“Ni Jacob ken ti Pamiliana,” Dagiti Estoria iti Daan a Tulag (2022)
“Ni Jacob ken ti Pamiliana,” Dagiti Estoria iti Daan a Tulag
Genesis 27–33
Ni Jacob ken ti Pamiliana
No kasano a tungpalen ti Apo dagiti karina
Pinanawan ni Jacob ti pagtaenganna tapno maliklikanna ti makagura a kabsatna a ni Esau. Ni Jacob binendisionan ti amana a mangsapul ken mangikallaysa iti maysa a babai a mangipatpateg iti Apo ken agtungpal kadagiti bilinna.
Bayat ti panagdaliasat ni Jacob, simmarungkar ti Apo kenkuana iti maysa a parmata. Inkarina a kanayon a kaduaenna ni Jacob. Inkari ni Jacob nga itedna iti Apo iti apagkapullo ti amin nga inawatna.
Inkari ti Apo ken ni Jacob a maaddaanto iti adu nga annak. Babaen kadagiti annak ni Jacob, mabendisionanto dagiti pamilia iti daga a makaam-ammo iti Mangisalakan. Maawagan a balay ti Israel ti pamilia ni Jacob iti ud-udina nga aldaw.
Genesis 28:3–4, 14; 1 Nephi 10:14
Nagbaniaga ni Jacob iti maysa a daga a maawagan iti Haran. Idiay a nagayat iti maysa a nalinteg a babai nga agnagan iti Raquel.
Immanamong ni Jacob nga agtrabaho iti pito a tawen para iti amana, ni Laban, no palugodan ni Laban ni Jacob a mangikallaysa ken ni Raquel. Immanamong ni Laban. Nagtrabaho ni Jacob iti pito a tawen.
Ngem kayat ni Laban a ni Lea, ti inauna a babai nga anakna, ti umuna nga agkallaysa. Kabayatan ti kallaysa, inallilaw ni Laban ni Jacob ket impakallaysana ketdi ni Lea kenkuana. Ngem ay-ayaten ni Jacob ni Raquel. Inkarina nga agtrabaho iti sabali pay a pito a tawen no mabalinna pay nga ikallaysa daytoy. Immanamong ni Laban, ket nangrugi a dimmakkel ti pamilia ni Jacob.
Genesis 29:28–35; 30:3–13, 17–24; Jacob 2:27–30
Saan a binayadan ni Laban ni Jacob iti rumbeng. Ngem binendisionan ti Apo ni Jacob iti adu nga ayup ken imbagana ken ni Jacob nga agsubli iti pagtaenganna.
Genesis 30:31, 43; 31:1–7, 17–18
Iti dalanna nga agawid, naammuan ni Jacob a dumteng ti kabsatna a ni Esau ken ti 400 a lallaki a sumabat kenkuana.
Impagarup ni Jacob a mabalin a makagura pay laeng ni Esau kenkuana. Nagbuteng ni Jacob para iti talged ti pamiliana, isu nga impanna ida iti natalged a lugar ket nagkararag.
Nagkararag ni Jacob iti agpatnag ken agingga iti agsapa. Sinarungkaran ti Apo ni Jacob ket binendisionanna daytoy. Imbaga ti Apo ken ni Jacob nga agbalinto a naindaklan a dadaulo iti adu. Binalbalbaliwan ti Apo ti nagan ni Jacob iti Israel.
Saan a nabayag nasarakan ni Esau ken dagiti taona ni Jacob ken ti pamiliana. Saanen a kagura ni Esau ni Jacob. Nagtaray daytoy a sumabat ken ni Jacob ket inarakupna. Kasta unay ti ragsakna a makakita kenkuana ken mangam-ammo iti pamiliana. Naragsakan ni Jacob a makakita manen ken ni Esau.
Tinungpal ti Apo dagiti karina ken ni Jacob iti unos ti biagna. Simmangpet ni Jacob iti pagtaengan a kaduana ti pamiliana ket nagindegda idiay. Manipud idin, naawagan ni Jacob iti Israel, ket naawagan ti pamiliana a dagiti Israelita. Intuloyna ti nagtungpal kadagiti bilin ken nagdaydayaw iti Apo.