Balsamo idiay Galaad, ni Annie Henrie

Oktubre 30–Nobiembre 5

Hebreo 1–6

Ni Jesucristo, “ti Akin-aramid iti Agnanayon a Pannakaisalakan”

Ti panangisurat kadagiti naespirituan a parikna ti mangtulong kenka a mangbigbig no ania ti kayat ti Espiritu Santo nga isuro kenka. Ti panagtignaymo kadagiti impresionmo ti mangipakita iti pammatim a pudno dagita a parikna.

Isuratmo dagiti Impresionmo

Nasken nga isuko ti tunggal maysa kadatayo ti maysa a banag tapno umawat iti ebanghelio ni Jesucristo—dakes man dagita nga ugali, biddut a panamati, naalas a pannakipulapol, wenno sabali pay a banag. Para kadagiti Gentil, iti nagkauna a Simbaan a Kristiano, ti kumbersion kaipapananna ti panangpanaw kadagiti palso a dios. Para kadagiti Hebreo (wenno Judio), ti kumbersion napaneknekan a, no saan a narigrigat, narikrikut bassit. Kalpasan ti amin, dagiti impategda a pammati ken kannawidan ket nagramut iti panagdaydayaw iti pudno a Dios ken dagiti pannursuro dagiti propetana, a nagpaut iti napalabas a rinibu a tawtawen. Ngem insuro dagiti Apostol a natungpal ti linteg ni Moises ken ni Jesucristo ket dayta a nangatngato a linteg ti pagrukodan itan para kadagiti mamati. Ti kadi panangawat iti Kristianismo kaipapananna a nasken nga isuko dagiti Hebreo dagiti immun-una a pammati ken pakasaritaanda? Ti Surat kadagiti Hebreo ket nagpanggep a tumulong a mangrisut kadagiti kasta a saludsod babaen ti panangisuro a napateg amin dagiti linteg ni Moises, dagiti propeta, ken dagiti ordinansa, ngem nain-indaklan ni Jesucristo (kitaen iti Hebreo 1:1–4; 3:1–6; 7:23–28). Kinapudnona, amin dagitoy ket mangitudo ken mangipaneknek a ni Cristo ti Anak ti Dios ken ti naikari a Mesias nga ur-urayen dagiti Judio.

Ti kumbersion, kadagita a nagkauna nga aldaw ken iti agdama, kaipapananna ti panamangbalin ken ni Jesuscristo a sentro ti panagdaydayawtayo ken ti biagtayo. Kaipapananna ti ikakapettayo iti kinapudno ken panangpapanaw kadagiti mangsinga kadatayo manipud Kenkuana, gapu ta Isu ti “akin-aramid ti agnanayon a pannakaisalakan kadagiti isu amin nga agtulnog kenkuana” (Hebreo 5:9).

Dagiti Kapanunotan para iti Bukod a Panagadal iti Nasantuan a Kasuratan

Asino ti nagsurat iti Surat kadagiti Hebreo?

Nagduadua ti sumagmamano nga iskolar no insurat met la ni Pablo ti Surat kadagiti Hebreo. Ti estilo ti pannakaisurat iti Hebreo ket kasla maigiddiat iti dadduma pay a surat ni Pablo, ken saan a ninaganan dagiti kaunaan a bersion ti teksto no asino ti nagsurat. Nupay kasta, gapu ta maipada dagiti kapanunotan a nayebkas iti Hebreo iti dadduma pay a pannursuro ni Pablo, dagiti Santo ti ud-udina nga aldaw, iti panagtungpalda iti kannawidan a Kristiano, ket inawatda nga uray kaskasano a nairaman ni Pablo iti panagsurat iti daytoy a surat.

Kitaen met iti Pangiwanwan iti Nasantuan a Kasuratan, “Dagiti Sursurat ni Pablo.”

Hebreo 1–5

Ni Jesucristo ti “napaypayso a ladawan” ti Nailangitan nga Ama.

Adu a Judio ti marigatan nga umawat a ni Jesucristo ti Anak ti Dios. Makita no kasano a mangipaneknek Kenkuana ti Surat kadagiti Hebreo. Kas pagarigan, bayat ti panangbasam iti umuna a lima a kapitulo, mabalinmo nga ilista dagiti pangawag, akem, kababalin, ken aramid ni Jesucristo a makitam a nadakamat. Ania ti isuro dagitoy a banag maipapan iti Mangisalakan? Ania ti isuroda kenka maipapan iti Nailangitan nga Ama?

Ania ti mainayon dagiti sumaganad a palawag manipud ken ni Elder Jeffrey R. Holland iti pannakaawatmo kadagiti pannursuro kadagitoy a kapitulo? “Ni Jesus … immay tapno mangpasayaat iti pannirigan ti tao iti Dios ken tapno agpakaasi kadakuada nga ayatenda ti Nailangitan nga Amada kas iti kanayon a panagayatna ken kanayon a panagayatnanto kadakuada. … Kasta ti panangtaraon kadagiti mabisin, panagagas iti masakit, panangtubngar iti panaginsisingpet, panangidawdawat iti pammati—daytoy ti panangipakita kadatayo ni Cristo iti wagas ti Ama” (“The Grandeur of God,” Liahona, Nob. 2003, 72).

Hebreo 2:9–18; 4:12–16; 5:7–8

Sinagaba ni Jesucristo ti amin a banag tapno maawatan ken matulongannak no agsagabaak.

Mariknam kadi a mabalin nga “umadanitayo ngarud a sitatalged iti trono ti parabur” ket agkalikagum a manggun-od iti kaasi? (Hebreo 4:16). Ti maysa a mensahe ti Surat kadagiti Hebreo ket iti baet dagiti basbasol ken pagkapsutantayo, makaasidegtayo iti Dios ket magun-od ti paraburna. Ania ti masarakam iti Hebreo 2:9–18; 4:12–16; 5:7–8 a mangpapigsa iti panagtalekmo a tulongannakanto ni Jesucristo kadagiti pannubokmo iti biag? Ibilangmo ti panangisurat iti maysa a journal dagiti kapanunotan ken riknam maipapan iti no ania ti naaramiden ti Mangisalakan para kenka.

Kitaen met iti Mosiah 3:7–11; Alma 7:11–13; 34; Matthew S. Holland, “The Exquisite Gift of the Son,” Liahona, Nob. 2020, 45–47.

Hebreo 3:7–4:11

Sidadaan a magun-od dagiti bendision ti Dios kadagiti “saan a mangpatangken iti puspuso[da].”

Babaen ti naulit a panangisalaysayna iti estoria dagiti nagkauna nga Israelita, ninamnama ni Pablo a maallukoyna dagiti Judio a mangliklik iti biddut nga inaramid dagiti kapuonanda—ti saan a panangawat kadagiti bendision ti Dios gapu iti kaawan ti pammatida. (Mabalinmo a basaen ti estoria ni Pablo a nadakamat iti Numeros 14:1–12, 26–35.)

Ibilangmo no kasano a mayaplikar ti Hebreo 3:7–4:11 kenka. Tapno maaramid daytoy, mabalinmo nga utoben dagiti saludsod a kas kadagitoy:

• Kasano a kinarit dagiti Israelita ti Apo? (kitaen iti Hebreo 3:8–11). Ania dagiti bunga ti kaadda iti natangken a panagpuspuso?

• Kaano nga impalubosko a nagbalin a natangken ti pusok? Adda kadi ania man a bendision a kayat nga ited ti Dios kaniak a diak maaw-awat gapu iti kinaawan ti pammatik?

• Ania ti maaramidko tapno maaddaanak iti nalukneng ken agbabbabawi a puso? (Kitaen iti Ether 4:15; Dagiti Proverbio 3:5–6; Alma 5:14–15).

Kitaen met iti 1 Nephi 2:16; 15:6–11; Jacob 1:7–8; Alma 12:33–36; Neill F. Marriott, “Yielding Our Hearts to God,” Liahona, Nob. 2015, 30–32.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Hebreo 1:8–9.Iti ania a wagwagas a nangipakitaan ni Jesus nga ipatpategna ti kinalinteg ket kagurana ti kinadakes? No addaantayo kadagiti saan a nalinteg a tarigagay, ania ti maaramidtayo a mangbalbaliw kadagitoy?

Hebreo 2:1–4.Makapanunotka kadi iti maysa nga adalen a banag [object lesson] a makatulong iti pamiliam tapno maawatan no ania ti kayat a sawen ti agtalinaed a natibker a kumpet kadagiti kinapudno ti ebanghelio “a nangngegantayo”? Mabalinmo nga iladawan daytoy iti maysa a banag a narigat a kumpetan. Kasano a maipada dagiti panagkagumaantayo a mangpatalinaed iti pammaneknektayo iti panangsippaw ken panangiggem iti daytoy a banag? Kasano a masiguradotayo “dagiti banag a nangngegantayo” ket saan a “mapukaw” nga umadayo kadatayo? (bersikulo 1).

Hebreo 2:9–10.Ti agsukisok iti ragup ti balikas a “kapitan ti pakaisalakananda,” mabalinmo a rugian babaen ti panangilawlawag ti no ania ti aramiden ti maysa a kapitan. Ania ti kaipapanan ti pannakaisalakan? Kasano a mayarig ni Jesucristo a maysa a kapitan para kadatayo ken iti pannakaisalakantayo?

Hebreo 5:1–5.Dagitoy a bersikulo ti makatulong kenka a maaddaan iti panaglilinnawag maipapan iti no ania ti kayat a sawen ti inawagan ti Dios babaen ti maysa a tao nga addaan iti turay. Ania ti masursurotayo manipud iti pagwadan ni Jesucristo maipapan iti panangawat ken panagipatungpal kadagiti takem?

“Awan koma ti mangakem itoy a dayaw no di ti inayaban ti Dios a kas iti pannakaayab ni Aaron” (Hebreo 5:4). Awagan ni Moises ni Aaron iti Panagministro, ni Harry Anderson

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “I Need Thee Every Hour,” Hymns, no. 98.

Panangpadur-as iti Bukod a Panagadal

Padasen ti nadumaduma a pamuspusan. Imbes a kanayon a panagadal kadagiti nasantuan a kasuratan iti isu met la a wagas, ibilang dagiti agduduma a kapanunotan iti panagadal. Para iti sumagmamano a kapanunotan, kitaen iti “Dagiti Kapanunotan a Mangpasayaat iti Bukod a Panagadal” iti rugi daytoy a resource.

Silaw ti Lubong, ni Walter Rane