Ti Nain-inaka a Sagut ti Anak
Babaen ni Jesucristo, makalibastayo kadagiti maikari a sagabaen ken pannakatnag ken maparmektayo dagiti di maikari a sagabaen ti biagtayo.
Bayat ti panangbasak iti Libro ni Mormon para iti lesson iti Come, Follow Me itay naudi a kalgaw, nasdaawak iti kinuna ni Alma nga idi naan-anay a nakarikna iti amin a basolna, “awan ti nain-inaka ken napapait ngem iti saem[na].” 1 Ipudnok, a napateg kaniak dayta a sao maipapan ti nakaro a saem gapu iti panagkarigatak iti dayta a lawas iti pito a milimetro a bato iti kidney. Awan pay nakapadas iti kasta a “naindaklan a banag” no “mapasamak” ti “babassit ken gagangay a banag.” 2
Kaay-ayok pay ti sao ni Alma gapu ta ti balikas a nain-inaka, iti Ilokano a patarus ti Libro ni Mormon, gagangay a mausar a pangiladawan iti bambanag a naisangsangayan ti ngayed ken tan-okna. Kas pagarigan, nadlaw ni Joseph Smith a nagkawes ni anghel Moroni iti roba a “naisangsangayan ti kinapurawna,” “kinapuraw nga awan ti umartap a nakitanan iti daga.” 3 Ngem makailadawan pay ti nain-inaka iti nalaus nga intensidad iti nakabutbuteng a banag. Ngarud, innaig ni Alma ken dagiti nalatak a diksionario ti nain-inaka a saem iti “natutuok,” “nasaplit,” ken “naparigat” iti “kakaruan a wagas.” 4
Ti panangiladawan ti Alma mangyanninaw iti kinapudno nga iti maysa a punto, nasken a marikna ti nakaro a saem ti basol a malabsingtayo. Kasapulan ti hustisia, ken di mabaliwan ti Dios Mismo daytoy. 5 Idi nalagip ni Alma “amin” a basolna—nangruna dagiti nangdadael iti pammati ti dadduma—di maibturan ti saemna, ket ti ideya a panagtakder iti sango ti Dios ti nangpunno kenkuana iti “di mayebkas nga aligagaw.” Tinarigagayanna nga “agpukaw ti kararua ken bagina.” 6
Nupay kasta, kinuna ni Alma a nangrugi a nagbaliw ti amin iti kanito “nalagip[na]” ti “yaay ti maysa a Jesucristo … a mangsubbot iti basbasol ti lubong.” ket “naimpusuan nga inyararaw[na]: O Jesus, sika ti Anak ti Dios, kaasiannak.” Iti dayta a maysa a kapanunotan ken pakaasi, napno ni Alma iti “nalaus a” rag-o “a kas idi pannakapnona idi iti saem[na].” 7
Ditay koma liplipatan a ti mismo a panggep ti panagbabawi ket umawat iti liday ken pagbalinen daytoy a natarnaw a ragsak. Agyaman iti “madagdagus a kinaimbagna,” 8 ti dagus a yaasidegtayo ken Cristo—mangipakita iti pammati Kenkuana ken pudno a panagbalbaliw ti puso—ti dagsen ti basoltayo mangrugi a mapan Kenkuana. Posible laeng daytoy ta Isu nga awan basolna nagtuok iti “di mayebkas a panagsagaba” 9 ti maysa a basol iti lubong dagiti pinarsuana, para iti amin a pinarsuana—maysa a panagsagaba a nakaro unay, a nagruar ti dara iti tunggal teterremanna. Manipud iti bukod a padas, ballaagannatayo ti Mangisalakan, iti agdama a nasantuan a kasuratsn, nga awan ammotayo no kasano ti “kakaro” ti “panagsagabatayo” no ditayo agbabawi. Ngem iti di matarok a kinaparabur ilawlawagna pay a “Siak, a Dios, sinagabak dagitoy a banag, tapno saanda koma nga agsagaba no agbabawida” 10 —panagbabawi a mangpalugod kadatayo a “mangnanam” iti “nalaus a rag-o” a ninanam ni Alma. 11 Para iti daytoy a doktrina laeng, “Masdaawak.” 12 Ngem, sisisiddaaw, idiaya ni Cristo ti ad-adu pay.
No dadduma aggapu ti nakaro a saem saan iti basol ngem iti biddut a di naigagara, ti tignay ti dadduma, wenno puersa a ditayo makontrol. Kadagitoy a kanito, makasangitkayo kas iti nalinteg a Salmista:
“Ti pusok matuokan a siuut-ot itoy unegko: ket dagiti al-aliaw ni patay agpasagda kaniak.
“… Ti pannakaaliaw inaddagannak.
“… O no adda koma payakko a kas kalapati! Iti kasta tumayabak koma nga umadayo ket aginanaak.” 13
Ti medical science, professional counseling, wenno legal rectification makatulong a mangep-ep iti kasta a panagsagaba. Ngem kitaen, amin a nasayaat a sagut—agraman dagitoy—aggapu iti Mangisalakan. 14 Ania man ti gapu dagiti kakaruan a sakittayo, ti kangrunaan a paggapuan ti gin-awatayo ket isu laeng: ni Jesucristo. Isu laeng ti addaan iti naan-anay a bileg ken pangagas a balsamo a mangatur iti tunggal biddut, mangbaliw iti tunggal pagkurangan, mangagas iti sugat, ken mangted iti naitantan a bendision. Kas iti sasaksi idi unana, paneknekak nga “awanantayo ti nangato a saserdote a di mangsagid iti saksakittayo,” 15 ngem ketdi ti naayat a Mannubbottayo a bimmaba manipud iti tronona iti ngato ket mapan nga “agitured iti saem ken rigat ken amin a kita ti sulisog; … tapno maammuanna … no kasano nga alawenna dagiti taona.” 16
Iti asino man ita nga agsakit iti nakaro wenno naiduma ta mariknayo nga awan ti naan-anay a mangbigbig iti pategda, nalabit a hustokayo. Mabalin nga awan miembro ti pamilia, gayyem, priesthood leader—nupay kasta mabalin a sensitibo ken mangpadpadas nga agaramid iti umno—nga ammona ti mariknayo ken nalawag ti balikasna a mangagas kadakayo. Ngem ammuen daytoy: adda maysa a naan-anay a mannakaawat iti pagpaspasaranyo, a “nabilbileg ngem iti amin ditoy daga,” 17 ken isu a “makaaramid iti aglaplapusanan a kinawadwad iti amin a kiddawaen wenno panunoten[yo].” 18 Mapasamakto ti proseso iti wagas ken iskediulna, ngem nakasagana ni Cristo a kanayon nga agasanna ti tunggal aspeto ti sagabaenyo.
No palugodanyo nga aramidenna, makitayonto nga adda kaes-eskan ti panagsagabayo. No maipanggep iti adu a naindaklan a banuar iti Biblia ken dagiti ladingitda, kinuna ni Apostol Pablo a “Ti Dios … nangted iti nasaysayaat a bambanag kadakuada babaen ti panagsagabada, ta no awan panagsagaba saanda a makapagbalin a naan-anay.” 19 Kitaenyo, ti mismo a kinatao ti Dios ken ti plano ti naindagaan a biagtayo ket ragsak, 20 ngem ditayo makapagbalin a naan-anay a tao ti nadiosan a rag-o no awan padas a mangsubok kadatayo no dadduma iti mismo a kaunggantayo. Kas iti inulit nga insurat ni Pablo, ti Mangisalakan Mismo ket naaramid nga agnanayon a “perpekto [wenno naan-anay] babaen dagiti panagsagaba.” 21 Isu nga agannadkayo iti arasaas ni satanas a no nasaysayaatkayo a tao, maliklikanyo dagiti kasta a pannubok.
Nasken a pagkedkedanyo pay ti ulbod nga isingasing dagiti sagabaenyo a dikayo paset dagiti pili ti Dios, nga agpaspasar iti rag-o ken parabur, a di agrigat. Ketdi, kitaenyo ti bagiyo kas iti panagkita ni Juan a Mammaltiing kadakayo iti nangayed a paltiingna iti ud-udina nga aldaw. Ta nakita ni Juan ti “dakkel nga ummong, a di mabilang ti tao, ti amin a pagilian, kakabsat, ken tattao, ken pagsasao, [isu] a nagtakder iti sango ti trono, ken iti sango ti Kordero, nakakawes iti puraw a roba, … [isu] a nangpukkaw iti napigsa a timek, a kunkunana, Pannakaisalakan iti Diostayo.” 22
Ket no masaludsod: “Ania dagitoy a nayurnos iti puraw a roba? Ken naggapuanda?” Immawat ni Juan iti sungbat: “Dagitoy ti naggapu iti nakaro a panagtutuok, ken nanglaba iti robada, ken nangpapudaw manen kadagitoy iti dara ti Kordero.” 23
Kakabsat, ti panagsagaba iti kinalinteg mangtulong iti pannakaikariyo, imbes nga ilasindakayo manipud iti pili ti Dios. Ken aramidenna dagiti karida a kariyo. Kas iti kinuna ni Juan, “dikayton agbisin wenno mawaw; wenno darangenna[kayo] ti init, wenno ania man a pudot. “Ta taraonanna[kayto] ti Kordero nga adda iti trono, ken iturongna[kayto] iti nabiag a pusuak ti danum: ket punasento ti Dios ti amin a lulua kadagiti mata[yo].” 24
“Ket awanton ti patay, wenno ladingit, wenno panagsangit, wenno awanton ti ania man a saem.” 25
Paneknekak a ti di nakapappapati a kinaimbag ni Jesucristo ken Agnanayon a Pannubbotna, maikaritayo a mangsagaba gapu iti pannakaupaytayo ket maparmektayo dagiti sagabaen a mapasarantayo nupay ditayo maikari a mangsagaba ket maparmek. Babaen ti direksionna, ti nadiosan a pagtungpalanyo maysa nga awan kapadana a ngayed ken di mailadawan a rag-o—rag-o a napalaus unay ken naiduma unay kadakayo, mangsubokto “nga awan ti umartap ditoy daga.” 26 Tapno mananamyo daytoy a ragsak ita ken mabsogkayo iti agnanayon, awisenkayo a mangaramid iti inaramid ni Alma: sititibker koma a panunotenyo ti nain-inaka a sagut ti Anak ti Dios kas naipalgak babaen ti ebangheliona itoy, pudno ken sibibiag a Simbaanna. Iti nagan ni Jesucristo, amen.