“Ni Jonas a Propeta,” Dagiti Estoria iti Daan a Tulag (2021)
“Ni Jonas a Propeta,” Dagiti Estoria iti Daan a Tulag
Jonas 1–4
Ni Jonas a Propeta
Panangsursuro nga agtalek iti asi ti Apo
Maysa a propeta ni Jonas. Imbaga ti Apo kenkuana a ballaaganna dagiti tao iti Nineve ta madadael ti siudadda no saanda nga agbabawi.
Ngem kabusor dagiti tao ti Nineve dagiti Israelita. Saan a kayat ni Jonas ti mangasaba kadakuada. Isu a naglugan daytoy iti bapor nga aglayag iti adayo manipud iti Nineve.
Bayat ti kaadda ni Jonas iti bapor, dimteng ti dakkel a bagyo. Nagbuteng dagiti lallaki iti bapor para iti biagda. Kiniddawda ken ni Jonas nga agkararag iti Apo tapno isalakanna ida.
Ammo ni Jonas nga impatulod ti Apo ti bagyo gapu ta intarayanna no ania ti indawat ti Apo nga aramidenna. Kayat ni Jonas nga isalakan dagiti tao iti bapor. Kinunana a no ipuruakda daytoy iti baybay, agsardeng no kua ti bagyo.
Saan a kayat dagiti lallaki ti mangitappuak ken ni Jonas iti baybay. Pinadasda nga igaud ti bapor a mapan iti sang-at, ngem napigsa unay ti bagyo. Kamaudiananna, intappuakda ni Jonas iti baybay.
Nagsardeng ti bagyo. Ngem kalpasanna tinilmon ti dakkel nga ikan ni Jonas.
Adda ni Jonas iti uneg ti tian ti ikan iti tallo nga aldaw ken tallo a rabii. Kabayatan dayta a panawen, nagkararag ken nagbabawi ni Jonas. Kayatna nga aramiden ti rumbeng ken dumngeg iti Apo. Nangngeg ti Apo dagiti kararag ni Jonas ket pinaisaruana iti ikan ni Jonas iti namaga a daga.
Imbaga manen ti Apo ken ni Jonas a mangasaba kadagiti tao ti Nineve. Daytoy a gundaway nagtungpal ni Jonas. Napan idiay Nineve ket imbagana kadagiti tao nga agbabawida wenno dadaelen ti Apo iti siudadda. Nagbabawi ti ari ken dagiti taona. Pinakawan ida ti Apo ket saanna a dinadael ti Nineve.
Ngem naupay ni Jonas ta saan a nadadael dagiti tao. Iti panagkunana saanda a maikari a mapakawan.
Tapno masursuruan ni Jonas iti maysa a leksion, nangpadakkel ti Apo iti maysa a mula a manglinong ken ni Jonas manipud iti init. Kalpasanna natay ti mula, ket madi ti rikna ni Jonas iti mula.
Isursuro ti Apo ken ni Jonas ti maysa a leksion maipapan kadagiti annakna. Nasursuro ni Jonas a nasken a naliday daytoy no saan nga agbabawi dagiti tao ken nasken a naragsak daytoy no agbabawida.