“David ken Goliat,” Dagiti Estoria iti Daan a Tulag (2022)
“David ken Goliat,” Dagiti Estoria iti Daan a Tulag
1 Samuel 17
David ken Goliat
Panangsango iti karit iti higante
Dagiti Filisteo a mangdardarup kadagiti Israelita. Tunggal bigat kinarit ti higante a Filisteo nga agnagan iti Goliat ti ania man nga Israelita a makiranget kenkuana. Dakdakkel ken nataytayag ni Goliat ngem iti asino man, ken narungsot daytoy. Nagkawes daytoy iti napuskol a kabal ken nakasakbit iti maysa nga espada, gayang, ken dakkel a kalasag. Awan ti agtured a makiranget kenkuana.
Maysa nga agtutubo a pastor ni David nga addaan iti pammati iti Apo. Soldado dagiti in-inauna a kakabsatna a lallaki iti buyot ti Israel. Maysa nga aldaw, inyalaan ni David iti sumagmamano a taraon dagiti kakabsatna a lallaki. Idi nakadanon iti kampo ti buyot, nangngegna ti karit ni Goliat.
Sinaludsod ni David kadagiti soldado no apay nga awan ti nangsalaknib iti Israel. Nagpungtot dagiti kakabsatna a lallaki ket imbagada kenkuana a mapan agaywan kadagiti karnero. Ngem ammo ni David a salaknibanto ti Apo ti Israel.
Ammo ni Ari Saul ti pammati ni David, isu nga indawatna a makita ni David. Imbaga ni David ken ni Saul a saan a mabuteng a makiranget ken ni Goliat. Inlawlawag ni David nga iti naminsan idi inay-aywananna dagiti karnerona, napatayna ti maysa a leon ken maysa nga oso. Sinalakniban ti Apo isuna idi, ket ammo ni David a ti Apo ti mangsalaknib kenkuana ita.
Inted ni Saul ti kabalna ken ni David. Ngem saan nga umanay kenkuana, isu nga inuksob ni David daytoy. Inkeddengna ti makiranget nga awan ti ania man a kabal.
Nangurnong ni David iti lima a nalinis a batbato ket inkabilna dagitoy iti maysa a supot. Innalana ti palsiitna ken ti sarukod ti pastor ket napanna sinango ni Goliat.
Idi nakita ni Goliat ni David, nagpukkaw ket inumsina daytoy. Kinunana a saan a maabak isuna ti maysa a pastor nga ubing a lalaki. Impukkaw met ni David nga agtalek a ti Apo ti mangsaluad kenkuana! Kinuna ni David nga abakenna ni Goliat tapno maipakita iti kinaindaklan ti Apo.
Nagtaray nga immasideg ni David ken ni Goliat. Alisto nga impallatibongna ti bato babaen iti palsiitna. Nagdisso ti bato iti muging ni Goliat, ket nadalupo iti daga ti higante a lalaki. Tinulongan ti Apo ni David a mangabak ken ni Goliat nga awanan iti espada wenno kabal.
Idi nakita dagiti Filisteo a natayen ni Goliat, nagtarayda a sibubuteng. Nangabak dagiti Israelita iti dangadang. Nagtalek ni David iti Apo, ket sinalakniban ti Apo iti Israel.