“Ni Raab ken dagiti Agsisiim,” Dagiti Estoria iti Daan a Tulag (2022)
“Ni Raab ken dagiti Agsisiim,” Dagiti Estoria iti Daan a Tulag
Ni Raab ken dagiti Agsisiim
Maysa a pili a mangisalakan iti pamilia
Maysa a babai nga agnagan iti Raab ti nagnaed idi iti Jerico sakbay a pinarmek daytoy dagiti Israelita. Nangngeganna a pinagsina ti Apo ti Nalabaga a Baybay para kadagiti Israelita. Ammo ni Raab a tulonganto ti Apo dagiti Israelita a makiranget a maibusor iti siudadna. Nadangkes dagiti tao iti Jerico.
Indauluan ni propeta Josue ti buyot nga Israelita. Imbaonna ti dua nga agsisiim iti Jerico. Ngem nakitada dagiti agsisiim, ket nangibaon ti ari ti Jerico kadagiti guardia a mangtiliw kadakuada.
Napan dagiti agsisiim iti balay ni Raab. Immanamong ni Raab a tulonganna dagiti agsisiim, isu nga inlemmengna ida iti atepna.
Nagsapul dagiti tattao ti ari ti balay ni Raab ngem saanda a nasarakan dagiti agsisiim. Kalpasan a pimmanawda, indawat ni Raab kadagiti agsisiim a mangsaluad iti pamiliana no umay ti buyot a makiranget a maibusor iti Jerico. Inkari dagiti agsisiim ken ni Raab a natalgedto ti pamiliana. Kalpasanna nangipuruak ni Raab iti maysa a tali iti tawa nga usaren dagiti agsisiim nga aglibas.
Nagsubli dagiti agsisiim ken ni propeta Josue ket imbagada iti buyot nga Israelita a saanda a dangran ti asino man iti balay ni Raab. Idi agangay, idi rinanget dagiti Israelita ti Jerico, tinungpalda ti karida ken ni Raab. Ti kinatured ni Raab ti nangispal iti pamiliana. Nakikadua ti pamiliana kadagiti tao ti Apo.