“Dagiti Israelita iti Let-ang,” Dagiti Estoria iti Daan a Tulag (2022)
“Dagiti Israelita iti Let-ang,” Dagiti Estoria iti Daan a Tulag
Dagiti Israelita iti Let-ang
Panagsursuro nga agpannuray iti Apo
Iti saan a nabayag kalpasan a pimmanaw dagiti Israelita iti Egipto, nagdayengdengda gapu ta awan ti umdas a taraonda. Kinunada a nasaysayaat no agbalinda nga adipen iti Egipto ngem iti agbisinda iti let-ang.
Tapno maisuro dagiti Israelita nga agtalek Kenkuana, nangipatulod ti Apo iti tinapay manipud iti langit a pidutenda iti inaldaw. Inawaganda ti tinapay iti mana. Maipada ti ramanna iti tagapulot ti uyokan. Saan a nangipatulod ti Apo iti mana iti Sabbath, ti maikapito nga aldaw ti lawas. Isu nga iti maikanem nga aldaw, imbagana kadakuada a mangpidutda iti umdas a mana para iti dua nga aldaw.
Iti apagapaman, nangipatulod pay ti Apo iti pugo a sidaen dagiti Israelita. Iti bigat nagpidutda iti mana, ken iti rabii nagummongda iti pugo. Kayat ti Apo a masursuro dagiti Israelita ti agtalek Kenkuana. Iti kastoy a wagas, inaywananna ida iti let-ang.