“Ni Jose iti Egipto,” Dagiti Estoria iti Daan a Tulag (2022)
“Ni Jose iti Egipto,” Dagiti Estoria iti Daan a Tulag
Ni Jose iti Egipto
Agbalin ti maysa nga adipen a maysa a dadaulo
Nailako ni Jose kas maysa nga adipen iti maysa a lalaki nga agnagan iti Potifar. Nagtrabaho ni Potifar para ken ni Faraon, ti agturay iti Egipto. Maibaga ni Potifar a tinulongan ti Apo ni Jose. Nagtalek ken ni Jose ket insaadna nga isu ti mangasikaso iti balayna ken iti amin a banag a sanikuana.
Magustuan ti asawa ni Potifar ni Jose. Kayatna a labsingen ni Jose dagiti bilin ti Apo kenkuana. Imbaga ni Jose kenkuana a saan.
Saan a dumngeg ti asawa ni Potifar, isu a timmaray nga umadayo ni Jose. Nakagura daytoy ken ni Jose.
Impakitana ken ni Potifar ti maysa a kawes ni Jose. Nagulbod ken ni Potifar maipapan ken ni Jose. Impupok ni Potifar ni Jose iti pagbaludan.
Naisina ni Jose manipud iti pamiliana. Nagbalin idi a maysa nga adipen, ket ita maysan a balud. Ngem tinulongan pay laeng ti Apo ni Jose. Saan a simmuko ni Jose. Binendisionan ti Apo ti agbambantay iti pagbaludan tapno makitana ti kinasayaat ken ni Jose. Nagrugi a nagtalek kenkuana ti agbambantay, isu nga impanna ni Jose nga agaywan iti dadduma pay a balud.
Naam-ammo ni Jose ti dua a balud, maysa nga agtintinapay ken maysa nga mamakpakan, a nagtrabaho para ken ni Faraon. Naaddaanda iti naidumduma a tagtagainep. Babaen iti bileg ti Apo, inlawlawag ni Jose no ania ti kaipapanan dagiti tagtagainepda. Kaipapanan ti tagtagainep ti mamakpakan a mawayawayaanto ti mamakpakan. Kalpasan ti tallo nga aldaw, nawayawayaan daytoy tapno agtrabaho manen para ken ni Faraon.
Maysa nga aldaw naburiboran ni Faraon kadagiti tagtagainepna. Awan ti makaibaga no ania ti kaipapanan dagiti tagtagainepna.
Kalpasanna nalagip ti mamakpakan a makailawlawag ni Jose kadagiti tagtagainep.
Nairuar ni Jose iti pagbaludan tapno mangilawlawag kadagiti tagtagainep ni Faraon. Kinuna ni Jose a kaipapanan dagiti tagtagainep nga addanto pito a tawen a nawadwad ti taraon iti Egipto a sarunuen ti pito a tawen a panagbisin a nakisang unay ti taraon. Imbaga ni Jose ken ni Faraon a nasken nga agurnong ti Egipto iti taraon kabayatan dagiti nasayaat a tawen.
Ammo ni Faraon a pudno ti kinuna ni Jose maipapan kadagiti tagtagainepna. Winayawayaanna ni Jose manipud iti pagbaludan ket pinagbalinna a naindaklan a dadaulo iti Egipto. Iti uneg ti pito a tawen, timmulong ni Jose iti Egipto a nagurnong iti sobra pay a taraon.
Kalpasanna dimteng ti panagbisin. Bayat daytoy a panawen, awan ti makapadakkel iti ania man a taraon. Nagbaniaga dagiti tao iti Egipto tapno gumatang iti taraon nga inurnong ni Jose. Gapu ken ni Jose, nakaurnong dagiti Egipsio iti umdas a taraon a mangtulong kadakuada ken iti dadduma pay a makalasat iti panagbisin.