Oktubre 9–15

Taga Filipos; Taga Colosas

“Maaramidko ti Amin a Bambanag gapu ken Cristo a Mamapigsa Kaniak”

Basaen ti Taga Filipos ken Taga Colosas, a mangpampanunot maipapan kadagiti ubbing a sursuruam. Agkiddawka iti pammaregta maipapan iti no kasano a mangisuro kadakuada kadagiti pagbatayan kadagitoy a sursurat.

Yawis ti Panagbibinninglay

Kiddawen kadagiti ubbing no ania ti inaramidda iti daytoy napalabas a lawas nga agtignay segun iti maysa a banag a nasursuroda iti klase iti napalabas a lawas. Kas pagarigan, kasano a tinulonganda ti maysa a tao a nagkasapulan iti maysa a gayyem?

Isuro ti Doktrina: In-inaudi nga Ubbing

Taga Filipos 1:3–4; Taga Colosas 1:3, 9

Ay-ayaten ken ikarkararagandak dagiti lider iti Simbaan.

Masansan a rugian ni Pablo dagiti sursuratna babaen ti panangyebkasna iti ayat para kadagiti miembro ti Simbaan ken panagibagana kadakuada nga inkararaganna ida. Ibilangmo no kasano a matulongam dagiti ubbing a makaawat nga ay-ayaten ida dagiti liderda ti Simbaan.

Dagiti Mabalin nga Aktibidad

• Basaen ti Taga Filipos 1:3–4 ken Taga Colosas 1:3, 9 iti napigsa, ket kiddawen kadagiti ubbing nga agdalikepkep ken idumogda dagiti uloda tunggal kanito a mangngegda dagiti balikas nga agkararag, agkarkararag, ken kararag. Ilawlawag nga inkararagan ni Apostol Pablo dagiti miembro ti Simbaan, kas iti panangikararagan kadatayo dagiti lider iti Simbaantayo iti agdama.

• Ipakitam ti maysa a ladawan ni Jesucristo, ken basaem ti sumagmamano a bersikulo ti nasantuan a kasuratan a mangiladawan Kenkuana nga agkarkararag para iti maysa a tao (kas pagarigan, Lucas 22:32; 3 Nephi 19:21, 23). Ania ti indawat ni Jesus idi inkararaganna dagiti dadduma?

• Tulongam dagiti ubbing a manginagan iti sumagmamano kadagiti liderda iti Simbaan, kas presidente ti Primary, ti bishop, ken ti Presidente ti Simbaan. Ilawlawag a kiddawen dagitoy a lider iti Nailangitan nga Ama a bendisionanna dagiti ubbing ken tulonganna ida nga agbiag a sililinteg. Ibilang ti panagibagam kadagiti ubbing no ania ti isaom no agkararagka para kadakuada.

Taga Filipos 4:4, 8

Makapagrag-oak iti Apo.

Inallukoy ni Pablo dagiti Santo nga agrag-o—uray pay no naipasango kadakuada dagiti narigat a pannubok ken adda ni Pablo mismo iti pagbaludan. Kasano a matulongamto dagiti ubbing a makitada a ti panangsurot ken ni Jesus ti mangisangbay iti rag-o?

Dagiti Mabalin nga Aktibidad

• Kiddawen kadagiti ubbing a dumngeg iti naulit a balikas bayat ti panangbasam iti Taga Filipos 4:4. Kiddawen kadagiti ubbing a mangipakita kenka no ania ti aramidenda no agrag-oda. Ibagam kadagiti ubbing no apay nga “agrag-oka iti Apo”—no apay nga agragsakka gapu ken ni Jesucristo. Awisem dagiti ubbing a mangibinglay no ania ti riknada maipapan ken ni Jesus.

• Ipakitam dagiti banag wenno ladawan a mangibagi kadagiti banag a mangtulong kenka nga “agrag-o iti Apo” (Tag Filipos 4:4), kas kadagiti pinarsuana, ti maysa a templo, ti Panagungarna, wenno ti maysa a pamilia. Pagsisinublatem dagiti ubbing a mangpili iti maysa a ladawan wenno banag, ket kalpasanna ibagam kadakuada no apay a paragsakennaka daytoy. Awisem ida a mangibinglay kadagiti banag a makatulong kadakuada nga agrag-o iti Apo.

• Basaen ti Taga Filipos 4:8 nga aggigiddan ken tulongam dagiti ubbing nga agpanunot kadagiti banag a maibagay kadagiti nailadawan iti bersikulo (kitaen met iti Pagannurotan ti Pammati 1:13). Awisem dagiti ubbing a mangidrowing kadagiti ladawan dagitoy a banag.

Taga Colosas 1:23; 2:6–7

Ti pammatik nasken a “maparamut” ken ni Jesucristo.

No bangonen dagiti ubbing ti biagda ken ti pammatida iti Mangisalakan, kabaelandanto a sarkedan dagiti pakarikutan ti biag.

Dagiti Mabalin nga Aktibidad

• Ipakitam ti ladawan iti maysa a kayo manipud iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia bayat ti panangbasam kadagiti kangrunaan a ragup ti balikas manipud iti Taga Colosas 1:23; 2:6–7 (wenno ipabuyam ti video “Spiritual Whirlwinds” on ChurchofJesusChrist.org). Ania ti mapasamak iti daytoy a kayo no dimteng ti maysa a bagyo ket awanan kadagiti napigsa a ramut ti kayo? Pagtakderem dagiti ubbing ken agpamarangda a maysa a kayo na addaan kadagiti nakapsut a ramut iti bagyo ken kalpasanna agpammarangda a maysa a kayo nga addaan kadagiti napigsa a ramut. Paneknekan a ti pammatitayo iti Mangisalakan ket makatulong kadatayo nga agbalin a kas iti kayo nga addaan kadagiti napigsa a ramut. Kalpasanna masarkedantayo dagiti naespirituan a “bagyo,” kas kadagiti sulisog ken narigat a panawen.

• Awisem ti maysa nga ubing nga agdrowing iti maysa a kayo iti pisarra. Kiddawen kadagiti ubbing a manginagan iti sumagmamano a banag a mabalinda nga aramiden tapno “maparamut” ken ni Jesucristo. Tunggal kanito a manginagan ti maysa nga ubing iti maysa a banag, awisem isuna nga manginayon iti ramut iti drowing.

Isuro ti Doktrina: In-inauna nga Ubbing

Taga Filipos 4:4–13

No adda pammatik ken ni Jesucristo, mabalinko ti agragsak uray no kabayatan dagiti narigat a panawen.

Nagsagaba ni Pablo iti adu a pannubok, ngem naragsak isuna gapu ta adda pammatina ken ni Jesucristo.

Dagiti Mabalin nga Aktibidad

• Kiddawen kadagiti ubbing a mangipapan nga addada iti pagbaludan, a kas ken ni Apostol Pablo idi inaramidna dagiti Sursurat kadagiti taga Filipos. Basaen ti Taga Filipos 4:4–13 kadagiti ubbing ken kiddawen kadakuada nga agsapul kadagiti balikas nga “agrag-o,” “talna,” ken “mapnek.” Apay a kabaelan ni Pablo ti agrag-o ken mangrikna iti talna uray no adda iti pagbaludan? Tulongam dagiti ubbing nga agsapul kadagiti balikas nga “Apo,” “Dios,” ken “Cristo” kadagiti bersikulo. Tulongam ida a makaawat a ti pammati ni Pablo ken ni Jesucristo ti namagbalin kenkuana tapno agrag-o.

• Awisem dagiti ubbing a mangtulong kenka a mangileppas kadagiti binatog kas iti sumaganad: “Mabalin nga addaak iti nasipnget ket makitak pay laeng no addaanak iti . Mabalin nga addaak iti ruar iti napudot nga aldaw ket mariknak pay laeng ti lamiis no addaanak iti . Mabalin a maadaanak kadagiti narigat a panawen ket makasapulak pay laeng iti rag-o no .” Ania ti isingasing ti Taga Filipos 4:4–13 a maaramidtayo a mangsapul iti rag-o? Awisem dagiti ubbing a mangibinglay iti sumagmamano a himno wenno nasantuan a kasuratan maipapan ken ni Jesus a makatulong kadakuada a mangrikna iti rag-o kabayatan dagiti narigat a panawen.

Taga Filipos 4:8

Mabalinko ti “agpanunot” kadagiti banag a pudno, napudno, ken natarnaw.

Masansan a maipasango dagiti ubbing kadagiti banag a dakes ken narugit. Mabalinmo a tulongan ida a mangsapul kadagiti makaitag-ay ken nainsagudayan a banag.

Dagiti Mabalin nga Aktibidad

• Kiddawem iti maysa nga ubing a mangbasa iti Taga Filipos 4:8 iti napigsa idinto a sapulen dagiti dadduma dagiti balikas iti Pagannurotan ti Pammati 1:13 nga agpada wenno agkaasping. Awisem iti maysa a tao a mangisurat kadagitoy a balikas iti pisarra. Saludsodem kadagiti ubbing no ania ti kaipapanan dagiti ladawan, ken tulongam ida no kasapulan. Apay a nasken a “panunotentayo” dagitoy a banag? Kasano a mabalintayo a “tun-oyan” dagitoy?

• Kiddawen kadagiti ubbing a manginagan kadagiti banag a maibagay kadagiti panangiladawan iti Taga Filipos 4:8. Awisem ida a mangpatalinaed iti listaan iti daytoy a lawas iti ania man a banag a madlawda a maibagay kadagitoy a pannakailadawan. Allukoyem ida a mangitugot kadagiti listaanda iti Primary inton sumaruno a lawas ken ibinglayda no ania ti nasarakanda.

Taga Colosas 1:23; 2:6–7

Ti pammatik nasken a “maparamut” ken ni Jesucristo.

Padasen ni Satanas a pakapsuten ti pammati dagiti ubbing babaen kadagiti pannulisog ken palso a doktrina. Kasano a maparegtam dagiti ubbing a mangpapigsa iti pammatida iti Mangisalakan tapno “dida pakuti iti pananginanama iti ebanghelio”? (Taga Colosas 1:23).

Dagiti Mabalin nga Aktibidad

• Awisem dagiti ubbing nga agdrowing kadagiti ladawan a mangibagi kadagiti kinapudno a masarakanda iti Taga Colosas 1:23; 2:6–7. Ipabinglay kadagiti ubbing dagiti ladawan iti klase ken pailawlawag dagiti kinapudno a mangibagi kadagiti ladawanda.

• Ipabuyam ti video a “Spiritual Whirlwinds.” Ania dagiti sumagmamano a sulisog ken palso a doktrina iti lubong iti agdama a mabalin a mangpakapsut iti pammatitayo? Allukoyem dagiti ubbing a mangisurat iti maysa a banag a mabalinda nga aramiden a mangpapigsa iti pammatida tapno “maparamutda” (Taga Colosas 2:7) ken ni Jesucristo.” Idawatmo kadakuada a mangi-display iti daytoy iti lugar a makitadanto daytoy iti inaldaw.

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada no ania ti nasursuroda maipapan ken ni Jesucristo. Mabalinda nga usaren ti panid ti aktibidad itoy a lawas wenno ti nasantuan a kasuratan a binasada kabayatan ti klaseda ita nga aldaw.

Panangpadur-as iti Panangisurotayo

Nausioso dagiti ubbing ken makasursuroda babaen kadagiti baro ken nadumaduma a padas. Usarem dagiti aktibidad a makatulong kadagiti ubbing nga aggunay, agusar iti amin a panagriknada, agsukisok, ken agpadas kadagiti baro a banag. Makatulong dagiti singasing iti “Panangipaay kadagiti Kasapulan dagiti In-inaudi nga Ubbing” iti rugi daytoy a resource. (Kitaen iti Panangisuro iti Wagas ti Mangisalakan, 25–26).)