“Ni Daniel ken ti Tagtagainep ti Ari,” Dagiti Estoria iti Daan a Tulag (2022)
“Ni Daniel ken ti Tagtagainep ti Ari,” Dagiti Estoria iti Daan a Tulag
Daniel 2
Ni Daniel ken ti Tagtagainep ti Ari
Ti datdatlag a mensahe ti Dios iti maysa nga ari
Adda tagtagainep ti ari ti Babilonia a nangburibor kenkuana. Kinalikagumanna nga ibaga dagiti saserdotena ken mamasirib a lallaki kenkuana no ania ti kayat a sawen ti tagtagainep.
Saan nga ibaga ti ari kadakuada ti tagtagainep. Kinunana a no talaga nga adda bileg dagiti saserdote ken mamasirib a lallaki, maibagada kenkuana no ania ti tagtagainep ken no ania ti kayatna a sawen.
Imbaga dagiti saserdote ken mamasirib a lallaki iti ari a saanda a maipatarus ti tagtagainepna no saanna nga ibaga kadakuada no ania daytoy. Kinunada nga awan ti tao a makaaramid iti dayta. Nagpungtot ti ari ken kinunana a papatayenna ti amin a mamasirib a lallaki iti pagarian, a pakairamanan ni Daniel ken dagiti gagayyemna.
Idi immay dagiti guardia ti ari a mangala ken ni Daniel ken dagiti gagayyemna, nagkiddaw ni Daniel iti ad-adu pay a panawen tapno maibagana iti ari no ania ti kayat a sawen ti tagtagainepna. Ammo ni Daniel nga ammo ken makita ti Dios ti amin a banag, uray dagiti tagtagainep. Indawat ni Daniel kadagiti gagayyemna a makipagkararagda kenkuana.
Impakita ti Dios ken ni Daniel ti tagtagainep ti ari iti maysa a parmata ket insurona ken ni Daniel no ania ti kaipapanan daytoy. Nagyaman ni Daniel iti Dios iti panangsungbatna kadagiti kararagna ken dagiti gagayyemna ken iti panangisalakanna iti biagda. Kalpasanna napanna imbaga iti ari ti kaipapanan ti tagtagainep.
Kinuna ni Daniel a ti tagtagainep ti ari maipapan iti higante nga estatua a dinadael ti bato a natikap iti bantay. Ibagi ti estatua dagiti pagarian iti daga. Ibagi ti bato a natikap iti bantay ti pagarian ti Dios a mangpunnonto iti daga. Ammo ti ari a nagsao ni Daniel iti kinapudno.