“Job,” Dagiti Estoria iti Daan a Tulag (2021)
“Job,” Dagiti Estoria iti Daan a Tulag
Job 1–3; 19; 38–42
Job
Panagtalek iti ayat ti Apo
Maysa a nasayaat a tao ni Job a nagayat iti Apo ken nagtungpal kadagiti bilinna. Naaddaanda iti asawana ti 10 nga annak, ket naaddaanda iti adu nga arban dagiti ayup ken nawadwad a kinabaknang.
Impalubos ti Apo a masubok ti pammati ni Job. Napadasan ni Job dagiti naririgat a banag.
Maysa nga aldaw adu kadagiti ayup ni Job ti natakaw. Idi agangay inuram ti apuy ti amin a sanikua ni Job ken napapatay ti amin nga adipenna ken dadduma pay nga ayupna. Kalpasanna rinebba ti maysa a bagyo ti balay ti anak a lalaki ni Job. Adda dagiti annak ni Job iti uneg, ket natayda amin. Awan ti nabati ken ni Job ken ti asawana no di laeng ti salun-atda.
Nagladingit ni Job ken ti asawana. Napukawda ti amin a banag, uray pay dagiti annakda. Ngem adda pay laeng pammati ni Job iti Apo. Saanna a pinabasol ti Apo iti napasamak.
Kalpasanna nagbalin a masaksakit unay ni Job. Nakaluban ti bagina iti naut-ot a busbusali. Nasdaaw ni Job ken ti asawana no apay a mapaspasamak amin dagitoy a dakes a banag.
Kinasao ti Apo ni Job ket impakitana kenkuana ti daga, dagiti bituen, ken amin a nabiag a banag. Sinuruan ti Apo ni Job iti maysa a napateg a leksion. Naparsua ti amin a banag tapno matulongan dagiti annak ti Nailangitan nga Ama a masursuruan maipapan iti Anakna a ni Jesucristo ken mangsurot Kenkuana.
Nagbabawi ni Job ket indawatna iti Apo a pakawanenna daytoy iti panagduaduana. Inkarina nga agtalek iti Apo. Ammo ti Apo nga ipatpateg ni Job Isuna. Inagasanna ni Job ket binendisionanna iti ad-adu pay nga annak ken mamindua a kinawadwad ti sigud a kinabaknangna.