Exodo 4–5; 7–12

Dagiti Angol iti Egipto

Dagiti pili ni Faraon a maibusor iti Apo

Nagtalek ni Moises iti Apo ket nagsubli iti Egipto. Napan ni Moises ken ti kabsatna a ni Aaron ken ni Faraon ket kiniddawda kenkuana a mangwayawaya kadagiti Israelita ket pumanawda iti Egipto. Nagpungtot ken nagkedked ni Faraon. Pinilitna dagiti Israelita nga agtrabahoda a napaspasnek pay.

Exodo 4:10–16; 5:1–18

Gapu ta saan a dimngeg ni Faraon iti Apo, nailunod dagiti Egipsio kadagiti nakaam-amak nga angol. Umuna, nagbalin a dara ti amin a danum iti Egipto. Indawat manen ni Moises ken ni Faraon a wayawayaanna dagiti Israelita, ngem kinuna ni Faraon a saan.

Exodo 7:14–25

Sumaruno, nangibaon ti Apo kadagiti tukak iti Egipto. Addada iti amin a lugar. Kinuna ni Faraon a wayawayaanna dagiti Israelita no pumanaw dagiti tukak. Pinapanaw ti Apo dagiti tukak, ngem saan a winayawayaan ni Faraon dagiti Israelita. Kalpasanna nangibaon ti Apo kadagiti kuto ken ngilaw.

Exodo 8:1–32

Sumaruno, natay dagiti ayup ti talon dagiti Egipsio, ngem awan ti natay nga ayup dagiti Israelita. Kalpasanna naaddaan dagiti Egipsio kadagiti nasaem a busali iti bagbagida.

Exodo 9:3–12

Dimteng pay ti nakaro a didigra ti uraro ken apuy iti Egipto. Daytoy ti nakaigapuan ti nakaam-amak a pannakadadael.

Exodo 9:22–35

Saan latta a wayawayaan ni Faraon dagiti Israelita. Kalpasanna imbaon ti Apo dagiti dudon, ket kinnanda amin a taraon dagiti tao.

Exodo 10:12–20

Kalpasanna adda tallo nga aldaw ti kinasipnget. Kabayatan ti adu nga angol, inkari ni Faraon a wayawayaanna dagiti Israelita no agsardeng ti angol, ngem nagulbod iti tunggal kanito.

Exodo 10:21–23, 27

Kalpasan ti siam a nadumaduma nga angol, saan latta a wayawayaan ni Faraon dagiti Israelita. Imbaga ti Apo ken ni Moises nga umayto ti maysa pay a nakaam-ames nga angol. Tinarabay ken sinalakniban ti Apo dagiti Israelita kabayatan ti panangur-urayda iti pannakawayawayada.

Exodo 11:4–7; 12:1–13