“Da Abraham ken Isaac,” Dagiti Estoria iti Daan a Tulag (2022)
“Da Abraham ken Isaac,” Dagiti Estoria iti Daan a Tulag
Genesis 17; 21–22
Da Abraham ken Isaac
Maysa nga ama, maysa nga anak, ken maysa a sakripisio
Naaddaan iti maysa a maladaga a lalaki da Abraham ken Sara, kas iti inkari ti Apo. Pinanagananda iti Isaac.
Inayatda ni Isaac. Sinuruanda nga agpili iti umno ken agtalek iti Apo.
Inkari ti Apo kada Abraham ken Sara a babaen ken ni Isaac dumakkelto ti pamiliada a mangbendision iti intero a daga. Ngem maysa nga aldaw imbaga ti Apo ken ni Abraham nga ipanna ni Isaac iti Bantay Moria ket idatonna ni Isaac kas maysa a sakripisio.
Iti dalanda a mapan iti bantay, sinaludsod ni Isaac no sadino ti kordero nga isakripisio. Kinuna ni Abraham a mangtedto ti Apo iti maysa.
Iti Bantay Moria, nangbangon ni Abraham iti altar ket nangikabil kadagiti kayo iti daytoy.
Kas iti imbilin ti Apo, indawat ni Abraham ken ni Isaac nga agidda iti rabaw ti altar. Nagtalek ni Isaac ken ni Abraham kas iti panagtalek ti Mangisalakan a ni Jesucristo Iti Amana.
Idi rugian ni Abraham nga isakripisio ni Isaac, pinagsardeng ti anghel ti Apo. Impakita ni Abraham ti pammatina iti Apo. Ammo ni Abraham a kanayon a surotenna ti Apo.
Timmangad ni Abraham ket nakitana ti maysa a karnero a naisalat iti kakaywan. Nangipaay ti Apo iti karnero para iti sakripisio.
Naammuan da Abraham ken Isaac no kasano nga idaton ti Nailangitan nga Ama ti Anakna a ni Jesucristo kas maysa a sakripisio. Nagtalek ni Apo Jesucristo ken ni Abraham gapu ta nagtungpal. Nagtalek ni Abraham iti kari ti Apo nga iti maysa nga aldaw dumakkelto ti pamiliana a nalablabes iti bilang dagiti bituen iti tangatang.