“Jacob ken Esau,” Dagiti Estoria iti Daan a Tulag (2022)
“Jacob ken Esau,” Dagiti Estoria iti Daan a Tulag
Genesis 25–27
Jacob ken Esau
dua nga agkabsat a lallaki ken maysa a saguday ti pannakayanak
Addaan da Isaac ken Rebeca iti singin nga annak a lallaki. da Jacob ken Esau. Nalaing a managanup ni Esau. Nagbiag ni Jacob iti nanumo a biag ket simmurot iti Apo.
Immuna a nayanak ni Esau. Gagangay nga awaten ti inauna ti bendision ti saguday ti pannakayanak manipud iti amana. Kayat a sawen ti saguday ti pannakayanak nga isu ti mangidaulo iti pamilia ken addaan iti ad-adu a daga ken ayup a makatulong a mangaywan iti pamilia. Ngem ad-adda nga impateg ni Esau ti bagina ngem iti pamiliana, ken saanna a tinungpal dagiti nagannak kenkuana ken ti Apo.
Maysa nga aldaw nagsubli ni Esau manipud iti panaganup. Nabisinan unay ket impakaasina ken ni Jacob a pakanenna daytoy. Kayat ti Apo a maaddaan ni Jacob iti bendision ti saguday ti pannakayanak gapu ta saan a maikari ni Esau iti daytoy. Kiniddaw ni Jacob ken ni Esau a mangisukat kenkuana ti saguday ti pannakayanak para iti sumagmamano a taraon. Immanamong ni Esau ket insukatna ti saguday ti pannakayanakna ken ni Jacob.
Genesis 25:23, 29–34; Hebreo 11:20
Kayat da Rebeca ken Isaac no ania ti kasayaatan para kadagiti annakda. Nalidayda ta intuloy ni Esau ti nagaramid kadagiti banag a kayatna a saan ket a no ania ti kayat ti Apo.
Limmakay ken nagbulsek ni Isaac. Sakbay a natay, indawatna ken ni Esau nga aganup ken agluto iti ayup a kanen ken magustuana.
Ammo ni Rebeca a panawenen nga ited ni Isaac ti bendision ti saguday ti pannakayanak.
Indawat ni Rebeca ken ni Jacob a mangala iti dua nga ayup tapno mabalinna ti agluto iti makan sakbay nga agsubli ni Esau. Kalpasanna awatento ni Jacob iti bendision.
Nagkawes ni Jacob a kas Esau ket nangyeg iti makan ti amana. Inted ni Isaac ken ni Jacob ti bendision ti saguday ti pannakayanak. Idi nagsubli ni Esau, kasta unay ti pungtotna ken ni Jacob. Ngem naited ti saguday ti pannakayanak ken ni Jacob gapu ta tinungpalna dagiti bilin ti Apo ket saan a nagtungpal ni Esau.