“Ni Josue a Propeta,” Dagiti Estoria iti Daan a Tulag (2022)
“Ni Josue a Propeta,” Dagiti Estoria iti Daan a Tulag
Deuteronomio 10; 31; 34; Josue 1; 3–6; 10–11; 21; 24
Ni Josue a Propeta
Maysa a maudi a pannubok sakbay ti iseserrek iti naikari a daga
Inawagan ti Apo ni Josue nga agbalin a baro a propeta kalpasan a naipan iti langit ni propeta Moises. Bayat ti panagkampo dagiti Israelita iti asideg ti karayan Jordan, kinuna ti Apo nga orasen tapno umakarda a mapan iti naikari a daga.
Deuteronomio 34:1–9; Josue 1:1–4; Alma 45:19
Adda iti Canaan ti naikari a daga, ngem nagnaed dagiti nadangkes a tao idiay. Imbaga ti Apo ken ni Josue nga agbalin a napigsa ken natured. Babaen iti tulong ti Apo, maparmek dagiti Israelita ti daga ti Canaan.
Inummong ni Josue ti maysa a buyot. Imbaga ti Apo kadakuada nga ikuyogda dagiti lapida a bato ti Sangapulo a Bilin ken dadduma pay a nasantuan a kasuratan. Inawit dagiti padi dagitoy sagrado a banag iti maysa a kahon a maawagan iti lakasa ti katulagan. Kalpasanna nagsagana ti buyot a mangballasiw iti Karayan Jordan. Adalem ti karayan ken napardas ti ayusna.
Deuteronomio 10:5; 31:25–26; Josue 1:10–11; 3:1–11
Inkari ni Josue kadagiti Israelita a tulonganto ida ti Apo a mangballasiw iti karayan.
Indawat ni Josue iti 12 a padi a mangawit iti lakasa ti katulagan ket magnada iti danum. Apaman nga immaddang dagiti padi iti karayan, nagsina ti danum.
Binallasiw dagiti Israelita ti karayan iti namaga a daga. Indawat ni Josue kadagiti Israelita a mangala iti 12 a bato manipud iti namaga nga igid ti karayan. Insalansanna dagiti bato a mangipalagip kadagiti Israelita iti milagro ti Apo iti dayta nga aldaw.
Indauluan ni Josue ti buyot nga Israelita nga agturong iti daga ti Canaan. Simmangpetda iti maysa a siudad a maawagan iti Jerico. Napigsa unay ti siudad ket addaan kadagiti nangato a pader. Imbaga ti Apo ken ni Josue no kasano ti mangparmek iti Jerico. Kinunana a nasken nga agmartsa dagiti Israelita iti aglawlaw ti Jerico iti inaldaw iti uneg ti innem nga aldaw. Tinungpal ni Josue iti Apo.
Imbaga ni Josue kadagiti padi a mangawit iti lakasa ti katulagan iti sango dagiti Israelita. Inaldaw, nagmartsa ti buyot iti lawlaw ti Jerico, ket pito a padi ti nangpaguni kadagiti tangguyobda. Naulimek dagiti dadduma pay nga Israelita.
Iti maikapito nga aldaw, nagmartsa ti buyot iti lawlaw ti Jerico iti maminpito a daras. Bayat ti panagpaguni dagiti padi iti tangguyobda, imbaga ni Josue nga agpukkaw dagiti Israelita. Kellaat a natumba dagiti pader ti Jerico, ket innala ti buyot ni Josue ti siudad.
Tinulongan ti Apo dagiti Israelita, kas iti inkarina. Intuloy ti buyot ni Josue ti mangparmek iti daga ti Canaan, ket nangrugi a nagnaed dagiti Israelita sadiay. Impalagip ni Josue kadakuada maipapan kadagiti milagro ken kari ti Apo. Indawatna kadagiti Israelita a pilienda ti agserbi iti Apo.