tallo a babbai nga agtaktakder iti ruar ti templo

Oktubre 23–29

1 ken 2 Timoteo; Tito; Filemon

“Sika koma ti Ulidan kadagiti Mamati”

Insuro ni Pablo a “naited dagiti nasantuan a kasuratan … a pagadalan iti kinalinteg” (2 Timoteo 3:16). No adalem dagitoy a surat, utobem no kasano a maparegtatayo dagiti ubbing nga agbiag a sililinteg.

icon iti panagbibinninglay

Yawis ti Panagbibinninglay

Kiddawen kadagiti ubbing a mangisarita maipapan iti maysa a tao a nasayaat nga “ulidan kadagiti mamati” kadakuada. Ania ti ar-aramidenda tapno agbalin a nasayaat nga ulidan iti dadduma?

icon iti panangisuro

Isuro ti Doktrina: In-inaudi nga Ubbing

1 Timoteo 3:1–2; Tito 1:7–9

Idauluan dagiti bishop ti ward kas katulongan ti Dios.

Insuro ni Pablo da Timoteo ken Tito maipapan iti kinapateg dagiti bishop. Kasano a maisurom dagiti ubbing no ania ti aramiden ti bishop? (Maipada ti maysa a branch president iti maysa a bishop.)

Dagiti Mabalin nga Aktibidad

• Mangidrowing iti maysa a simple a ladawan ti bishopmo iti pisarra. Kiddawen kadagiti ubbing a manginagan iti sumagmamano a banag nga ammoda maipapan iti bishop. Ania ti langana? Ania ti aramidenna? Kasano a bendisionanna ti ward? (Masarakam ti sumagmamano a kababalin ti maysa a bishop iti 1 Timoteo 3:1–2 ken Tito 1:7–9.) Bayat ti panagibinglay dagiti ubbing kadagiti kapanunotanda, isurat dagitoy kadagiti panid ti papel ken paikabil dagitoy iti pisarra iti abay ti drowing.

• Isuratmo dagiti pagrebbengan ti maysa a bishop kadagiti panid ti papel—kas iti panangtulong kadagiti ubbing ken agtutubo iti ward, panangawat kadagiti apagkapullo ken daton iti panagayuno, pananginterbyu kadagiti miembro, ken panangtulong kadagiti agkasapulan. Ikabil dagitoy panid ti papel iti maysa a malukong, ken awisem ti tunggal ubing a pumidut iti maysa. Kalpasanna tulongam ti ubing a mangyakem kadagitoy a pagrebbengan a kaduanaka. Ibinglaymo ti pammaneknekmo nga inawagan ti Dios ti bishopyo.

• Awisem dagiti ubbing nga agdrowing iti maysa a ladawan ti bishop nga agserserbi kadagiti miembro ti ward. Isingasingmo nga itedda dagiti drowingda kenkuana tapno agyaman kenkuana. Ania ti maaramidtayo a makatulong kenkuana?

Dua a kabsat a babbai a missionario a makisarsarita iti maysa nga agtutubo a lalaki

“Awan koma ti tao a mangumsi kadagiti agtutubom; ngem agbalinka nga ulidan kadagiti mamati” (1 Timoteo 4:12).

1 Timoteo 4:12

Makapagbalinak nga “ulidan kadagiti mamati.”

Ania ti maaramidmo tapno maparegta dagiti ubbing nga agbalin nga “ulidan kadagiti mamati”?

Dagiti Mabalin nga Aktibidad

• Makipagkanta kadagtii ubbing iti “Do as I’m Doing” (Children’s Songbook, 276). Kiddawen kadagiti ubbing a mangsurot iti pagwadam babaen iti panangaramidda kadagiti aramidem a tignay. Pagsisinublatem dagiti ubbing a mangidaulo kadagiti dadduma pay iti klase iti panangsurot kadagiti tignayda. Basaem ti 1 Timoteo 4:12, ket saludsodem kadagiti ubbing no ania ti maaramidda tapno agbalinda nga ulidan kadagiti dadduma.

• Ibinglaymo ti maysa a padas idi inkarigatam ti agbalin a nasayaat nga ulidan iti maysa a tao wenno idi nagbalin a nasayaat nga ulidan ti maysa a tao kenka. Awisem dagiti ubbing nga agbalin a nasayaat nga ulidan kadagiti miembro ti pamilia ken gagayyemda.

2 Timoteo 3:14–17

Matulongandakto dagiti nasantuan a kasuratan a makasursuro iti kinapudno.

No matulongam dagiti ubbing a masursuroda nga ipateg dagiti nasantuan a kasuratan, dagiti pannursuro iti nasantuan a kasuratan ti mangbendisionto iti biagda kadagiti umay a tawen.

Dagiti Mabalin nga Aktibidad

• I-display ti maysa a set dagiti nasantuan a kasuratan, ket tulongam dagiti ubbing nga agbalin a pamiliar kadagitoy babaen ti panangipakita kadakuada dagiti panid ti paulo ti Biblia, ti Libro ni Mormon, ti Doktrina ken Katulagan, ken ti Perlas a Kapatgan. Awisem ti maysa nga ubing a mangiggem kadagitoy a libro bayat ti panangbasam iti 2 Timoteo 3:15–17. Ibagam kadagiti ubbing no apay nga ipategmo dagiti nasantuan a kasuratan, ket paipeksam kadagiti ubbing ti riknada.

• Kiddawem kadagiti ubbing a mangisarita maipapan iti kapatgan a tagikuada. Ania ti aramidenda iti daytoy? Kasano a tratuenda daytoy? Pagsisinublatem ida nga agiggem kadagiti nasantuan a kasuratan ken siaannad a manglukib kadagiti panid. Ania ti pakausarantayo kadagiti nasantuan a kasuratan? Apay a nasken nga aywanantayo a nasayaat dagitoy?  Paneknekan a naglaon dagiti nasantuan a kasuratan kadagiti kinapudno a kayat ti Nailangitan nga Ama a maammuantayo.

• Tulongam dagiti ubbing a mangparnuay kadagiti tignay a maigiddan kadagiti kanta maipapan kadagiti nasantuan a kasuratan, kas iti “Search, Ponder, and Pray” (Children’s Songbook, 109).

icon iti panangisuro

Isuro ti Doktrina: In-inauna nga Ubbing

1 Timoteo 4:12

Makapagbalinak nga “ulidan kadagiti mamati.”

Ubing unay ni Timoteo para iti maysa a lider ti Simbaan, ngem tinarigagayan ni Pablo a maammuanna a makapagbalin latta ni Timoteo a maysa a pagwadan. Maparegtam dagiti ubbing a mangipakita iti nasayaat a pagwadan kadagiti adda iti aglawlawda.

Dagiti Mabalin nga Aktibidad

• Aggigiddan a basaen ti 1 Timoteo 4:12, ket idawatmo kadagiti ubbing nga agsapul iti innem a wagas a kinuna ni Pablo a pakapagbalinantayo nga “ulidan kadagiti mamati.” Bingayem dagiti ubbing iti kada paris, ken awisem iti tunggal paris nga agpanunot iti maysa a situasion a pakapagbalinanda nga ulidan kadagiti mamati. Kiddawem kadakuada a mangyakem iti situasionda para iti dadduma pay iti klase.

• Saludsodem kadagiti ubbing no kayatda ti mangibinglay iti ania man a padpadas idi inkarigatanda ti agbalin a nasayaat nga ulidan iti dadduma. Ibagam kadakuada no kasano a nagbalinda nga ulidan kadagiti mamati kenka ken no kasano a nadlawmo ti panagbalinda a nasayaat nga ulidan para iti dadduma.

1 Timoteo 6:7–12

Napatpateg dagiti agnanayon a banag ngem iti kuarta.

Ikkan ti lubong iti nangato a prioridad ti kuarta ken dagiti banag a mabalin a gatangen ti kuarta. Kasano a matulongam dagiti ubbing a mangipamaysa iti pokus ken ayatda iti Nailangitan nga Ama ken ni Jesucristo?

Dagiti Mabalin nga Aktibidad

• Awisem dagiti ubbing nga agsarita maipapan iti no ania koma ti gatangenda no adda kadakuada ti amin a kuarta iti lubong. Basaen ti 1 Timoteo 6:7–12 kadagiti ubbing, ken kiddawem kadakuada a manggupgop no ania ti insuro ni Pablo ken ni Timoteo maipapan iti kuarta. Kalpasanna awisem dagiti ubbing a mangbasa kadagiti bersikulo 11–12 manen, nga agsuksukisok kadagiti banag a dinakamat ni Pablo a napatpateg ngem iti kuarta.

• I-display dagiti ladawan dagiti nailubongan a banag (kas iti kuarta, ay-ayam wenno pagraragsakan) ken dagiti agnanayon a banag (kas dagiti pamilia wenno templo). Awisem dagiti ubbing a paglalasinenda dagiti ladawan iti dua a bunton— dagiti banag a mangyasideg kadatayo nga ad-adda ken ni Cristo ken dagiti banag a mabalin a mangyadayo kadatayo ken ni Cristo no ad-adda ti panagayattayo kadagitoy ngem iti panagayattayo Kenkuana. Apay a “ti panagayat iti kuarta … ti ramut iti amin a kinadakes”? Kasano a maparagsaknatayo ti panangipamaysa ken ni Jesucristo.

2 Timoteo 3:14–17

Impaayannatayo ti Nailangitan nga Ama kadagiti nasantuan a kasuratan a makatulong kadatayo a mangammo iti kinapudno manipud iti biddut.

Bayat ti panangisurom kadagiti ubbing maipapan kadagiti nasantuan a kasuratan, sapulem dagiti wagas a pangallukoyam kadakuada a maaddaan iti bukodda a nabileg a padas iti balikas ti Dios.

Dagiti Mabalin nga Aktibidad

• Awisem dagiti ubbing a mangbasa iti 2 Timoteo 3:15–17. Mangitugotka kadagiti ladawan a mangiparang iti estoria manipud iti uppat a pagrukodan a libro dagiti nasantuan a kasuratan [standard works], ket awisem dagiti ubbing a mangala iti maysa a ladawan ket isaritam ti estoria. (Masarakam dagiti ladawan iti Libro ti Arte ti Ebanghelio ken iti Umaykayo, Sumurot Kaniak a material.) Idawatmo kadagiti ubbing a mangibinglay iti ania man a banag nga ammoda maipapan iti libro ti nasantuan a kasuratan. Kasano a dagiti nasantuan a kasuratan ti “makabalin a mamagsirib [kadatayo] a maipaay iti pannakaisalakan”?

• Mangibinglay iti maysa a paggugusto a bersikulo iti nasantuan a kasuratan wenno maysa a padas idi tinulongannaka dagiti nasantuan a kasuratan a mangbukel iti pammatim iti Nailangitan nga Ama ken ni Jesucristo. Awisem dagiti ubbing a mangibinglay iti paggugustoda a bersikulo wenno padas a bukodda.

• Kiddawem iti maysa nga ubing a mangbasa iti Moroni 10:4–5. Ania ti inkari ni Moroni kadagitoy a bersikulo? Saludsodem kadagiti ubbing no kasano a nakagun-odda iti pammaneknek a pudno dagiti nasantuan a kasuratan. Awisem ida nga agbasa wenno agdengngeg a kanayon kadagiti nasantuan a kasuratan ken agsaludsod iti Dios no pudno dagitoy.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada no ania ti nasursuroda maipapan kadagiti nasantuan a kasuratan ken mangsapul iti maysa a bersikulo ti nasantuan a kasuratan a mabalinda nga ibinglay iti klase inton sumaruno a lawas (babaen ti tulong manipud kadagiti nagannak kadakuada, no kasapulan).

Panangpadur-as iti Panangisurotayo

Ibagay dagiti aktibidad tapno maipaay dagiti kasapulan. Imbes a panangibilang kadagitoy a balabala a kas pangiturong a nasken a surotem, usarem koma dagitoy kas maysa a paggapuan dagiti kapanunotan mangpataud iti bukodmo nga inspirasion bayat ti panangutobmo kadagiti kasapulan dagiti ubbing a sursuruam. Mabalinmo nga ibagay dagiti aktibidad a mangisuro kadagiti ubbing iti ania man nga edad.

panid ti aktibidad: isurodatayo dagiti nasantuan a kasuratan iti kinapudno