“Ti Fiesta ti Paskua,” Dagiti Estoria iti Daan a Tulag (2022)
“Ti Fiesta ti Paskua,” Dagiti Estoria iti Daan a Tulag
Ti Fiesta ti Paskua
Sinaluadan ti Apo
Saan nga impalubos ni Faraon a mawayawayaan dagiti Israelita, isu nga imbaga ti Apo ken ni Moises nga ibaonna ti maysa a maudi nga angol. Matayto ti inauna nga anak ti tunggal pamilia iti daga ti Egipto, uray ti umuna nga anak dagiti ayupda.
Inkari ti Apo a no suroten dagiti Israelita dagiti alagadenna, aglabasto kadakuada ti angol wenno didigra ket saanda a madangran.
Imbaga ti Apo iti tunggal pamilia nga Israelita a mangisakripisio iti maysa a lalaki a kordero nga awan pakapilawanna ket ipintada ti dara ti kordero iti bautek dagiti balayda.
Imbaga ti Apo kadagiti Israelita nga iluto ket sidaenda a dagus ti kordero. Kabayatan ti pannanganda, nasken a nakapellesda ken nakasaganadan a pumanaw kadagiti pagtaenganda. Kinuna ti Apo a no inaramid dagiti Israelita dagitoy a banag, agbalinto a natalged ti inauna nga anakda manipud iti didigra.
Kas iti imballaag ti Apo, dimteng ti didigra. Natay ti amin nga inauna nga anak iti Egipto, agraman ti inauna nga anak a lalaki ni Faraon. Ngem limmabas ti didigra iti tunggal pagtaengan nga adda dara ti kordero iti bautek. Naisalakan dagiti inauna nga anak dagiti Israelita gapu ta nagtungpalda iti Apo.
Idi makita ni Faraon a natayen ti bukodna nga anak a lalaki gapu iti daytoy nga angol, imbagana kada Moises ken Aaron nga alaenda amin nga Israelita ket pumanawda iti Egipto.
Pimmanaw dagiti Israelita, ngem nagpungtot ni Faraon. Inummongna ti buyotna ken dagiti karuahe ket kinamatda dagiti Israelita.
Nagkampo dagiti Israelita iti Nalabaga a Baybay. Iti saan a nabayag natiliw ida ni Faraon ken ti buyotna. Idi nakita dagiti Israelita a dumtengen dagiti Egipsio, nagbutengda. Ngem imbaga ni Moises kadagiti Israelita a salaknibanto ida ti Apo.
Idi umas-asidegen dagiti Egipsio, imbaga ti Apo ken ni Moises nga ibayogna ti sarukodna. Inaramid ni Moises, ket pinagsina ti Apo ti baybay. Binallasiw dagiti Israelita ti baybay iti namaga a daga. Intarayanda ni Faraon ken ti buyotna.
Kinamat ti buyot nga Egipsio dagiti Israelita. Idi natalgeden ti amin nga Israelita iti maysa pay a bangir ti baybay, pinababa ti Apo ti danum. Nalmes iti baybay ti buyot nga Egipsio.
Nawayawayaan dagiti Israelita iti kamaudiananna. Nagkansionda kadagiti kanta, nagsala, ken nagyamanda iti Apo. Kanayon a nalagipda ti Fiesta ti Paskua kas panawen idi insalakan ti Apo ti biagda ken inruarna ida iti Egipto.