“Ni Jose ken ti Panagbisin,” Dagiti Estoria iti Daan a Tulag (2022)
“Ni Jose ken ti Panagbisin,” Dagiti Estoria iti Daan a Tulag
Ni Jose ken ti Panagbisin
Gundaway ti maysa a kabsat a lalaki a mamagkaykaysa iti pamiliana
Nabisinan ti pamilia ni Jacob gapu iti panagbisin. Isu nga imbaon ni Jacob dagiti annakna a lallaki a gumatang iti taraon iti Egipto. Imbatina ti inaudi nga anakna, ni Benjamin, iti pagtaenganda. Nagbuteng a mapukawna ni Benjamin kas iti pannakapukawna iti anakna a ni Jose adun a tawen ti napalabas kasakbayanna. Saanna nga ammo nga inlako dagiti in-inauna nga annakna ni Jose kas maysa nga adipen.
Iti daytoy a gundaway, maysa a naindaklan a dadaulo ni Jose iti Egipto. Isu ti agrebbeng iti panaglako iti taraon kabayatan ti panagbisin. Naam-ammo dagiti kakabsat a lallaki ni Jose ket nagkiddawda kenkuana iti taraon. Saanda a nailasin daytoy.
Nailasin ida ni Jose, ngem naginkukuna a saanna nga am-ammo ida. Dinamagna maipapan iti pamiliada tapno ammuenna no sibibiag ti amana ken ti kabsatna a ni Benjamin.
Kalpasanna inikkan ni Jose iti taraon dagiti kakabsatna. Imbagana kadakuada a saanda nga agsubli para iti ad-adu pay a taraon malaksid no ikuyogda ti inaudi a kabsatda, ni Benjamin.
Idi maibusan manen ti pamilia iti taraon, ammo ni Jacob a nasken nga ipakuyogna ni Benjamin kadagiti dadduma pay nga annakna nga agsubli iti Egipto. Nagbuteng pay laeng ni Jacob maipapan iti panangpalubosna a mapan ni Benjamin. Ngem inkari ni Juda, maysa kadagiti agkakabsat, a saluadanna ni Benjamin.
Idi agsubli dagiti agkakabsat iti Egipto, pinagparang ni Jose a kasla tinakaw ni Benjamin ti pirak a kopa. Kayatna a makita no nagbalbaliwen dagiti kakabsatna. Impakaasi ni Juda a saanna a dusaen ni Benjamin no di ketdi ni Juda ti dusaenna.
Maragsakan ni Jose a makita a nagbalbaliwen dagiti kakabsatna. Umdas nga inayatda ni Benjamin a mangsaluad kenkuana. Isu nga iti kamaudiananna, imbaga ni Jose kadakuada ti kinasiasinona.
Pinakawan ni Jose dagiti kakabsatna iti panangilakoda nga agbalin nga adipen. Kinuna ni Jose a wagas ti Apo a mangtulong iti pamiliada a makalasat iti panagbisin.
Nagsubli dagiti kakabsat ni Jose iti amada, ni Jacob, ket imbagada kenkuana ti amin a napasamak. Inyakar ni Jacob ti sibubukel a pamiliana iti Egipto
Pinasangbay ni Faraon ti pamilia ni Jacob. Inikkanna ida iti daga ken ayup tapno maaddaanda iti adu a taraon. Nagbiag ti pamilia ni Jacob iti kappia iti uneg ti napaut a panawen.