“Ni Debora a Propeta a Babai,” Dagiti Estoria iti Daan a Tulag (2022)
“Ni Debora a Propeta a Babai,” Dagiti Estoria iti Daan a Tulag
Ni Debora a Propeta a Babai
Nagtalek iti Apo ti maysa a dadaulo a nangtulong iti Israel
Maysa a propeta a babai ni Debora, napudno a dadaulo nga Israelita a pinaregta ti Apo. Nagsardeng dagiti taona a nagtungpal kadagiti bilin ti Apo, ket nagturay dagiti Cananeo kadakuada. Kalpasan ti duapulo a tawen, nagrugi a nagkararag dagiti Israelita para iti tulong ti Apo.
Dinengngeg ti Apo dagiti kararagda. Imbagana ken ni Debora a mangummong iti maysa a buyot dagiti Israelita a makiranget kadagiti Cananeo.
Aduan ti buyot a Cananeo iti soldado ken karosa. Daytoy ti namagbuteng iti buyot nga Israelita, ngem saan ken ni Debora. Ammona a tulonganto ti Apo ida.
Ni Barac ti dadaulo ti buyot nga Israel. Saanna a kayat ti makiranget. Ngem napanunotna a no mapan ni Debora a kadua ti buyot, saluadan ti Apo ida. Immanamong ni Debora a mapan. Impadtona nga abaken ti maysa a babai ni Sisara, ti dadaulo ti buyot a Cananeo.
Naguummong ti buyot nga Israelita iti maysa a bantay, ket naguummong dagiti Cananeo iti tanap. Imbaga ni Debora ken ni Barac a sumalog manipud iti bantay. Inkarina nga addanto ti Apo kadakuada.
Nangipatulod ti Apo iti tudo, ket nayanud dagiti karosa dagiti Cananeo iti danum. Adu dagiti Cananeo ti nalmes iti karayan, ngem naglibas ni Sisara.
Uk-ukom 4:15, 17; 5:4–5, 19–22
Agnaed ti maysa a babai nga agnagan iti Jael iti maysa a tolda iti asideg. Nakitana ni Sisara nga agtartaray ket imbagana kenkuana nga aglemmeng iti toldana. Ammo ni Jael a maysa isuna a dadaulo ti buyot a Cananeo ket pinapatayna isuna tapno saan a makadangran iti ad-adu pay a tattao.
Pimmudno ti padto ni Debora. Inatiw ti maysa a banuar a babai ni Sisara. Nagkanta ni Debora iti maysa a kansion a mangtulong kadagiti Israelita a manglagip no kasano nga insalakan ida ti Apo. Tinungpal dagiti Israelita dagiti bilin ket nagbiagda iti kinatalna iti uneg ti 40 a tawen.