“Nobiembre 20–26. 1 ken 2 Pedro: ‘Agrag-okayo iti di Mayebkas a Rag-o ken Napno iti Dayag,’” Umaykayo, Sumurot Kaniak—Para iti Primary: Baro a Tulag 2023 (2021)
“Nobiembre 20–26. 1 ken 2 Pedro,” Umaykayo, Sumurot Kaniak—Para iti Primary: 2023
Ni Cristo nga Agikaskasaba iti Lubong dagiti Espiritu, ni Robert T. Barrett
Nobiembre 20–26
1 and 2 Pedro
“Agrag-okayo iti Di Mayebkas a Rag-o ken Napno iti Dayag”
Rugiam ti panagadalmo iti 1 ken 2 Pedro iti kararag. Laglagipem a ti kasayaatan a panagsaganam ti mangisuro umayto babaen dagiti padasmo iti bukod ken sangapamiliaan a panagadal.
Yawis ti Panagbibinninglay
I-display ti ladawan ni Pedro iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket awisem dagiti ubbing a mangisarita kenka ti maysa a banag nga ammoda maipapan ken ni Pedro. Ipalagip kadakuada a ni Pedro ti lider ti Simbaan kalpasan a nagungar ni Jesus, ket ilawlawag a ti 1 Pedro ken 2 Pedro ket sursurat manipud kenkuana a para kadagiti miembro ti Simbaan iti aldawna.
Isuro ti Doktrina: In-inaudi nga Ubbing
Makapagragsakak uray kabayatan dagiti narigat a panawen.
Ibilang no kasano a maisurom dagitoy a bersikulo iti wagas a makatulongto kadagiti ubbing nga umasideg iti Mangisalakan no maipasangoda iti rigat.
Dagiti Mabalin nga Aktibidad
-
Tulongam dagiti ubbing a mangpanunot kadagiti pagarigan dagiti narigat a banag a pinasaran ni Jesus, kas iti pannakaumsi wenno pannakaang-angawna. Ilawlawag a maaddaantayonto iti narigat a panawen iti panagbiagtayo. Basaen ti 1 Pedro 1:6–7; 3:14 nga aggigiddan, ken ibinglay ti maysa a padas idi naipasangoka iti “pannubok ti pammatim” ket tinulongannaka ti Mangisalakan a mangsapul iti rag-o. Wenno mabalinmo nga ibinglay ti kararag ni Propeta Joseph Smith iti Pagbaludan iti Liberty ken ti liwliwa nga inted ti Dios kenkuana (kitaen iti Doktrina ken Katulagan 121:1–8; 123:17).
Ni Joseph Smith iti Pagbaludan iti Liberty, ni Greg K. Olsen
-
I-display ti maysa a ladawan a mangipakita ken ni Jesus ken ti dadduma pay a tattao (aduan ti Libro ti Arte ti Ebanghelio ; kasta met ti Umaykayo, Sumurot Kaniak—Para kaniak—Para kadagiti Indibidual ken Pamilia). Idawat kadagiti ubbing a mangsapul ken ni Jesus iti ladawan. Paneknekan a no kumitatayo iti Mangisalakan, matulongannatayo a mangsapul iti rag-o iti biagtayo.
Kayat ti Nailangitan nga Ama nga agbalinak a pagwadan kadagiti dadduma.
Insuro ni Pedro a datayo “dagiti tao ti Dios” ken dagiti nasayaat nga aramidtayo ket mabalin a “pakaidayawan ti Dios.”
Dagiti Mabalin nga Aktibidad
-
Iladawam dagiti banag a naidumduma manipud kadagiti aglawlawda, wenno mangipakita ti ladawan dagiti kasta a bambanag. Kas pagarigan, naidumduma ti templo manipud kadagiti pasdek a naipalawlaw iti daytoy wenno maysa a bantay a timpuar iti tanap. Ilawlawag a no tungpalentayo dagiti bilin, maidumdumatayo ken makita dagiti dadduma a tao dagiti pagwadantayo. Isaritam maipapan iti sumagmamano a “naimbag nga aramid” a nakitam nga inaramid dagiti ubbing. Ilawlawag a dagiti nasayaat nga aramid kas kadagitoy ket “pakaidayawan ti Dios”—mangtulong dagitoy kadagiti dadduma a makarikna iti ad-adu pay nga ayat para iti Dios ken agtarigagay nga agserbi Kenkuana.
-
Leppasen ti panid ti aktibidad kadagiti ubbing. Kasano nga agdaydayaw iti Dios dagiti tao a nasarakanda iti ladawan?
Masursuro dagiti espiritu iti lubong dagiti espiritu ti maipapan iti ebanghelio.
Kalpasan ti ipapatayna, napan ni Jesus iti lubong dagiti espiritu ket nangibaon kadagiti nalinteg nga espiritu a mangisuro kadagiti dadduma pay nga espiritu a saan pay nga immawat iti ebanghelio.
Dagiti Mabalin nga Aktibidad
-
Isaritam kadagiti ubbing maipapan iti maysa a tao nga ammom a natayen. Ilawlawag a no matay ti tao, panawan dagiti espirituda dagiti bagida ket mapanda iti lubong dagiti espiritu. Basaem ti 1 Pedro 3:19 ket ilawlawag nga idi natay ni Jesus, sinarungkaranna ti lubong dagiti espiritu. Sadiay, kiniddawna dagiti nalinteg nga espiritu a mangisuro iti ebanghelio kadagiti dadduma pay nga espiritu a saan pay nga immawat iti ebanghelio (kitaen iti Doktrina ken Katulagan 138:30).
-
Ipakitam ti ladawan ti maysa a templo. Ilawlawag kadagiti ubbing nga inton umdasen ti tawenda, makapanda iti templo ket mabuniagan para kadagiti kapuonanda a saan pay a nabuniagan bayat ti kaaddada iti daga. Tulongan dagiti ubbing a mangpunno iti simple a family tree (kitaen, kas pagarigan, iti “Family History Coloring Pages,” ChurchofJesusChrist.org).
Isuro ti Doktrina: In-inauna nga Ubbing
Masarakak ti rag-o ken talna uray kabayatan dagiti narigat a panawen.
Mabalin a napadasanen dagiti ubbing a sursuruam dagiti sumagmamano a kita ti panangsursuron wenno pananguy-uyaw gapu iti pammatida. Makatulong kadakuada dagitoy a bersikulo kabayatan kadagita a panawen.
Dagiti Mabalin nga Aktibidad
-
Gupgopem ti sumagmamano nga estoria maipapan ken ni Jesus a naidadanes, wenno pabasam dagitoy kadagiti ubbing—kitaen, kas pagarigan, iti Mateo 12:9–14 wenno Lucas 22:47–54. Saludsodem kadagiti ubbing no napadasandan ti naangaw wenno nauyaw gapu ta agbibiagda kadagiti pannursuro ti ebanghelio. Kasano ti riknada kadagitoy? Kalpasanna aggigiddan a basaen ti 1 Pedro 3:12–14; 4:13–14, 16, ket kiddawen kadagiti ubbing a mangsapul no ania ti kinuna ni Pedro maipapan iti panagsagaba “gapu iti kinalinteg.” Apay a makapagragsaktayo pay laeng no uyawendatayo dagiti dadduma a tao gapu iti panagaramidtayo iti umno?
-
Mangibinglay ti maysa a padas idi nakasarakka iti rag-o wenno kappia kabayatan ti maysa a pannubok, wenno ibinglay no kasano a nakasarak iti kappia ni Propeta Joseph Smith idi adda isuna iti Pagbaludan ti Liberty (kitaen iti Doktrina ken Katulagan 121:1–8; 123:17). Kasano a masarakantayo ti rag-o ken kappia ken ni Cristo kabayatan dagiti pannuboktayo?
Kanayon a makapagsaganaak a mangibingaly iti ebanghelio.
Maaddaanto dagiti ubbing iti adu a gundaway iti unos ti panagbiagda a mangsungbat kadagiti saludsod manipud iti dadduma a tao maipapan iti pammatida. Panunotem no ania ti mabalinmo nga aramiden tapno makatulong kadakuada a “kanayon a nakasagana a sumungbat.”
Dagiti Mabalin nga Aktibidad
-
Isaritam maipapan ti maysa a panawen idi adda maysa a tao a nagsaludsod kenka maipapan iti Simbaan, ket iladawam no nariknam met laeng a nakasaganaka a sumungbat. Kiddawen kadagiti ubbing a mangisarita maipapan iti ania man a panawen idi nagsaludsod dagiti tao kadakuada maipapan iti Simbaan. Aggigiddan a basaen ti 1 Pedro 3:15. Kasano a masurottayo ti balakad ni Pedro iti daytoy a bersikulo?
-
Tulongam dagiti ubbing a mangpanunot iti sumagmamano a saludsod a mabalin a damagen dagiti tao maipapan ken ni Jesucristo ken iti Simbaanna. Pagsisinnublatem dagiti ubbing a mangilawlawag no kasano ti mangsungbat kadagitoy a saludsod tapno mabalinda ti “nakasagana a kanayon.” Mangipaay ti Pagannurotan ti Pammati kadagiti simple a kinapudno a mabalin nga usaren dagiti ubbing a mangsungbat kadagiti saludsod maipapan iti Simbaan.
Masursuro dagiti espiritu iti lubong dagiti espiritu ti maipapan iti ebanghelio.
No matay dagiti nalinteg, mapanda iti lubong dagiti espiritu tapno mangisuroda iti ebanghelio kadagiti saan pay nga immawat iti daytoy bayat ti kaaddada iti daga.
Dagiti Mabalin nga Aktibidad
-
Mangidrowing iti pisarra iti maysa a sirkulo nga addaan ti maysa a linia iti tengngana. Isurat ti Paraiso ti Espiritu iti maysa a kagudua ti sikulo ken Pagbaludan ti Espiritu iti sabali pay a kaguduana. Awisem ti maysa kadagiti ubbing a mangbasa iti 1 Pedro 3:18–20; 4:6 (kitaen iti 1 Pedro 4:6, footnotea, para kadagiti rebision manipud iti Patarus ni Joseph Smith). Ilawlawag nga idi natay ni Jesus, napan Isuna iti paraiso dagiti espiritu. Binilinna dagiti nalinteg nga espiritu sadiay a mangisuro iti ebanghelio kadagiti espiritu iti pagbaludan ti espiritu.
-
Awisem ti maysa a nagannak wenno in-inauna a kabsat ti maysa kadagiti ubbing tapno mangisarita maipapan iti ipapan iti templo ken panangawat kadagiti ordinansa para iti maysa kadagiti kapuonanda.
-
Awisem dagiti ubbing a mangpunno iti simple a family tree (kitaen iti maysa a pagarigan iti “Family History Coloring Pages,” ChurchofJesusChrist.org).
Yallukoy ti Panagsursuro iti Pagtaengan
Awisem dagiti ubbing a mangibinglay ti family tree-da kadagiti miembro ti pamiliada ket idawat kadakuada a tumulong a mangnayon iti nagnagan iti daytoy.
Panangpadur-as iti Panangisurotayo
Mannakaawatka koma kadagiti ubbing a sursuruam. Am-ammom dagiti ubbing a sursuruam, isu a balbaliwam dagiti kapanunotan iti daytoy a balabala no kasapulan tapno maipaay dagiti kasapulanda. Mabalinmo nga usaren uray ania kadagiti naisingasing nga aktibidad iti daytoy a balabala, saan laeng kadagidiay naisurat para iti grupo-ti-edad a sursuruam. (Kitaen iti Panangisuro iti Wagas ti Mangisalakan,7.)