“Ti Buyot ni Gideon,” Dagiti Estoria iti Daan a Tulag (2022)
“Ti Buyot ni Gideon,” Dagiti Estoria iti Daan a Tulag
Ti Buyot ni Gideon
Panagtalek iti Apo iti pagbabakalan
Naparaburan dagiti tao ti Israel iti uneg ti adu a tawen. Ngem kalpasanna pinilida ti agsukir iti Apo. Tapno matulongan ida a manglagip kenkuana, impalubos ti Apo nga alaen dagiti kabusorda a dagiti Midianita dagiti taraon ken ayupda. Mabisbisin dagiti Israelita, isu a nalagipda ti Apo ket nagkararagda Kenkuana para iti tulong.
Maysa a lalaki ni Gideon a naggapu iti nakurapay a pamilia. Nangibaon ti Apo iti maysa nga anghel a mangawag kenkuana a mangwayawaya iti Israel. Nasdaaw ni Gideon no apay nga isu ti pinili ti Apo.
Imbaga ti Apo ken ni Gideon a dadaelenna dagiti lugar a nagdaydayawan dagiti Israelita kadagiti palso a dios. Idi nagtungpal ni Gideon, nagpungtot dagiti tao.
Kayat dagiti Israelita a papatayen ni Gideon. Ngem kinumbinsi ida ti ama ni Gideon a saanda a dangran daytoy. Natalged ni Gideon.
Saan nga impagarup ni Gideon a mawayawayaanna ti Israel. Adda nasurok a 135,000 a soldado iti buyot a Midianita. Ngem inikkan ti Apo ni Gideon iti sirib ken pigsa.
Kayat ti Apo a maammuan dagiti Israelita a mangabakda nga addaan iti pigsana, saan a ti bukodda. Nupay addaan ti Israel iti 32,000 a soldado, indawat ti Apo ken ni Gideon a pagawidenna ti asino man a soldado a mabuteng. Kalpasan a nagawid ti 22,000, nabati dagiti Israelita iti 10,000 a soldado.
Kinuna ti Apo nga adu pay laeng a soldado ti bilang a 10,000. Imbagana ken ni Gideon a kuyogenna iti buyot a mapan iti danum. Mapagawid dagiti dagus nga uminum iti danum kadagiti ngiwatda. Mabati dagiti mangusar iti imada nga uminum iti danum. Ita nabati ti 300 laengen a lallaki.
Kamaudiananna, nakasagana dagiti Israelita a makiranget. Impakita ti Apo ken ni Gideon no kasano nga abaken dagiti Midianita. Imbaga ni Gideon iti buyotna nga agusarda kadagiti tangguyob ken lampara a mangbutbuteng kadakuada. Dagiti ringgor ken lawag ti nangtikaw unay kadagiti Midianita ta nagrugida a nagririnnanget iti tunggal maysa. Kalpasanna nagikkisda ket nagtarayda a pimmanaw.
Gapu ta nagtalek ni Gideon iti Apo, kinaranget dagiti Israelita ti dakkel a buyot a Midianita nga addaan laeng ti 300 a soldado. Winayawayaan ti Apo dagiti tao ti Israel.