“Nobiembre 13–19. Santiago: ‘Managtungpalkay Koma iti Sao, ket Saan Laeng a Managdengngeg,’” Umaykayo, Sumurot Kaniak—Para iti Primary: Baro a Tulag 2023 (2021)
“Nobiembre 13–19. Santiago,” Umaykayo, Sumurot Kaniak—Para iti Primary: 2023
Nobiembre 13–19
Santiago
“Managtungpalkay Koma iti Sao, ket Saan Laeng a Managdengngeg”
Naglaon ti Surat ni Santiago iti adu a kinapudno a mabalin a mangbendision kadagiti ubbing a sursuruam. Surotem ti Espiritu tapno ikeddeng no ania dagiti kinapudno ti mabalinmo nga isalaysayto kadakuada. Mabalin a makatulong dagiti kapanunotan iti daytoy a balabala.
Yawis ti Panagbibinninglay
Awisem dagiti ubbing a mangibinglay iti maysa a pagbatayan ti ebanghelio a malagipda nga ad-adalen iti pamiliada kabayatan ti napalabas a lawas wenno manipud iti klaseda ti Primary iti napalabas a Domingo. Kalpasan ti panagibinglay ti tunggal ubing, awisem ti sabali pay nga ubing iti klase a manggupgop no ania ti naibinglay.
Isuro ti Doktrina: In-inaudi nga Ubbing
Makiddawko iti Nailangitan nga Ama a tulongannak a mangsursuro no ania ti pudno.
Tulongam dagiti ubbing a sursuruam a maawatanda a mabalinda ti umasideg iti Nailangitan nga Ama para iti sirib. Ti panangaramidda iti daytoy ket mangbendisionto kadakuada iti nawadwad no maipasangoda iti naririgat a saludsod.
Dagiti Mabalin nga Aktibidad
-
Tulongam dagiti ubbing a mangulit iti ragup ti balikas a “No siasino man kadakayo agkurang iti kinasirib, agdawat koma iti Dios” (Santiago 1:5). Kasano ti panagdamagtayo iti Dios kadagiti saludsod? Kasano ti panangsungbatna kadatayo?
-
Ipakitam ti ladawan ti Umuna a Parmata (Libro ti Arte ti Ebanghelio, no. 90), wenno ipabuyam ti video a “Joseph Smith’s First Vision” (ChurchofJesusChrist.org). Ilawlawag no kasano a ti panangbasa iti Santiago 1:5 ket nangguyugoy ken ni Joseph Smith nga agdawat iti Nailangitan nga Ama a tulonganna iti maysa a saludsod (kitaen iti Joseph Smith—Pakasaritaan 1:1–20). Iburaymo ti pammaneknekmo a sungbatan ti Dios dagiti kararag, ken paneknekam a mabalinda ti agkararag Kenkuana no adda dagiti saludsodda. Pagdrowingem dagiti ubbing iti bukodda a ladawan ni Joseph Smith a mangbasbasa iti Santiago 1:5 ken agkarkararag iti Nailangitan nga Ama.
Makapagsaritaak iti nasayaat.
Kas ti impaneknek ni Santiago, ti panagsursuro nga agsao laeng kadagiti nasayaat a banag iti dadduma ket mangtulongto kadatayo nga agbalin a kas ken ni Jesucristo (kitaen iti Santiago 3:2).
Dagiti Mabalin nga Aktibidad
-
Ipakitam dagiti ladawan ti maysa a banag a nasam-it ken maysa a banag a naalsem. Tulongam ida a makaawat nga idawat ti Nailangitan nga Amatayo a mangusar iti dilatayo nga agsao kadagiti nasam-it (wenno nasayaat) a banag ken saan nga agsao kadagiti naalsem (wenno saan a nasayaat) a banag (kitaen iti Santiago 3:10). Tulongam ida nga agpanunot kadagiti pagarigan dagiti nasayaat a banag a maisaotayo kadagiti dadduma.
-
Mangted iti tunggal ubing iti simple a drowing ti maysa a tao nga agsasao. Awisem dagiti ubbing a mangitag-ay iti daytoy no isaom ti maysa a banag a nasayaat a maaramidtayo babaen kadagiti sasaotayo (kas iti panangibaga iti pudno, panangted kadagiti pammadayaw, ken panangidiaya iti tulong iti maysa a tao) ket ibabada daytoy no isaom ti maysa a banag a nasken a saantayo nga aramiden iti dilatayo (kas iti panagulbod, panangawag iti makapasakit iti dadduma a tao, ken panagkedked nga agtungpal iti maysa a naganak).
-
Patibkerem ti mensahe iti Santiago 3:1–13 babaen ti aggigiddaan a panangkansion iti maysa a kanta maipapan iti panagbalin a nasayaat kas iti “Kindness Begins with Me” (Children’s Songbook, 145).
Agkasapulan iti kinaanus ti panangawat kadagiti bendision ti Dios.
Saan a kanayon a gagangay a sumangbay ti kinaanus, nangnangruna kadagiti ubbing. Ibilang no kasano a mausarmo ti balakad ni Santiago a mangtulong kadagiti ubbing a sursuruam a mangadal iti kinaanus.
Dagiti Mabalin nga Aktibidad
-
Tulongam dagiti ubbing nga agpanunot kadagiti panawen a nasken nga agurayda iti maysa a banag a pudno a tinarigagayanda. Ibinglay ti maysa a padas idi nasken nga agurayka. Ilawlawag a ti panaguray iti maysa a banag a tarigagayantayo nga awan ti panagreklamo ket maawagan iti panaganus.
-
Gupgopem ti Santiago 5:7 iti bukodmo a balikas, ket mangipakita iti ladawan ti maysa a bukel wenno patubo a mula. Apay a kasapulantayo ti panaganus no agmulatayo? Ania ti mapasamak no pinadastayo ti nangparut iti patubo a mula tapno naparpartak ti panagdakkelna? Mabalin pay a kasaritam dagiti ubbing maipapan iti no ania ti kaipapanan iti agbalin a naanus iti dadduma ken iti bagbagitayo. Paneknekam a matulongannatayo ti Dios nga agsursuro nga agbalin a naanus.
-
Ibinglay ti estoria ni Job, a nadakamat iti Santiago 5:11 kas maysa a pagwadan ti kinaanus (kitaen iti “Job,” iti Dagiti Estoria iti Daan a Tulag, wenno iti maitutop a video iti ChurchofJesusChrist.org). Kasano a nabendisionan ni Job gapu iti panagbalinna a naanus?
Isuro ti Doktrina: In-inauna nga Ubbing
Tulongannakto ti Nailangitan nga Ama a mangsursuro iti kinapudno no kalikagumak a gun-oden ti tulongna.
Naub-ubing iti sumagmamano laeng a tawen dagiti ubbing a sursuruam ngem ni Joseph Smith idi basaenna ti Santiago 1:5 ken naparegta nga umasideg iti Nailangitan nga Ama iti kararag. Ibilang no kasano a matulongam dagiti ubbing a sursuruam a mangbukel iti pammatida a tulonganto ti Dios ida no agkurangda iti kinasirib.
Dagiti Mabalin nga Aktibidad
-
Kiddawen kadagiti ubbing a mangisarita kenka ti estoria maipapan iti Umuna a Parmata ni Joseph Smith iti bukodda a balikas (kitaen iti Joseph Smith—Pakasaritaan 1:5–20; kitaen met iti video nga “Joseph Smith’s First Vision” iti ChurchofJesusChrist.org). Kasano a nakatulong ti Santiago 1:5 ken ni Joseph? Tulongam dagiti ubbing nga agpanunot iti dadduma pay a pagarigan dagiti tao kadagiti nasantuan a kasuratan nga immawat iti maysa a sungbat kadagiti kararagda (kas ken ni Nephi (kitaen iti 1 Nephi 11:1–6) ken ti kabsat ni Jared (kitaen iti Ether 2:18–3:9). Ania dagiti sumagmamano a banag a mabalintayo a kiddawen iti Nailangitan nga Ama iti kararag?
-
Basaen kadagiti ubbing ti Joseph Smith—Pakasaritaan 1:10–14. Awisem dagiti ubbing a mangsarak kadagiti banag nga inaramid ni Joseph Smith tapno umawat kadagiti sungbat dagiti saludsodna. Kasano a masurottayo ti pagwadan ni Joseph no adda dagiti saludsodtayo?
“Ti pammati nga awanan ar-aramid, natay.”
Kasano a matulongamto dagiti ubbing a makita ti pagnaigan ti no ania ti patienda ken no ania ti aramidenda?
Dagiti Mabalin nga Aktibidad
-
Ipakitam kadagiti ubbing ti maysa a flashlight nga awanan kadagiti bateria, maysa a lapis nga awan pagpugasna wenno maysa a banag nga awan serbina wenno “natay.” Awisem dagiti ubbing a mangbasa iti Santiago 2:14–17. Kasano nga iladawan dagitoy a banag ti kinapudno dagitoy a bersikulo?
-
Awisem ti sumagmamano kadagiti ubbing a siuulimek a mangbasa iti Santiago 1:22–27 ken ti dadduma pay a mangbasa iti 2:14–18. Kalpasanna awisem ida a mangibinglay no ania ti mabalin nga aramidenda a mangipakita nga agipatpatungpalda iti balikas. Kas pagarigan, kasano nga agtungtungpalda iti katulaganda iti panagbuniag. Adda kadi maysa a tao nga am-ammoda a masakit wenno malidlidayan a mabalin a sarungkaranda? Kasano nga ad-adda a makapagserbida kadagiti pamiliada? Mabalin met nga ipalagipmo kadakuada dagiti balikas a mabalin a nangngeganda iti miting ti sakramento ita nga aldaw. Kasano a makapagbalintayo a managtungpal kadagitoy a balikas?
“Namati ni Abraham iti Dios” (Santiago 2:23). Ni Abraham kadagiti Tanap ti Mamre, ni Grant Romney Clawson
Mapilik ti agsarita iti nasayaat.
Mabalin a kasla saan a napateg dagiti balikas nga isaotayo iti tunggal maysa, ngem kas impaneknek ni Santiago, mabalin nga addaanda iti nabileg nga impluensia, para iti naimbag wenno dakes.
Dagiti Mabalin nga Aktibidad
-
Adda kadi maysa a tao iti ward, nalabit a maysa kadagiti ubbing a sursuruam, a nagtrabahon kadagiti kabalio wenno adda ammona maipapan kadagiti bilog? Mabalinmo nga awisen isuna tapno mangted kadagiti nalawag a pannakaammo ken pannakaawat maipapan kadagiti pannursuro ni Santiago iti Santiago 3:3–4 maipapan iti panangusar kadagiti nasayaat a balikas. Wenno mabalinmo ti mangipaay iti sumagmamano a bukodmo a nalawag a pannakaammo ken pannakaawat. Ania ti masursurotayo maipapan ti panangpengdan kadagiti panagsasaotayo manipud kadagitoy a pagarigan?
-
Awisem dagiti ubbing a mangbasa iti Santiago 3:1–13 ken mangidrowing iti ladawan ti maysa a banag a masarakanda a mangisuro maipapan iti panangpengdan kadagiti panagsasaotayo. Mangted kadakuada iti gundaway a mangibinglay kadagiti ladawanda ken no ania ti nasursuroda. Aggigiddan nga agkansion iti maysa a kanta maipapan kadagiti nasayaat a balikas, kas iti “Let Us Oft Speak Kind Words” (Hymns, no. 232).
-
Kalpasan ti panangrebyu iti Santiago 3:1–13 nga aggigiddan, irebyu dagiti pagrukodan para iti pagsasao iti Para iti Pigsa dagiti Agtutubo ([buklet, 2022], 12). Tulongam dagiti ubbing a mangituding iti maysa a panggep a tun-oyen a mangpasayaat iti wagas a pannakisaritada iti dadduma, ken allukoyem ida nga agpatulong iti Nailangitan nga Ama iti daytoy panggepda a tun-oyen.
Yallukoy ti Panagsursuro iti Pagtaengan
Awisem dagiti ubbing nga agaramid iti maysa a banag iti daytoy a lawas a mangyaplikar iti nasursuroda iti klase, kas iti panagkararag iti Nailangitan nga Ama nga addaan iti saludsod wenno panangpadas nga agbalin a naan-anus. Kiddawem kadakuada a mangibinglay kadagiti padasda iti sumaruno a klase.
Panangpadur-as iti Panangisurotayo
Tulongam dagiti ubbing nga agbalin nga aktibo. “Kabayatan ti panangisurom kadagiti ubbing, bay-am ida nga agbangon, agdrowing, agkolor, agsurat, ken agpartuat. Dagitoy a banag ti ad-adda pay ngem dagiti naragsak nga aktibidad—napategda iti panagsursuro”(Panangisuro iti Wagas ti Mangisalakan,25).