tallo a babbai a magmagna iti ruar ti templo

Oktubre 23–29

1 ken 2 Timoteo; Tito; Filemon

“Sika Koma ti Ulidan kadagiti Mamati”

No dadduma makatulong ti wagas ti panagadalmo iti nasantuan a kasuratan no adda maysa wenno ad-adu pay a saludsod iti panunotmo. Awisem ti Espiritu a mangtarabay kenka kadagiti sungbat bayat ti panagadalmo, ket isuratmo ti ania man a pammaregta a maawatmo.

Isuratmo dagiti Impresionmo

Kadagiti surat ni Pablo a sinuratna kada Timoteo, Tito, ken Filemon, mataldiapantayo iti puso ti maysa a katulongan ti Apo. Saan a kas iti dadduma pay a surat ni Pablo kadagiti sibubukel a kongregasion, naisurat dagitoy kadagiti indibidual—dagiti nasinged a gagayyem ken kakadua ni Pablo iti aramid ti Dios—ken maipada ti panagbasa kadagitoy iti panagdengngeg iti maysa a panagsasarita. Makitatayo ni Pablo a mangal-allukoy kada Timoteo ken Tito, dua a lider ti kongregasion, iti panagserbida iti Simbaan. Makitatayo isuna nga agpakpakaasi iti gayyemna a ni Filemon a makitunos ti padana a Santo ken tratuenna daytoy kas maysa a kabsat iti ebanghelio. Saan a direkta a naiturong kadatayo dagiti balikas ni Pablo, ket mabalin a saanna a ninamnama nga iti maysa nga aldaw basaento ida ti adu a tattao. Ngem masarakantayo kadagitoy a sursurat ti balakad ken pammaregta para kadatayo, ania man ti mabalin a bukodtayo a panagministro iti panagserbi ken ni Cristo.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Asino da Timoteo ken Tito?

Nakipagserbi a kadua ni Pablo da Timoteo ken Tito iti sumagmamano a panagdaliasatna a kas misionario. Kabayatan iti panagserbida, nagun-odda ti respeto ken panagtalek ni Pablo. Idi agangay naawagan ni Timoteo kas maysa a lider ti Simbaan iti Efeso, ket naawagan ni Tito kas maysa a lider iti Creta. Kadagitoy a surat, nangted ni Pablo kada Timoteo ken Tito iti pangiwanwan ken pammaregta maipanggep kadagiti pagrebbenganda, a nakairamanan ti pannakaikasaba ti ebanghelio ken pannakaawag dagiti lallaki nga agserbi kas bishop.

Kitaen met iti Pangiwanwan iti Nasantuan a Kasuratan, “Dagiti Surat ni Pablo,” “Timoteo,” “Tito.”

dua a missionario a makisarsarita iti maysa a lalaki

“Awan koma ti pakaumsian iti kinaubingmo; no di ket sika koma ti ulidan kadagiti mamati” (1 Timoteo 4:12).

1 Taga Tesalonica 4:10–16

“Sika koma ti ulidan kadagiti mamati.”

Ubing pay idi ni Timoteo, ngem ammo ni Pablo a kabaelanna ti agbalin a naindaklan a dadaulo ti Simbaan iti baet ti kinaagtutubona. Ania a balakad ti inted ni Pablo ken ni Timoteo iti 1 Timoteo 4:10–16? Kasano a matulongannaka daytoy a balakad a mangiturong iti dadduma iti Mangisalakan ken iti ebangheliona?

Kitaen met iti Alma 17:11.

2 Timoteo

“Ta saannatay nga inikkan ti Dios iti espiritu ti kinatakrot; no di ti kinatibker, ken ti ayat ken ti naimbag a nakem.”

2 Timoteo daytoy ti maudi a surat nga insurat ni Pablo, ken kasla ammona nga ababan ti panawenna iti daga (kitaen iti 2 Timoteo 4:6–8). Kasano ti narikna ni Timoteo idi maammuanna nga awanton ti pangtalkanna a mannursuro ken lider? Ania ti kinuna ni Pablo a nangallukoy kenkuana? Mabalinmo pay a basaen iti panunotmo dagiti bukodmo a karit ken buteng. Ania dagiti mensahe ti namnama ken pangparegta nga adda iti Apo para kenka iti 2 Timoteo?

Kitaen met iti Kelly R. Johnson, “Enduring Power,” Liahona, Nob. 2020, 112–14.

2 Timoteo 3

Ti panagbiag iti ebanghelio ti mangted iti talged manipud kadagiti naespirituan a pagpeggadan kadagiti maudi nga aldaw.

Agbibiagtayo “kadagiti maudi nga aldaw” a nasao ni Pablo, ket dimtengen dagiti “napeggad a panawen” (2 Timoteo 3:1). Bayat ti panangbasam iti 2 Timoteo 3, isuratmo dagiti peggad a nadakamat kadagiti ud-udina nga aldaw (kitaen met iti 1 Timoteo 4:1–3):

Kabaelanyo kadi a panunoten dagiti pagarigan kadagitoy peggad iti lubong iti aglawlawmo—wenno iti bukodmo a biag? Kasano dagitoy a peggad, kas kadagiti nailadawan a tattao iti bersikulo 6, “a sumrek iti [balaymo], ket mangitunda [kenka] a balud”? Ania ti balakad a masarakam iti 2 Timoteo 3, ken iti sadino man a lugar kadagitoy a surat, a makapagtalinaed kenka ken ti pamiliam a natalged manipud kadagitoy a naespirituan a pagpeggadan? (kitaen iti, kas pagarigan, 1 Timoteo 1:3–11; 2 Timoteo 2:15–16; Tito 2:1–8).

Asino ni Filemon?

Maysa a Kristiano ni Filemon a napasurot iti ebanghelio babaen ken ni Pablo. Agtagikua ni Filemon iti maysa nga adipen nga agnagan iti Onesimo, a kasla naglibas a napan iti Roma. Idiay a naam-ammo ni Onesimo ni Pablo ket napasurot iti ebanghelio. Insubli ni Pablo ni Onesimo ken ni Filemon babaen iti surat a mangal-allukoy ken ni Filemon nga awatenna ni Onesimo a “saanen a kasla adipen, no di ket napatpateg ngem adipen, kabsat a dungdunguen” (Filemon 1:16).

Filemon

Agtritrinnato dagiti disipulo ni Jesucristo kas agkakabsat a lallaki ken babbai.

Bayat ti panagbasam iti surat ni Pablo ken ni Filemon, utobem no kasano a mabalinmo nga aramaten ti balakadna kadagiti pannakilangenmo iti dadduma. Iti baba ti sumagmamano a saludsod a mabalinmo nga ibilang:

• Dagiti bersikulo 1–7: Ania ti isingasing kenka dagiti balikas a kas “pada a trabahador” ken “pada a soldado” maipapan kadagiti pannakilangenmo kadagiti Santo? Kaano a nariknam a “naliwliwanaka” ti maysa a kabsat a lalaki wenno babai ken ni Cristo?

• Dagiti bersikulo 8–16: Ania ti kayat a sawen ti “mangibilin” ken “dawaten”? Apay a pinili ni Pablo a dawaten ken Filemon imbes a mangibilin kenkuana? Ania ti ninamnama ni Pablo a maipatungpal babaen ti panangibaonna ken ni Onesimo nga agsubli ken ni Filemon?

• Bersikulo 16: Ania ti kayat a sawen ti “kasla kabsat a dungdunguen … iti biang ti Apo”? Adda kadi maysa nga am-ammom a nasken nga awatem iti kastoy a wagas?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Timoteo 2:9–10.Ania ti kayat a sawen ti “agkawes [ti bagbagitayo] … kadagiti nasayaat nga aramid”? Ania dagiti sumagmamano a nasasayaat nga aramid a mabalin nga aramiden ti pamiliam iti daytoy a lawas? Mabalinyo ti aggigiddan nga agkansion iti maysa a kanta maipapan iti panagaramid iti naimbag kas iti “Have I Done Any Good?” (Hymns, no. 223).

1 Timoteo 4:12.Tapno matulongan dagiti miembro ti pamiliam nga agtarigagay nga agbalin nga “ulidan kadagiti mamati,” ibilangmo ti panangawis kadakuada a mangidrowing iti ladawan dagiti tao a nagbalin a nasayaat a pagwadan kadakuada. Kasano a naparegtanatayo dagitoy a tao a sumurot ken ni Jesucristo? Makaited ti mensahe ni Presidente Thomas S. Monson “Be an Example and a Light” (Liahona, Nob. 2015, 86–88) iti sumagmamano a kapanunotan iti no kasano ti agbalin a pagwadan iti dadduma.

1 Timoteo 6:7–12.Apay iti panagkunam a ti “ayat iti pirak isu ti amin a ramut ti amin a dakes”? Ania dagiti pagpeggadan ti panangipamaysa kadagiti biagtayo iti pirak ken sanikua? Kasano nga agbalintayo a kuntento kadagiti bendision nga adda kadatayo?

2 Timoteo 3:14–17.Segun kadagitoy a bersikulo, ania dagiti bendision nga umay kadagitay makaammo ken agsursuro kadagiti nasantuan a kasuratan? Mabalin nga ibinglay dagiti miembro ti pamilia dagiti nasantuan a kasuratan a nasarakanda a nangnangruna a “pakairanudan.”

Filemon 1:17–21.Ania ti natallugod nga aramiden ni Pablo para ken ni Onesimo? Kasano a maipada daytoy iti no ania ti sitatallugod nga inaramid ti Mangisalakan para kadatayo? (kitaen met iti 1 Timoteo 2:5–6; Doktrina ken Katulagan 45:3–5). Kasano a masurottayo dagiti pagwadan ni Pablo ken ti Mangisalakan?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Come, Follow Me—For Primary.

Naisingasing a kanta: “Shine On,” Children’s Songbook, 144.

Panangpadur-as iti Panangisurotayo

Mangisuro iti nalawag ken simple a doktrina. Napintas ti ebanghelio iti kinasimplena (kitaen iti Doktrina ken Katulagan 133:57). Imbes a padpadasem a liwliwaen ti pamiliam kadagiti leksion nga agkasapulan iti adu a panagsagana, agkagumaanka a mangisuro iti natarnaw ken simple a doktrina (kitaen iti 1 Timoteo 1:3–7

dua nga ubbing nga agad-adal kadagiti nasantuan a kasuratan

“Ket manipud idi kinaubingmo naammuam dagiti nasantuan a sursurat, a makabalin a mamagsirib kenka a maipaay iti pannakaisalakan gapu iti pammati ken Cristo Jesus” (2 Timoteo 3:15).