“Abraham ken Sara,” Dagiti Estoria iti Daan a Tulag (2021)
“Abraham ken Sara,” Dagiti Estoria iti Daan a Tulag
Genesis 11–15; 17; Abraham 1–2
Abraham ken Sara
Maysa a kari a mangbendision iti pamilia ti tao
Nagnaed ni Abraham iti siudad ti Ur. Kinayat dagiti nadangkes a saserdote sadiay ti mangisakripisio kenkuana kadagiti didiosenda. Nagkararag ni Abraham, ket insalakan ti Apo isuna.
Kalpasanna imbilin ti Apo ken ni Abraham ken ti asawana a ni Sara a pumanawda iti Ur ket agbaniagada nga agturong iti maysa nga adayo a daga. Inkarina a bendisionanna ida iti panagdaliasatda.
Nagtalek da Abraham ken Sara iti Apo ket pimmanawda iti Ur. Ngem nariknada ti liday gapu ta dida kabaelan ti maaddaan iti annak. Liniwliwa ti Apo ida. Inkarina a maaddaandanto iti maysa nga anak.
Genesis 11:30–31; 15:1–6; 17:2–16; Abraham 2:6–9
Nagkararag ni Abraham iti Apo a mangammo iti ad-adu pay maipapan Kenkuana. Sinarungkaran ti Apo ni Abraham ket inawaganna ti Bagina iti Jehova. Nakitulag ni Jehova ken ni Abraham. Inkarina a maaddaanto ni Abraham iti priesthood. Inkarina pay a babaen ti pamilia ni Abraham, mabendisionanto amin a pamilia iti daga.
Kabayatan ti panagbaniaga da Abraham ken Sara, kasapulanda ti agbirok iti taraon. Pinadasda ti agnaed iti daga a naawagan iti Canaan. Awan ti taraon sadiay, isu a nasken a mapanda iti Egipto. Ngem napeggad para kadakuada ti panagnaed iti Egipto.
Genesis 12:10–20; Abraham 2:21–25
Pimmanaw da Abraham ken Sara iti Egipto ket nagsublida a nagnaed iti Canaan. Nangitugotda iti taraon ken ay-ayup manipud iti Egipto. Ti Canaan ket paset ti daga nga inkari ti Apo kadakuada.
Genesis 13:1–4, 12; Abraham 2:19
Kasta met a tinungpal ti Apo ti karina nga awatento ni Abraham ti priesthood. Maysa nga aldaw naam-ammo da Abraham ken Sara ti maysa a nalinteg nga ari nga agnagan iti Melchizedek. Nagbayad ni Abraham iti apagkapullo kenkuana.
Inawat ni Abraham ti priesthood manipud ken ni Melchizedek. Daytoy ti isu met laeng a priesthood nga inawat da propeta Adan ken Noe.
Patarus ti Joseph Smith, Genesis 14:36–40; Abraham 1:2–4; Doktrina ken Katulagan 84:14
Naragsak da Abraham ken Sara iti Canaan, ngem nagdanagda latta gapu ta awananda iti anak. Nasken nga agtalekda iti kari ti Apo a maysa nga aldaw dumakkelto ti pamiliada ken mangbendision iti intero a daga.