“Ni Moises iti Bantay Sinai,” Dagiti Estoria iti Daan a Tulag (2022)
“Ni Moises iti Bantay Sinai,” Dagiti Estoria iti Daan a Tulag
Exodo 19–20; 24; 31–34; Deuteronomio 4–7
Ni Moises iti Bantay Sinai
Panangtulong kadagiti tao a manglagip iti Apo
Nagdaliasat ni Moises ken dagiti Israelita iti let-ang. Nakadanonda iti maysa a bantay a maawagan iti Bantay Sinai.
Immuli ni Moises iti bantay a makisarita iti Apo. Imbaga ti Apo ken ni Moises a kayatna a kasarita dagiti israelita iti rupanrupa.
Nakadanon dagiti Israelita iti sakaanan ti Bantay Sinai, ket pinagulep ti Apo iti aglawlaw ti bantay. Adda ti Apo iti ulep. Kinasaona dagiti Israelita ken inikkanna ida kadagiti bilin. Nagkintayeg ti bantay bayat ti panagsaritana.
Exodo 19:16–19; 20:1–17; Deuteronomio 4:12–13, 33; 5:4–5
Nagbuteng dagiti Israelita. Indawatda ken ni Moises a makisao iti Apo tapno maibaga ni Moises kadakuada no ania ti kayat ti Apo.
Inkuyog ni Moises ni Aaron ken ti 70 a panglakayen nga Israelita iti bantay tapno umawat iti ad-adu pay a pannursuro ti Apo. Nagparang kadakuada ti Apo.
Kalpasanna imbaga ti Apo ken ni Moises a panawanna dagiti panglakayen ket umuli iti nangatngato pay a paset iti bantay. Nagtungpal ni Moises. Inusar ti Apo ti ramayna a mangisurat iti linteg ken dagiti bilinna kadagiti lapida a bato. Iti uneg ti 40 nga aldaw, insuro ti Apo ken ni Moises ti adu a banag.
Bayat ti kaadda ni Moises iti Bantay Sinai, nabannog dagiti tao ti Israel nga agur-uray kenkuana. Imbagada ken ni Aaron nga agaramid kadagiti estatua a pagdaydayawanda kas iti adda kadakuada idi sadiay Egipto. Inummong ni Aaron ti amin a balitok ket nagaramid iti estatua ti maysa a baka.
Nagdaydayaw dagiti Israelita iti balitok a sinan-urbon a baka ket nagidatonda kadagiti sakripisio. Kinunada a ti balitok a sinan-urbon a baka, nga saan ket a ti Apo, ti nangwayawaya kadakuada manipud iti Egipto.
Ammo ti Apo nga agdaydayaw dagiti Israelita iti maysa a didiosen ken liplipatanda Isunan. Binilinna ni Moises nga agsubli ket ibagana kadagiti tao nga agbabawida.
Simmalog ni Moises manipd iti Bantay Sinai ket nakitana dagiti Israelita nga agdaydayaw iti balitok a sinan-urbon a baka. Kasta unay ti pannakaupayna. Saan a nakasagana dagiti tao nga agtungpal iti linteg ken dagiti bilin nga insurat ti Apo. Binuong ni Moises dagiti lapida ken dinadaelna ti balitok a sinan-urbon a baka. Tinulonganna dagiti Israelita nga agbabawi ken manglagip iti pudno a Diosda.
Indawat ni Moises iti Apo a pakawanenna dagiti Israelita ken mangaramid manen kadagiti kari kadakuada. Inkari ni Moises nga idauluan ken isurona ida.
Indawat ti Apo ken ni Moises nga agaramid kadagiti baro a lapida a bato ket agsubli iti Bantay Sinai. Nagaramid ti Apo iti baro a kari kadagiti Israelita ket intedna kadakuada ti Sangapulo a Bilinna.