“Ni Elias ken dagiti Saserdote ni Baal,” Dagiti Estoria iti Daan a Tulag (2022)
“Ni Elias ken dagiti Saserdote ni Baal,” Dagiti Estoria iti Daan a Tulag
1 Ar-ari 18
Ni Elias ken dagiti Saserdote ni Baal
Ti propeta ti Apo bersus dagiti sinsinan saserdote
Nagtultuloy ti pagarian ti Israel a nagsagaba iti kaawan ti danum. Imbaga ni Ari Ahab kadagiti tao a sumurotda iti palso a dios nga agnagan iti Baal.
Imbaon ti Apo ni Elias a propeta a makipagkita ken ni Ahab. Inawis ni Elias ti amin a tao iti tuktok ti maysa a bantay. Inawisna ti ari ken dagiti saserdotena iti maysa a karit a mangkita no ti Apo wenno ni Baal ti pudno a Dios.
Inlawlawag ni Elias ti karit. Isakripisiona ken dagiti saserdote ti maysa a baka iti altar, ngem saan nga isuda mismo ti mangsindi iti apuy. Ketdi, agkararag dagiti saserdote ken ni Baal a mangirugi iti apuy. Kalpasanna agkararag ni Elias iti Apo a mangirugi iti apuy. Ammo ni Elias a ti laeng pudno a Dios iti mangirugi iti apuy.
Nagkararag dagiti saserdote ni Baal iti diosda manipud iti agsapa agingga iti tengnga ti aldaw, ngem awan ti napasamak. Naki-angaw ni Elias kadakuada ket kinunana a nalabit a matmaturog ti diosda a ni Baal.
Nagpungtot dagiti saserdote, timmapuakda iti altar, ket nagpukkawda agingga iti rabii. Ninamnamada a sumungbatto ti diosda, ngem awan latta ti apuy.
Kalpasanna batang metten ni Elias. Impatakderna ti maysa nga altar iti Apo, nagkali iti kanal a nailikmut iti altar, ket insaganana ti sakripisio.
Indawat ni Elias kadagiti tao a mangpunno iti uppat a karamba iti danum ket ibuyat dagitoy iti kayo ti altar iti mamitlo a daras. Ti danum ti nangyuper iti kayo ken ti altar. Daytoy ti nangpunno iti sibubukel a kanal.
Nagkararag ni Elias iti Apo nga ipakitana ti bileg ti pudno a Dios. Bimmaba ti apuy ti Apo ket pinuoranna ti sakripisio, kayo, batbato, ken danum. Ammo dagiti tao a ti Dios ni Elias ti pudno a Dios. Inkararag ni Elias nga aggibus koman ti kalgaw, ket impatulod ti Apo ti tudo.