritu” (Doktrina ken Katulagan 76:80) tapno naum-umno ti pannakaawatmo no ania ti insuro ti Dios kenka.

Isuratmo Dagiti Impresionmo

Nabiit kalpasan ti Panagungarna, nagipadto ti Mangisalakan a nalabit a nangburburibor ken ni Pedro. Impadlesna a mapapatayto ni Pedro gapu iti pammatina, bitbitenda nga “ipandanto iti di[na] kayat…, impaawatna no anianto nga ipapatay ti pangidaydayawnanto iti Dios” (Juan 21:18–19). Kalpasan ti sumagmamano a tawen, idi insurat ni Pedro dagiti suratna, ammona a daytoy naipadto nga ipapatay kas maysa a martir ket asidegen: “Ta ammok nga umay a sipapardas ti panagwayawayko ditoy abungko a kas met imbaga kaniak ni Apotayo a Jesucristo” (2 Pedro 1:14). Nupay kasta, dagiti balikas ni Pedro ket saan a napnuan iti buteng wenno addaan iti rikna nga adda dakes a mapasamak. Ngem ketdi, insurona dagiti Santo nga “agragrag-okayo unay,” nupay ita addada iti “panagladingit gapu kadagiti nadumaduma a pannulisog.” Imbalakadna kadakuada a manglagip a “ti pannakasuot ti pammati[da]” ti mangiturong iti “pakaidayawan ken dayag ken tan-ok iti pannakairangarang ni Jesucristo” ken “ti pannakaisalakan dagiti kararua[da]” (1 Pedro 1:6–7,9). Nalabit a makaliwliwa ti pammati ni Pedro kadagidiay nagkauna a Santo, kas ti panangparegta kadagiti Santo iti agdama, nga isuda pay dagiti “mairaman iti panagitured ni Cristo; a, no maibutaktakto ti gloriana,maragsakan[tayo] met nga addaan iti aglaplapusanan a rag-o” (1 Pedro 4:13).

Dagiti Kapanunotan para iti Bukod a Panagadal iti Nasantuan a Kasuratan

1 Pedro 1:3–9; 2:19–24; 3:14–17; 4:12–19

Masarakak ti rag-o kadagiti panawen ti pannubok ken panagsagaba.

Ti panawen kalpasan ti Pannakailansa iti krus ni Cristo saan a nalaka a panawen tapno agbalin a Kristiano, ken binigbig ti umuna a surat ni Pedro dayta. Iti umuna nga uppat a kapitulo, madlawmo dagiti balikas ken ragup ti balikas a mangiladladawan iti kinarigat: napagladingit, pannakasulisog, aglak-am a di maiparbeng, nabara a rigrigat, ken panagsagaba (kitaen iti 1 Pedro 1:6; 2:19; 4:12–13). Ngem madlawyo met dagiti balikas a kasla narag-o—mabalin a kayatmo nga ilista dagiti nakitam. Bayat ti panangbasam iti 1 Pedro 1:3–9; 2:19–24; 3:14–17; ken 4:12–19, ania ti mangted kenka iti namnama a pakasarakam iti rag-o uray iti baet dagiti narigat a kasasaad?

Mabalinmo pay a basaen ti mensahe ni Presidente Russell M. Nelson “Joy and Spiritual Survival” (Liahona, Nob. 2016, 81–84) ket sapulen dagiti pagpapadaan no ania ti insuro ni Pedro ken no ania ti insuro ni Presidente Nelson. Ania ti maysa a banag maipapan iti plano ti pannakaisalakan ken ti ebanghelio ni Jesucristo a mangisangbay kenka iti rag-o?

Kiten met iti Ricardo P. Giménez, “Finding Refuge from the Storms of Life,” Liahona, Mayo 2020, 101–3.

1 Pedro 3:18–20; 4:1–6

Maikasaba ti ebanghelio kadagiti natay tapno maukomda a sililinteg.

Maysa nga aldaw agtakderto ti tunggal tao iti pangukoman ket “idatagdanto iti daydiay sisasagana kenkuana a mangukom kadagiti sibibiag ken natay” (1 Pedro 4:5). Kasano a maukom ti Dios ti amin a tattao a nalinteg a maigiddiat dagiti gundawayda a makaawat ken agbiag iti ebanghelio? Makita no kasano a ti doktrina nga insuro ni Pedro iti 1 Pedro 3:18–20; 4:6 mangtulong a mangsungbat iti daytoy a saludsod. Kasano a mapatibker dagitoy a bersikulo ti pammatim iti kinasimbeng ken kinalinteg ti Dios?

Tapno ad-adda pay a masukisok daytoy a doktrina, adalen ti Doktrina ken Katulagan 138, maysa a paltiing a naawat ni Presidente Joseph F. Smith kabayatan ti panangutobna kadagitoy a sinurat ni Pedro. Ania dagiti nayon pay a kinapudno a nasursuro ni Presidente Smith?

Kitaen met iti Gospel Topics, “Baptisms for the Dead,” topics.ChurchofJesusChrist.org.

2 Pedro 1:1–11

Babaen ti bileg ni Jesucristo, mapadur-asko ti nadiosan a sagudayko.

Mariknam kadi a saan a posible ti panagbalin a kas ken ni Jesucristo ken mangpadpadur-as kadagiti kababalinna? Indiaya ni Elder Robert D. Hales daytoy a makaparegta a kapanunotan maipapan iti no kasano a mapadur-astayo dagiti kababalin a kas ken ni Cristo: “Dagiti kababalin ti Mangisalakan … ket dagiti nayabel a galgalad a napagtitipon iti maysa ken maysa, a napadur-as kadatayo iti panagiinnuman a wagas. Iti sabali a pannao, saantayo a magun-od ti maysa a kababalin a kas iti adda ken Cristo no awan met iti pananggun-od ken panangaring kadagiti dadduma. Kas iti panagbalin a napigsa ti maysa a galad, kasta met a maaramid iti ad-adu pay” (“Becoming a Disciple of Our Lord Jesus Christ,” Liahona, Mayo 2017, 46).

Ti tunggal saguday a kas ken ni Cristo a mapadur-astayo, matulongannatayo a mangyabel iti maysa a naespirituan a tapiseria ti kinadisipulo.

Bayat ti panagbasam iti 2 Pedro 1:1–11, utobem dagiti kababalin “ti nadiosan a saguday” a nailista kadagitoy a bersikulo. Iti padasmo, kasano a “mayabelda,” kas iti inladawan ni Elder Hales? Kasano a padur-asenda ti tunggal maysa? Ania ti masursurom manipud kadagitoy a bersikulo maipapan iti proseso ti panagbalin nga ad-adda a kas ken ni Cristo?

Mabalin pay nga utobem “dagiti napateg ken dadakkel unay a karkari” nga ited ti Dios kadagiti Santona—agraman kenka (2 Pedro 1:4). Ti mensahe ni Elder David A. Bednar “Exceeding Great and Precious Promises” (Liahona, Nob. 2017, 90–93) makatulong kenka a makaawat no ania dagita a kari ken no kasano nga awaten ida.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Pedro 2:5–10.Bayat ti panangbasam kadagitoy a bersikulo a kaduam ti pamiliam, ibilangmo ti panangusar kadagiti bato a mangtulong kadagiti miembro ti pamilia nga iladawan iti panunotda dagiti pannursuro ni Pedro a ti Mangisalakan ti “bato a pasuli.” Kasano a kapadatayo ti “kas batbato a sibibiag [nabiag] nga us-usaren ti Dios a mangbangon iti pagarianna? Ania ti masursurotayo manipud ken ni Pedro maipapan iti Mangisalakan ken ti akemtayo iti pagarianna? Ania ti mensahe ni Pedro iti pamiliam?

1 Pedro 3:8–17.Kasanotayo a mabalin nga “agsagana a kanayon nga ited ti maysa a sungbat” kadagiti agsaludsod kadatayo maipapan iti pammatitayo? Mabalin a magustuan ti pamiliam a mangyakem iti situasion nga adda maysa a tao nga umasideg kadakuada nga agsaludsod maipapan iti ebanghelio.

1 Pedro 3:18–20; 4:6.Ania ti maaramid ti pamiliam tapno makarikna a konektado kadagiti kapuonanyo? Nalabit a mabalinmo a rambakan dagiti panagkasangay dagiti pimmusay a kapuonam babaen ti panagisaganam kadagiti paboritoda a makan, a kumitkita kadagiti ladawan, wenno panangisalaysay kadagiti estoria manipud iti biagda. No mabalin, mabalinmo met ti agplano nga umawat kadagiti ordinansa para iti daytoy a kapuonan iti templo (para iti tulong, sarungkaran iti FamilySearch.org).

2 Pedro 1:16–21.Kadagitoy a bersikulo, impalagip ni Pedro kadagiti Santo ti padasna iti Bantay ti Panagbalbaliw-langa (kitaen met iti Mateo 17:1–9). Ania ti masursurotayo manipud kadagitoy a bersikulo maipapan kadagiti pannursuro dagiti propeta? (kitaen met iti Doktrina ken Katulagan 1:38). Ania ti mangted kadatayo iti panagtalek a mangsurot kadagiti sibibiag a propetatayo iti agdama?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Family History—I Am Doing It,” Children’s Songbook, 94.

Panangpadur-as iti Panangisurotayo

“Agbalin a kanayon a nakasagana.” Mabalin a dumteng ken maawan a dagus dagiti saan a pormal a kanito ti panangisuro iti pagtaengan, isu a napateg a gundawayan dagitoy no sumangbayda. Kasano a maikagumaanmo tapno agbalin a “sisasagana a kanayon” nga isurom kadagiti miembro ti pamiliam dagiti kinapudno ti ebanghelio ken ibinglaymo “ti namnama nga adda kenka” (1 Pedro 3:15) no dumteng ti kanito ti panangisuro? (Kitaen iti Panangisuro iti Wagas ti Mangisalakan16.)

Nupay naipasango ni Pedro iti adu a pannakaidadanes ken pannakasuppiat, nagtalinaed isuna a natibker iti pammaneknekna maipapan ken ni Cristo.