“Dagiti Naparegta a Tagtagainep ni Jose,” Dagiti Estoria iti Daan a Tulag (2022)
“Dagiti Naparegta a Tagtagainep ni Jose,” Dagiti Estoria iti Daan a Tulag
Dagiti Naparegta a Tagtagainep ni Jose
Panangikarigatan ti maysa a pamilia nga agiinnayat
Inkararagan da Raquel ken Jacob iti uneg ti adu a tawen a maaddaanda iti anak a lalaki . Sinungbatan ti Apo dagiti kararagda idi nayanak ni Jose. Ni Jose ti paborito nga anak ni Jacob, ket inikkanna ni Jose iti naisangsangayan a kagay. Nagilem dagiti 10 nga in-inauna nga annak ni Jacob.
Idi agarup 17 ti tawen ni Jose, naaddaan iti naparegta a tagtagainep nga agur-urnong iti bukbukel iti taltalon a kaduana dagiti kakabsatna. Nagtindek dagiti binettek a bukbukel ni Jose. Ngem nagtamed dagiti binettek a bukbukel dagiti kakabsatna iti binettek ni Jose. Idi imbaga ni Jose kadagiti kakabsatna maipapan iti tagtagainepna, gimmurada kenkuana.
Idi agangay, naaddaan pay ni Jose iti maysa pay a naparegta a tagtagainep. Iti daytoy a tagtagainep, nagtamed kenkuana ti init, ti bulan, ken ti 11 a bituen. Imbaga ni Jose iti pamiliana maipapan iti tagtagainep. Kasla ipakita daytoy a tagtagainep nga agturayto ni Jose iti pamiliana. Ad-adda a nagpungtot dagiti kakabsat ni Jose kenkuana. Saanda a nagustuan dagiti tagtagainepna.
Maysa nga aldaw rimmuar iti pagtaengan dagiti kakabsat ni Jose a mangpakpakan kadagiti karnero. Imbaon ni Jacob ni Jose a mangkita kadakuada.
Sumagmamano a kakabsat ni Jose ti nagtarigagay a mangpatay kenkuana. Innalada ti kagay ni Jose ket impuruakda isuna iti maysa nga abot.
Idinto nga adda iti uneg ti abot ni Jose, nakita dagiti kakabsatna dagiti agbambaniaga a mapan iti Egipto. Inkeddeng dagiti agkakabsat a mangilako ken ni Jose kas maysa nga adipen kadagiti agbambaniaga para iti 20 a pedaso ti pirak.
Kalpasanna nangikabil dagiti kakabsat ni Jose iti dara ti kalding iti kagayna. Nagsubli dagiti kakabsat ni Jose iti amada, ni Jacob, ket impakitada kenkuana ti kagayna. Nagulbodda ken ni Jacob ket imbagada kenkuana a pinatay dagiti atap nga ayup ni Jose.
Nagsangit ni Jacob gapu ta impagarupna a natayen ni Jose.
Ngem sibibiag pay laeng ni Jose. Adayo daytoy manipud iti pagtaengan iti Egipto, nga agbibiag kas maysa nga adipen.