Balsamo ni Galaad, ni Annie Henrie

Oktubre 30–Nobiembre 5

Hebreo 1–6

Ni Jesucristo, “ti Akin-aramid iti Agnanayon a Pannakaisalakan”

Ania dagiti kinapudno a masarakam iti Hebreo 1–6 a mariknam a mangparegta kenka nga isuro kadagiti ubbing? Ikasom dagiti parikna manipud iti Espiritu a sumangbay kenka bayat ti panagsaganam, ken penkem nga isurat dagitoy.

Yawis ti Panagbibinninglay

Inawat kadi dagiti ubbing ti awis iti gibus ti adalen iti maudi a lawas a mangsarak iti maysa a bersikulo ti nasantuan a kasuratan a mabalinda nga ibinglay? No kasta, mangtedka kadakuada iti gundaway a mangibinglay iti daytoy. No saan, tulongam ida nga agpanunot iti maysa a banag a nasursuroda manipud kadagiti nasantuan a kasuratan itay kallabes a mabalinda nga ibinglay.

Isuro ti Doktrina: In-inaudi nga Ubbing

Hebreo 1:1–10; 2:8–10, 17–18

Mamatiak ken ni Jesucristo.

Makatulong dagitoy a bersikulo kadagiti ubbing nga agsursuro iti ad-adu pay maipapan ken ni Jesucristo ken mangpapigsa iti relasionda Kenkuana.

Dagiti Mabalin nga Aktibidad

• Mangsapul iti sumagmamano a kinapudno maipapan ken ni Jesucristo iti Hebreo 1:1–10; 2:8–10, 17–18, ket isuratm dagitoy kadagiti panid ti papel. Ilemmengmo dagiti papel iti lawlaw ti siled, ket awisem dagiti ubbing a mangsarak kadagitoy. Tulongam dagiti ubbing nga agbasa kadagiti kinapudno a naisurat kadagiti papel, ken isaritam no ania ti kayat a sawen dagitoy a kinapudno. No kasapulan, ilawlawag a maawagan ni Jesus nga Anak ti Dios gapu ta ti Nailangitan nga Ama ti ama ti agpada nga espirituna ken bagina.

• Iggamam ti maysa a ladawan iti Mangisalakan, ket ibinglaymo no apay nga agyamanka Kenkuana. Ikkam iti batang ti tunggal ubing a mangiggem iti ladawan ket ibinglayna no apay nga agyaman isuna para ken ni Jesucristo.

Hebreo 3:8

Kayat ti Nailangitan nga Ama a “saantayo a patangkenen dagiti puso[tayo].”

Iladawan tiHebreo 3 dagiti Israelita a mangpatpatangken iti puspusoda ken mangsupsupring kadagiti bendision ti Apo. Mabalin a maysa a ballaag daytoy iti amin kadatayo a saantayo a patangkenen dagiti puspusotayo.

Dagiti Mabalin nga Aktibidad

• Mangitugot iti klase iti maysa a banag a makasagepsep (kas iti espongha wenno lupot) ken maysa a banag a natangken (kas iti maysa a bato). Awisem dagiti ubbing a mangsagid kadagiti banag ket iladawan no kasano ti panagrikna kadagiti banag. Mangikabil iti sumagmamano a tedted ti danum iti tunggal banag ken ilawlawag nga ad-adu a danum ti sumagepsep iti espongha ngem iti bato. Ilawlawag a kasapulan a nalukneng dagiti pusotayo ken saan a natangken tapno maawattayo dagiti kinapudno ti Nailangitan nga Ama ken ti ayatna.

• Gumettengka kadagiti sukog-puso manipud iti nalamuyot a material, kas iti lupot, ken maysa a natangken a material, kas iti karton. Ilawlawag kadagiti ubbing ti pagdumaan ti kaadda iti nalukneng a puso ken kaadda ti natangken a puso. Ibinglay dagiti sugmagmamano a pagarigan manipud kadagiti nasantuan a kasuratan maipapan kadagiti tao nga addaan iti nalukneng a puso wenno natangken a puso kas kada Nephi, Laman, ken Lemuel (1 Nephi 2:16–19), Pablo (Dagiti Aramid 9:1–22); Joseph Smith (Joseph Smith—Pakasaritaan 1:11–20). Bayat ti panangibinglaymo iti tunggal pagarigan, awisem dagiti ubbing a mangitudo iti nalukneng a puso wenno natangken a puso.

“Inawagan ti Dios” ni Aaron (Hebreo 5:4). Awagan ni Moises ni Aaron iti Panagministro, ni Harry Anderson

Hebreo 5:4

Inawagan ti Dios dagiti addaan iti priesthood.

Hebreo 5:4 ti maysa a napateg a bersikulo gapu ta ilawlawagna a nasken nga awagan ti Dios dagiti priesthood holder. Kasta met a pudno iti asino man a maawagan nga agserbi iti Simbaan ti Apo.

Dagiti Mabalin nga Aktibidad

• Basaen ti Hebreo 5:4 kadagiti ubbing. Kiddawem iti maysa a priesthood holder a mangilawlawag no ania ti priesthood. Mabalinna pay nga ibinglay no kasano nga agserbi kadagiti dadduma no ipatungpalna dagiti pagrebbenganna. Kasta met nga idawat iti maysa a kabsat a babai iti ward a mangibinglay iti padasna iti pannakai-set apartna iti maysa a takem iti Simbaan. Allukoyem ida a mangibinglay no kasano a pinaraburan ida ti Apo iti bileg a mangipatungpal iti takemda.

• Tulongam dagiti ubbing a mangyulo kadagiti ragup ti balikas manipud iti maikalima a pagannurotan ti pammati. Ibinglaymo ti pammaneknekmo a dagiti tao a naawagan nga agtrabaho iti aramid ti Dios ket inawagan ti Dios babaen iti paltiing.

Isuro ti Doktrina: In-inauna nga Ubbing

Hebreo 1:1–10; 2:8–10, 17–18

Mamatiak ken ni Jesucristo.

Naisurat ti Surat kadagiti Hebreo tapno mangpapigsa iti pammati dagiti Santo a Hebreo ken ni Jesucristo. Kasta met ti maaramid kadagiti ubbing a sursuruam.

Dagiti Mabalin nga Aktibidad

• Dutokam ti tunggal ubing iti sumagmamano a bersikulo iti Hebreo 1:1–10; 2:8–10, 17–18, ken awisem dagiti ubbing a mangsapul kadagita a bersikulo kadagiti kinapudno maipapan ken ni Jesucristo. Paibinglay wenno paisuratmo kadakuada iti pisarra no ania ti masarakanda. Ania pay ti ammotayo maipapan ken Jesucristo? Mabalin a makasarak dagiti ubbing iti sumagmamano a kapanunotan kadagiti kanta a kas iti “I Know That My Redeemer Lives” (Hymns, no. 136) wenno “He Sent His Son” (Children’s Songbook, 34–35).

• Awisem dagiti ubbing nga agdrowing iti ladawan ti bagbagida a kadua dagiti nagannak kadakuada. Kiddawem kadakuada a mangibinglay no ania ti adda a pagpapadaanda kadagiti nagannakda. Ilawlawag a no kuna ti Hebreo 1:3 a ni Jesucristo ti “napaypayso a ladawan ti kina[Dios]na,” kaipapananna nga addaan ni Jesus ken ti Nailangitan nga Ama kadagiti agpada a kababalin ken galad. Isaritam kadagiti ubbing no kasano a mayasidegnatayo nga ad-adda iti Nailangitan nga Ama ti panangsurottayo ken ni Jesucristo.

Hebreo 3:7–19

Tapno maawat ti pannarabay ken bendision ti Nailangitan nga Ama, nasken a saantayo a “patangkenen dagiti puso[tayo].”

Iti Hebreo 3, mausar ti estoria dagiti Israelita iti let-ang a mangisuro iti kinapateg ti saan a panagpatangken kadagiti pusotayo. Kasano a mausarmo daytoy nga estoria a pangisurom kadagiti ubbing iti klasem iti daytoy a pagbatayan?

Dagiti Mabalin nga Aktibidad

• Kiddawen kadagiti ubbing a mangpanunot kadagiti banag a natangken ken nalukneng. (No mabalin, mangitugotka iti sumagmamano a pagarigan nga ipakitam kadakuada.) Aggigiddan a basaen ti Hebreo 3:8. Ania ti kaipapanan ti maaddaan iti natangken a puso? Apay a kayat ti Dios nga addaantayo iti nalukneng a puso?

• Iti bukodmo a balikas, ibinglaymo ti estoria maipapan kadagiti Israelita a mangpatpatangken kadagiti pusoda a maibusor iti Apo iti let-ang (kitaen iti Dagiti Numero 14:1–12; Hebreo 3:7–19). Payakem kadagiti ubbing ti estoria. Anianto ti mapasamak no patangkenentayo dagiti pusotayo a maibusor iti Apo ken iti ebangheliona?

• Awisem dagiti ubbing a mangbasa iti Mateo 13:15; Hebreo 3:15; Mosiah 11:29; ken Moises 6:27. Kiddawem kadakuada a mangidrowing iti pisarra kadagiti paset ti bagi a nadakamat kadagitoy a bersikulo. Ania ti kayat a sawen ti maaddaan kadagiti naespirituan a sulpeng a lapayag, bulsek a mata, ken natangken a puspuso? Kasano a masiguradotayo a nakasagana dagiti lapayag, mata, ken pusotayo a mangbigbig iti timek ti Espiritu?

Hebreo 5:1–4

Inawagan ti Dios dagiti addaan iti priesthood.

Mangipaay tiHebreo 5 kadagiti gundaway a pagsasaritaan no ania ti priesthood—ti bileg ken turay nga agtignay iti nagan ti Dios—ken no kasano a maawat daytoy.

Dagiti Mabalin nga Aktibidad

• Ipakita ti ladawan a Ikkan ni Moises ni Aaron iti Kinasaserdote (Libro ti Arte ti Ebanghelio, num.15) idinto a basaen ti maysa nga ubbing ti Hebreo 5:4. Ilawlawag a nanaganan ti Araronic Priesthood batay ken ni Aaron. Tulongam dagiti ubbing nga agpanunot kadagiti pagrebbengan dagiti Aaronic Priesthood holder nga annongenda (kas iti panagbuniag, panangbendision ken panangipasa iti sakramento, ken panangawis kadagiti dadduma nga umasideg ken ni Cristo, kitaen iti Doktrina ken Katulagan 20:46–48, 59).

• Tulongam dagiti ubbing maipapan iti nadumaduma a wagas a pakaawatan dagiti tao iti turay. Kas pagarigan, kasano nga awaten dagiti mannursuro, doktor, wenno lider iti politika ti turay? Kasano nga ited ti Dios ti turayna? Awisem dagiti ubbing nga agpanunot maipapan iti daytoy a saludsod bayat ti panagbasada iti Hebreo 5:4 ken ti maikalima a pagannurotan ti pammati. Tulongam dagiti ubbing a mangpanunot kadagiti tao iti ward nga addaan iti turay manipud iti Dios—agraman dagiti priesthood holder, kasta met dagiti lallaki ken babbai a nai-set apart nga agserbi kadagiti naipangpangruna a takem wenno calling.

Yallukoy ti Panagsursuro iti Pagtaengan

Awisem dagiti ubbing a mangibinglay iti maysa a nasantuan a kasuratan, kanta, wenno aktibidad a nasursuroda iti klase ita a kadua dagiti nagannak kadakuada kabayatan ti home evening.

Panangpadur-as iti Panangisurotayo

Mailasin dagiti ubbing ti impluensia ti Espiritu. Isuro kadagiti ubbing a dagiti rikna ti talna, ayat, ken bara nga adda kadakuada no agsarita wenno agkantada maipapan ken ni Jesucristo ken ti ebangheliona ket naggapu iti Espiritu Santo.