“Ruth ken Noemi,” Dagiti Estoria iti Daan a Tulag (2022)
“Ruth ken Noemi,” Dagiti Estoria iti Daan a Tulag
Ruth 1–4
Ruth ken Noemi
Panagbiag kadagiti pannubok nga addaan iti ayat ken kinapudno
Immakar ni Noemi ken ti pamiliana iti Moab gapu ta awan ti umdas a taraon iti Juda. Kalpasanna natay ti asawa ni Noemi. Inkallaysa dagiti annak a lallaki ni Noemi dagiti babbai a taga Moab nga agnagan iti Orfa ken Ruth. Inaywananda ni Noemi iti uneg ti 10 a tawen.
Kalpasanna natay ti assawa da Orfa ken Ruth. Ita nagmaymaysan dagiti babbai. Saan a maipaay ni Noemi dagiti taraon da Ruth ken Orfa.
Nagawid ni Orfa. Ngem kinayat ni Ruth ti agbati ken mangaywan ken ni Noemi. Nadamag da Ruth ken Noemi nga adda manen apit iti daga ti Juda, isu a nagbiaheda a napan sadiay.
Nakadanon da Ruth ken Noemi iti Juda kabayatan ti panagani. Kasapulanda ti taraon. Kukua ti kabagian ni Noemi a ni Booz dagiti talon iti Juda. Impalubosna nga agadas ni Ruth iti nabati pay a bukbukel iti talonna. Narigat a trabaho daytoy.
Rinaem ni Booz ni Ruth gapu ta nagtrabaho a napasnek ken gapu ta napudno daytoy ken ni Noemi ken iti Apo. Imbagana kadagiti adipenna a mangibatida iti ad-adu pay a bukbukel iti talon para ken ni Ruth.
Kayat ni Noemi a maaddaan ni Ruth iti maysa a pamilia. Inallukoyna ni Ruth a mangikallaysa ken ni Booz. Ammo ni Ruth a no agkallaysa da Ruth ken Booz, maaywananda a dua ni Noemi.
Inkeddeng ni Ruth a mangkiddaw ken ni Booz a mangikallaysa kenkuana. Ammo ni Booz a napudno ken nasagudayan a babai ni Ruth. Immanamong daytoy.
Nagkallaysa da Ruth ken Booz. Saan a nagbayag naaddaan ni Ruth iti maysa a maladaga a lalaki. Nagbalin daytoy a lelong ni David, ti masakbayan nga ari. Kalpasan ti adu a tawen, nayanak ni Jesucristo iti daytoy a linia ti pamilia.