“Adan ken Eva,” Dagiti Estoria iti Daan a Tulag (2022)
“Adan ken Eva,” Dagiti Estoria iti Daan a Tulag
Genesis 2–3; Moises 3–5; Abraham 5
Da Adan ken Eva
Pananggun-od iti padas babaen ti panagaramid kadagiti pili
Da Adan ken Eva ti immuna nga annak ti Nailangitan nga Ama a nagnaed ditoy daga. Nagnaedda iti napintas a Minuyongan ti Eden, a nalikmutan iti amin a kita dagiti mulmula ken kaykayo. Sinarungkaran ken kinasao ida ti Dios ti Nailangitan nga Amatayo ken ni Apo Jesucristo.
Genesis 2:8–9; 3:8; Moses 3:8–9; Abraham 5:8, 14–19
Impalubos ti Dios a manganda iti bunga ti tunggal kayo malaksid iti maysa. No manganda iti bunga ti kayo ti pannakaammo iti naimbag ken dakes, nasken a pumanawda iti minuyongan ket mataydanto iti kamaudianan. Nagulbod ni Satanas kada Adan ken Eva. Kinuna ni Satanas no manganda iti bunga, ammodanto ti naimbag ken dakes, ngem saandanto a matay.
Genesis 2:16–17; 3:1–5; Moises 3:9; 4:6–11; Abraham 5:9, 12–13
Pinili ni Eva a mangan iti bunga.
Inikkan ni Eva ni Adan iti sumagmamano a bunga. Pinilina met ti mangan iti daytoy.
Sinarungkaran ida ti Dios ken ti Apo, ngem nagbuteng ken naglemmeng da Adan ken Eva. Sinaludsod ti Dios kadakuada no nanganda iti bunga ti kayo ti pannakaammo iti nasayaat ken dakes.
Imbaga da Adan ken Eva iti Dios a pinilida ti mangan iti bunga. Gapu iti pilida, nasken a panawanda ti Minuyongan ti Eden. Naisinada manipud iti Dios, ngem adda planona para kadakuada. Ita ammodan ti umno manipud iti biddut ken mabalindan ti maaddaan iti annak.
Genesis 3:16–24; Moises 4:15–31
Inkari da Adan ken Eva ti agtungpal kadagiti amin a bilin ti Dios. Nasuruanda nga agaramid kadagiti sakripisio nga ayup. Idi nagtungpalda, nasursuroda ti ad-adu pay maipapan iti Anak ti Dios a ni Jesucristo. Agpada a nariknada ti nalaus a rag-o gapu ta Isu ti mangtulong iti pamiliada nga agsubli iti Dios.