Oktubre 9–15

Taga Filipos; Taga Colosas

“Maaramidko ti Amin a Bambanag gapu ken Cristo a Mamapigsa Kaniak”

Kaano ti naudi a gundaway a binasam dagiti naespirituan nga impresion a naisuratmo kabayatan ti panagadalmo iti Baro a Tulag? Mabalin a makatulong nga irebyum dagiti parikna nga aw-awatem.

Isuratmo dagiti Impresionmo

Insurat ni Pablo dagiti suratna kadagiti Taga Filipos ken Taga Colosas bayat ti kaaddana iti pagbaludan iti Roma. Ngem awan kadagitoy a surat ti galad a mabalin a namnamaen manipud iti maysa a tao iti pagbaludan. Nagsarita ni Pablo iti ad-adu pay maipapan iti rag-o, panagrag-o, ken panagyaman ngem iti inaramidna maipapan iti rigat ken pannubok: “ni Cristo naikasaba,” kinunana, “ket iti daytoy agragragsakak, wen, ket agragsakakto” (Taga Filipos 1:18). Ken “uray no awanak a sibabagi, ngem adda ti espirituk kadakayo, a siraragsak ken sikikita … ti kinatibker ti pammatiyo ken Cristo” (Taga Colosas 2:5). Awan duadua, “ti talna ti Dios” a napadasan ni Pablo kadagiti narigat a kasasaadna “daeganna ti amin a pannakaawat” (Taga Filipos 4:7), ngem nupay kasta maysa daytoy a kinapudno. Kadagiti bukodtayo a pannubok, makariknatayo iti daytoy met la a kappia ken “agragsaktayo iti Apo iti kankanayon” (Taga Filipos 4:4). Kabaelantayo, kas inaramid ni Pablo, no naan-anay nga agpannuraytayo ken ni Jesucristo, “a kenkuana maaddaantayo iti pannakasubbot” (Taga Colosas 1:14). Mabalintayo nga isao, kas inaramid ni Pablo, “Mabalinak dagiti amin a bambanag gapu ken Cristo a mamapigsa kaniak” (Taga Filipos 4:13; kitaen met iti Taga Colosas 1:11).

Dagiti Kapanunotan para iti Bukod a Panagadal iti Nasantuan a Kasuratan

Taga Filipos 2:5–11; Taga Colosas 1:12–23

Naipasdek ti pammatik ken ni Jesucristo.

Kinuna ni Presidente Russell M. Nelson nga idi impokusna ti panagadalna iti nasantuan a kasuratan kadagiti bersikulo maipapan ken ni Jesucristo, adda kasta nga epektona kenkuana ta nariknana a kasla “maysa a naiduma a lalaki!” Russell M. Nelson, (“Drawing the Power of Jesus Christ into Our Lives,” Liahona,” Mayo 2017, 39). Ibilang ti panangsurot iti pagwadanna bayat ti panangbasam iti Taga Filipos ken Taga Colosas (kitaen nangnangruna iti Taga Filipos 2:5–11; Taga Colosas 1:12–23). Ania ti masursurom maipanggep iti Mangisalakan? Kasano a matulongannaka dagitoy a kinapudno nga agbalin a “naiduma a lalaki” wenno babai?

Taga Filipos 2:12–13

“Aramiden[tayo] kadi ti bukodtayo a pannakaisalakan”?

Usaren ti sumagmamano a tao ti ragup ti balikas nga “aramidenyo ti bukodyo a pannakaisalakan” (Taga Filipos 2:12) a mangsuporta iti kapanunotan a maisalakantayo laeng babaen dagiti bukodtayo a panagkagumaan. Usaren dagiti dadduma ti pannursuro ni Pablo—“gapu iti parabur naisalakankayo gapu iti pammati” (Taga Efeso 2:8) kayatna a sawen a saan a kasapulan ti panagaramid para iti pannakaisalakan. Nakalawlawag nga isuro dagiti nasantuan a kasuratan, agraman dagiti sinurat ni Pablo, agpada a panagkasapulan iti parabur ni Jesucristo ken bukod a panagkagumaan tapno umawat iti pannakaisalakan. Uray pay kadagiti kasayaatan a panagkagumaantayo nga aramiden ti pannakaisalakantayo, “ti Dios ti mamagaramid kadakayo” (2:13; kitaen met iti Taga Filipos 1:6; 2 Nephi 25:23; Bible Dictionary, “Grace”).

Taga Filipos 3:4–14

Kapateg iti tunggal sakripisio ti ebanghelio ni Jesucristo.

Adu ti insuko ni Pablo idi napasurot iti ebanghelio ni Jesucristo, a pakairamanan ti maimpluensia a lugar nga iggemna iti gimong dagiti Judio kas maysa a Fariseo. Iti Taga Filipos 3:4–14, sapulem no ania ti nagun-od ni Pablo gapu ta natallugod a nagaramid kadagiti sakripisio para iti ebanghelio. Kasano ti nariknana maipapan kadagiti sakripisiona?

Kalpasanna ibilangmo ti bukodmo a kinadisipulo. Ania ti insakripisiom para iti ebanghelio ni Jesucristo? Ania ti naawatmo? Adda kadi dagiti mainayon a sakripisio a mariknam a kasapulam nga aramiden tapno agbalin a maysa a napaspasnek a disipulo ti Mangisalakan?

Kitaen met iti 3 Nephi 9:19–20; Doktrina ken Katulagan 58:2–5; Taylor G. Godoy, “One More Day,” Liahona, Mayo 2018, 34–36.

Taga Filipos 4:1–13

Masarakak ti rag-o ken ni Cristo, ania man dagiti kasasaadko.

Ti biag ni Pablo ti nalawag a pannakailadawan ti kinapudno nga inyebkas ni Presidente Russell M. Nelson: “No naipamaysa ti biagtayo ken ni … Jesucristo ken ti ebangheliona, mariknatayo ti rag-o ania man ti mapaspasamak—wenno saan a mapaspasamak—iti biagtayo. Umay ti rag-o manipud ken gapu Kenkuana” (“Joy and Spiritual Survival,” Liahona,, Nob. 2016, 82).

Bayat ti panangbasam iti taga Filipos—nangnangruna iti kapitulo 4—sapulem dagiti palawag a makatulong kenka a mangsarak iti rag-o iti ania man a kasasaad ti biagmo. Kaano a napadasamon “ti kappia ti Dios” kabayatan ti mapannubok a panawen? (bersikulo 7). Kaano a nasarakam ti pigsa “babaen ken ni Cristo” tapno mangaramid kadagiti narigat a banag? (bersikulo 13). Apay iti panagkunam a napateg ti “mapnek” iti amin a kasasaad? (bersikulo 11). Kasano a matulongannaka ti panangtulad kadagiti kababalin iti bersikulo 8 a mangsapul iti rag-o kadagiti kasasaadmo?

Kitaen iti Alma 33:23; Dieter F. Uchtdorf, “Grateful in Any Circumstances,” Liahona, Mayo 2014, 70–77.

Taga Colosas 3:1–17

Agbalin a “baro” dagiti disipulo ni Jesucristo bayat ti panagbiagda iti ebangheliona.

Kasano a maibagam a tultulongannaka ni Jesucristo nga agbalin a “baro a lalaki [wenno babai]”? Maysa a wagas a mangutob iti daytoy ket agsukisok iti Taga Colosas 3:1–17 ken agaramid iti listaan dagiti ugali, kababalin, ken tignay ti “lakay a tao” ken sabali pay a listaan dagiti ugali, kababalin, ken tignay ti “baro a tao.”

Isuratmo dagiti kapanunotam maipapan no kasano a balbaliwannaka ti Mangisalakan, tapno marebyum ida iti masakbayan ket utobem no kasano a dumurdur-aska.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Taga Filipos.Mabalin a madlaw ti pamiliam dagiti balikas a rag-o wenno agrag-o a masansan a maulit iti Taga Filipos. Tunggal makitam ti maysa kadagitoy a balikas, mabalinmo ti agsardeng ket paglilinnawagan no ania ti insuro ni Pablo maipapan iti no kasano ti agsapul iti rag-o.

Taga Filipos 2:14–16.Kasanotayo nga “aglawag a kasla silaw iti lubong”?

Taga Filipos 4:8.Nalabit a mailasin ti pamiliam dagiti banag a “mapanunot” a maikanatad kadagiti panangiladawan iti daytoy a bersikulo (kitaen met iti Pagannurotan ti Pammati 1:13). Kasano a naparaburan ti pamiliam babaen ti panangsurot iti balakad ni Pablo?

Taga Colosas 1:23; 2:7.Nalabit a mabasa ti pamiliam dagitoy a bersikulo a nakatugaw iti lawlaw ti kayo wenno kabayatan ti panangkitkita iti maysa a ladawan ti kayo (kas iti maysa a naikadua iti daytoy a balabala). Ania ti kayat a sawen ti “naipasdek” ken “maparamut” ken ni Cristo? Kasano a matulongantayo ti maysa ken maysa a mangpabileg kadagiti naespirituan a ramuttayo?

Taga Colosas 2:2–3.Mabalin a magustuan ti pamiliam ti mangpunno iti maysa a “treasure chest” kadagiti banag a mangibagi iti “kinabaknang” ken “gameng ti sirib ken pannakaammo” a masarakam iti ebanghelio.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “Rejoice, the Lord Is King!,” Hymns, no. 66.

Panangpadur-as iti Panangisurotayo

Agbiagka iti pammaneknekmo. “Mangisuroka no aniaka,” insuro ni Elder Neal A. Maxwell. “Dagiti kababalinmo ti ad-adda a malaglagipto … ngem iti maysa a naipangpangruna a kinapudno iti naipangpangruna nga adalen” (iti Panangisuro iti Wagas ti Mangisalakan, 13).

Insuro ni Pablo a nasken a “maparamut” ti pammatitayo ken ni Jesucristo (Taga Colosas 2:7).