“Ti Pannakaparsua ti Lubong,” Dagiti Estoria iti Daan a Tulag (2022)
“Ti Pannakaparsua ti Lubong,” Dagiti Estoria iti Daan a Tulag
Genesis 1–2; Moises 1–3; Abraham 3–5
Ti Pannakaparsua ti Lubong
Maysa a napintas a pagtaengan para kadagiti annak ti Nailangitan nga Ama
Indatag ti Dios ti Nailangitan nga Amatayo ti plano ti pannakaisalakan iti langit. Nagpukkawtayo amin ti rag-o! Kabaelantayo ti umay iti daga nga umawat iti pisikal a bagi. Bayat ti kaaddatayo iti daga, masursurotayo ti sumurot iti Anak ti Dios, ni Apo Jesucristo. Pinarsua ti Apo ti daga a nangsursurot kadagiti panangiturong ti Dios.
Genesis 1:1; Job 38:4–7; Moises 1:32–33; 2:1; Abraham 3:22–27
Iti umuna nga aldaw, pinagsina ti Apo ti lawag manipud iti sipnget. Inawaganna ti lawag iti aldaw ken ti sipnget iti rabii.
Genesis 1:3–5; Moises 2:3–5; Abraham 4:1–5
Iti maikadua nga aldaw, pinagsinana dagiti danum kadagiti ulep iti tangatang ken dagiti taaw iti daga.
Genesis 1:6–8; Moises 2:6–8; Abraham 4:6–8
Iti maikatlo nga aldaw, binukel ti Apo dagiti dadakkel a taaw ken namaga a daga. Ninagananna dagiti danum iti baybay ken ti namaga a daga iti daga. Inaramidna ti daga a napintas nga addaan sabsabong, bungbunga, mulmula, ken kaykayo.
Genesis 1:9–13; Moises 2:9–13; Abraham 4:9–13
Iti maikapat nga aldaw, pinarsuana ti init nga agraniag kabayatan ti aldaw. Kalpasanna pinarsuana ti bulan ken dagiti bituen nga agraniag iti rabii.
Genesis 1:14–19; Moises 2:14–19; Abraham 4:14–19
Iti maikalima nga aldaw, inaramid ti Apo dagiti ikan iti baybay ken dagiti tumatayab iti tangatang. Binendisionanna dagiti parsua nga umadu ken binendisionanna dagiti ikan a mangpunno kadagiti danum.
Genesis 1:20–23; Moises 2:20–23; Abraham 4:20–23
Iti maikanem nga aldaw, pinarsuana dagiti ayup iti daga, sumagmamano ti magna ken sumagmamano ti agkarayam.
Genesis 1:24–25; Moises 2:24–25; Abraham 4:24–25
Bimmaba ti Nailangitan nga Ama ken ti Apo iti daga iti maikanem nga aldaw. Naparsua ti lalaki ken babai iti ladawan ti Dios. Imbaga ti Nailangitan nga Ama kadakuada a mangaywan iti tunggal maysa ken maaddaan iti annak. Naitalek pay iti lalaki ken babai a mangaywan iti daga ken dagiti ayup.
Genesis 1:26–27; Moises 2:26–27; Abraham 4:26–31; 5:7–8
Naragsakan ti Nailangitan nga Ama iti amin a banag a pinarsuada. Iti maikapito nga aldaw, naginanada iti amin nga aramidda. Napintas ti daga ken napno iti biag.