“Nobiembre 6–12. Hebreo 7–13: ‘Nangato a Saserdote dagiti Naimbag a Bambanag nga Umayto’” Umaykayo, Sumurot Kaniak—Para iti Primary: Baro a Tulag 2023 (2021)
“Nobiembre 6–12. Hebreo 7–13,” Umaykayo, Sumurot Kaniak—Para iti Primary: 2023
Bendisionan ni Melchizedek ni Abram, ni Walter Rane. Sagut ti artist
Nobiembre 6–12
Hebreo 7–13
“Nangato a Saserdote dagiti Naimbag a Bambanag nga Umayto”
Bayat ti panangrebyum ken panangutobmo iti daytoy a balabala, ikasom dagiti parikna a maawatmo maipapan kadagiti ubbing a sursuruam. Tulongannakanto ti Espiritu a mangsarak kadagiti mensahe a para kadakuada iti Hebreo 7–13.
Yawis ti Panagbibinninglay
Kiddawem kadagiti ubbing a mangibinglay kadagiti banag nga aramidenda ken dagiti pamiliada tapno masursuroda ti ebanghelio iti pagtaenganda. Awisem ida nga ibinglayda dagiti sumagmamano a paggugustoda a padpadas iti panagsursuro iti ebanghelio kadagiti pamiliada.
Isuro ti Doktrina: In-inaudi nga Ubbing
Mabalin a makatulong kadatayo ti priesthood iti adu a wagas.
Ti Hebreo 7:1–6 mabalin a makaipaay iti gundaway a mangipakaammo kadagiti ubbing dagiti bendision ti priesthood.
Dagiti Mabalin nga Aktibidad
-
Ilawlawag biit no asino ni Abraham, ket kalpasanna usarem ti Hebreo 7:1–6 a mangisuro a nagbayad ni Abraham iti apagkapullo ken ni Melchizedek (kitaen met iti Patarus ni Joseph Smith, Genesis 14:36–40 [iti Pangiwanwan iti Nasantuan a Kasuratan]). Ilawlawag nga addaan iti priesthood ni Melchizedek, nga isu ti bileg ti Dios, ken inusarna daytoy a nangbendision ken ni Abraham. Mabalin a maragsakan dagiti ubbing iti panangyakemda iti estoria nga addaan iti simple a props, kas iti maysa a korona ken maysa a sobre ti apagkapullo.
-
Awisem ti maysa nga addaan iti Aaronic ken maysa nga addaan iti Melchizedek Priesthood a sumarungkar iti klase ken ibagada kadagiti ubbing no kasano nga inusarda ti priesthood a nangbendision kadagiti dadduma. Kalpasanna ipakitam kadagiti ubbing dagiti ladawan ti nadumaduma nga ordinansa ti priesthood (kas pagarigan, kitaen iti dagiti ladawan 103–8 iti Libro ti Arte ti Ebanghelio). Tulongam dagiti ubbing a mangikeddeng no ania a priesthood ti kasapulan iti tunggal ordinansa ken itedda dayta a ladawan iti umno a priesthood holder tapno iggananna.
Ti pammati isu ti panamati kadagiti banag a ditayo makita.
Nupay ditayo makita ti Nailangitan nga Ama ken ni Jesucristo, mapadur-astayo ti pammatitayo kadakuada ken dagiti karida, a mangtultulad kadagiti pagwadan dagiti napudno a tao a nailadawan iti Hebreo 11.
Dagiti Mabalin nga Aktibidad
-
I-display ti maysa a ladawan ni Jesus. Ikabil iti lawlaw ti siled dagiti sugmamano a banag a mangibagi kadagiti “pakakitaan” nga Isu ket napaypayso nupay ditayo makita Isuna ( kas kadagiti nasantuan a kasuratan, ti maysa a ladawan iti Umuna a Parmata, ken ti maysa a ladawan ti daga). Awisem dagiti ubbing a mangsapul kadagiti banag, ken kalpasanna ibinglaymo kadakuada no kasano a makatulong kadatayo ti tunggal banag a maaddaan iti pammati a sibibiag ni Jesus.
-
Mangitugot iti papel a bentilador, ket pagsisinnublatem dagiti ubbing a mangrikna iti panangipuyot ti angin iti bentilador kadagiti rupada. Isurom kadakuada a saantayo a makita ti angin, ngem mariknatayo daytoy. Umasping iti dayta, saantayo a makita ti Nailangitan ng Ama ken ni Jesucristo, ngem mariknatayo ti ayatda ken maaddaantayo iti pammati a napaypaypaysoda.
-
Ibinglay dagiti estoria ti maysa wenno adu a tattao a nadakamat iti Hebreo 11:4–32. Masarakan pay dagiti estoria maipapan kadagitoy a tao iti Dagiti Estoria iti Baro a Tulag. Ania ti inaramid dagitoy a tao a nangipakita nga addaanda iti pammati iti maysa a banag a saanda a makita? Ibinglaymo dagiti sumagmamano a bendision a naawatmo gapu iti pammatim.
Tulongannatayonto ken dinatayo pulos panawan ti Nailangitan nga Ama ken ni Jesucristo.
Ania dagiti pannubok a mabalin a mapadpadasan dagiti ubbing? Kasano a makatulong ti mensahe iti Hebreo 13:5–6 kadakuada?
Dagiti Mabalin nga Aktibidad
-
Irebyu dagiti sumagmamano nga estoria iti Baro a Tulag a nasursuro dagiti ubbing iti daytoy a tawen a nakatulongan ti Mangisalakan kadagiti dadduma, kas idi pinaimbagna ti agkissiw a lalaki (kitaen iti Lucas 5:18–26) wenno pinnakanna dagiti 5,000 (kitaen iti Mateo 14:15–21). Tulongam dagiti ubbing a makasursuro iti ragup ti balikas a “Ti Apo ti katulongak” (Hebreo 13:6).
-
Awisem dagiti ubbing nga agdrowing iti maysa a ladawan ti panawen idi nariknada ti buteng. Ibasam kadakuada ti Hebreo 13:5–6 ken paneknekam a tulongannatayonto ti Nailangitan ng Ama ken dinatayo baybay-an iti kaano man. Tulongam dagiti ubing a gumetteng kadagiti sinan puso a papel nga umanay a maabbongan dagiti drowing. Ania dagiti sumagmamano a banag a mangtulong kadatayo a makarikna nga as-asidegtayo ti Nailangitan nga Ama? Isurat dagiti sumagmamano kadagitoy a banag iti puso.
-
Suruam dagiti ubbing iti kanta maipapan iti no kasano nga ayaten ken tulongannatayo ti Nailangitan nga Ama ken ni Jesus, kas iti “Tell Me, Dear Lord” (Children’s Songbook, 176). Kasano a maammuantayo nga asideg kadatayo ti Nailangitan nga Ama ken ni Jesucristo? Isaritam maipapan iti maysa a panawen idi nariknam a ti Apo [idi] ti katulongam.”
Isuro ti Doktrina: In-inauna nga Ubbing
Sumurot dagiti lider iti Simbaan iti Mangisalakan.
Kasano a mausarmo dagitoy a bersikulo tapno matulongam dagiti ubbing a makaawat a dagiti naawagan nga agserbi iti Simbaan ti Apo nasken nga agbalinda a napudno ken agserbida iti dadduma kas iti inaramidna?
Dagiti Mabalin nga Aktibidad
-
Tulongam dagiti ubbing nga agilista kadagiti banag nga ammoda maipapan iti dua a naindaklan a lider a da Abraham ken Melchizedek. Masarakanda ti tulong iti Hebreo 7:1–4; Abraham 1:1–2; ken Patarus ni Joseph Smith, Genesis 14:25–40 (iti Pangiwanwan iti Nasatuan a Kasuratan). Ania dagiti kababalin a kas ken Cristo nga adda kadagitoy a lalaki a nakatulong kadakuada a mangdayaw iti priesthood?
-
Kiddawen kadagiti ubbing a basaenda ti Hebreo 7:1–2 ken sapulenda dagiti pangawag a nausar a mangiladawan ken ni Melchizedek. Kasano a mangipalagip kadatayo dagitoy a pangawag ken ni Jesucristo? Tulongam ida nga agpanunot kadagiti wagas a ni Jesus ti “Ari ti talna.” Awisem ida a nga agpanunot maipapan iti dadduma pay a priesthood holder nga isuda pay ti pagwadan ti sumursurot iti Mangisalakan?
-
Ibinglay ti maysa a padas a nakapapigsaan ti pammatim iti Mangisalakan gapu iti serbisio ti maysa a priesthood holder. Tulongam dagiti ubbing nga agpanunot kadagiti wagas a nangbendisionan ti priesthood kadakuada.
Gunggonaan ti Nailangitan nga Ama dagiti addaan iti pammati.
Ti Hebreo 11 aglaon iti adu a pagarigan dagiti tao a nabendisionan idi nagtignayda iti pammati. Ania kadagiti estoria ti makaparegta unay wenno makatulong kadagiti ubbing a sursuruam?
Dagiti Mabalin nga Aktibidad
-
Awisem dagiti ubbing nga agaramid ti listaan iti pisarra kadagiti banag a nasursuroda maipapan iti pammati iti Hebreo 11:1–3, 6. Ikkam ti tunggal maysa kadagiti ubbing iti nagan ti maysa a tao a nadakamat iti Hebreo 11, ken awisem ida a basaenda dagiti bersikulo a mainaig iti dayta a tao. Kiddawem kadakuada a mangiibinglay kadagiti pamugtuan maipapan iti daytoy a tao tapno mapugtuan dagiti dadduma pay nga ubbing no siasino daytoy. Kasano nga impakita dagitoy a tao ti pammati, ken kasano a ginunggonaan ida ti Nailangitan nga Ama? (Para kadagiti ladawan dagitoy a tao, kitaen tii benneg ti Daan a Tulag iti Libro ti Arte ti Ebanghelio.)
-
Kalpasan a mabasam maipapan iti sumagmamano a napudno a pagarigan iti Hebreo 11, kiddawem dagiti ubbing nga agsurat maipapan iti maysa a tao nga ammoda a nangipakita iti pammati. Awisem dagiti sumagmamano nga ubbing nga ibinglayda dagiti pagariganda iti klase.
Dusaen ti Apo dagiti ay-ayatenna.
Makatulong dagitoy a bersikulo kadagiti ubbing a makaawat a ti Nailangitan nga Ama, dagiti nagannak kadakuada, ken dagiti dadduma ket mangatur kadakuada gapu ta ay-ayatenda ida ken kayatda a masursuruanda manipud kadagiti biddutda.
Dagiti Mabalin nga Aktibidad
-
Aggigiddan a mangbasa iti Hebreo 12:5–11, ken kiddawem kadagiti ubbing nga agsapul kadagiti rason no apay a dusaennatayo ti Nailangitan nga Ama (aturen wenno disiplinaennatayo). Ania ti isuro daytoy kadatayo maipapan no apay nga aturen pay dagiti nagannak dagiti annakda? Kasano ti panagrespondetayo iti naayat a pannakaatur?
-
Ibinglay dagiti pagarigan dagiti tao iti nasantuan a kasuratan a nadusa ti Apo ken nagbabawi (kas pagarigan, kitaen iti 1 Nephi 16:25–27; Ether 2:13–15). Kasano a nagbalinda a nasayaat a pagwadan dagiti pagbatayan iti Hebreo 12:5–11?
-
Kalpasan ti panangbasam iti Hebreo 12:5–11, awisem dagiti ubbing nga agsurat kadagiti sumagmamano a banag a padasendanto a lagipen no maaturda kadagiti biddutda.
Yallukoy ti Panagsursuro iti Pagtaengan
Awisem dagiti ubbing a mangisurat wenno mangidrowing iti maysa a ladawan ti maysa a banag a nasursuroda iti klase. Allukoyem ida nga ibinglayda no ania ti nasursuroda kadagiti pamiliada.
Panangpadur-as iti Panangisurotayo
Usarem dagiti panid ti aktibidad. Bayat ti panagileppas dagiti ubbing kadagiti panid ti aktibidad bayat ti panagklaseda, usarem ti oras nga agrebyu kadagiti pagbatayan manipud iti adalen.