“Ni Samuel a Propeta,” Dagiti Estoria iti Daan a Tulag (2022)
“Ni Samuel a Propeta,” Dagiti Estoria iti Daan a Tulag
1 Samuel 2–3
Ni Samuel a Propeta
Maysa nga ubing a lalaki nga inawagan ti Apo
Iti atiddog a panawen, awanan dagiti Israelita iti maysa a propeta ti Apo a mangidaulo kadakuada. Ketdi, nagturay dagiti ukom iti Israel iti uneg ti adu a tawen. Kabayatan daytoy a panawen, impan ni Anna ti ubing nga anakna a ni Samuel nga agyan ken ni Eli, ti saserdote ken ukom ti Israel. Tinulongan ni Samuel ni Eli iti templo.
Nagserbi met ti dua nga annak a lallaki ni Eli iti templo, ngem nagtakawda kadagiti daton a naisangrat para iti Apo. Nagreklamo dagiti sumagmamano a tao ken ni Eli, ngem saan a dinusa ida ni Eli.
Maysa a rabii nangngeg ni Samuel ti maysa a timek nga umaw-awag kenkuana. Impagarupna a ni Eli daytoy, isu a napan ni Samuel kenkuana. Ngem saan a ni Eli ti immawag kenkuana. Imbaga ni Eli ken ni Samuel nga agsubli iti iddana.
Nangngeg ni Samuel ti timek nga umaw-awag kenkuana iti maikadua a gundaway. Napan ken ni Eli ket sinaludsodna no ania ti kayatna. Ngem saan a ni Eli ti immawag kenkuana. Imbaga ni Eli ken ni Samuel a mapan iti iddana.
Nangngeg ni Samuel ti timek nga umaw-awag kenkuana iti maikatlo a gundaway. Napan manen ken ni Eli ket sinaludsodna no ania ti kayatna. Daytoy a kanito, ammo ni Eli a ti Apo ti makisasao ken ni Samuel. Imbaga ni Eli ken ni Samuel nga agsubli iti iddana. Kinuna ni Eli a no umawag manen ti Apo, nasken a dumngeg ni Samuel.
Nangngeg ni Samuel ti timek nga umaw-awag manen kenkuana. Daytoy a kanito indawat ni Samuel iti Apo nga agsarita ket kinunana a dumngeg daytoy. Imbaga ti Apo ken ni Samuel a biddut ken ni Eli a mangpalubos kadagiti nadangkes nga annakna a lallaki nga agserbi iti templo. Saanen a mapalubosan ti pamilia ni Eli nga agserbi pay iti templo.
Iti kabigatanna, sinaludsod ni Eli ken ni Samuel no ania ti kinuna ti Apo. Imbaga ni Samuel kenkuana. Ammo ni Eli a nagsao ti Apo babaen ken ni Samuel.
Naipakaammo ti damag iti intero a daga ti Israel. Ammo dagiti tao a pinili ti Apo ni Samuel nga agbalin a propetana.