Nairekomenda iti Apo
Rugianyo ti proseso itan tapno agbalin a “mairekomenda iti Apo” tapno ti Espirituna addanto kadakayo iti kinawadwad.
Naimbag a bigatyo, kakabsat. Kas maysa a disipulo ti Mangisalakantayo, ni Jesucristo, inur-urayko daytoy virtual a panagtitipon manipud iti amin a suli ti lubong para iti daytoy a komperensia.
Nakaskasdaaw unay daytoy a tawen. Para kaniak nangrugi daytoy babaen iti panangibaon ti Umuna a Panguluen kaniak a mangidaton ti nasantuan a templo iti Apo iti Durban, South Africa. Diakto pulos malipatan ti kinangayed ti pasdek. Ngem malaksid iti lugar, ipategkonto a kanayon ti dignidad dagiti tao a nakasagana a nasayaat tapno sumrek iti dayta sagrado a pasdek. Immayda a nakasagana a makiraman iti maysa kadagiti kangayedan a bendision ti Pannakaisubli: ti pannakaidaton ti balay ti Apo. Immayda a napno ti puspusoda iti panagayat Kenkuana ken iti Pannubbbotna. Immayda a napnuan panagyaman iti Ama sadi Langit gapu iti panangtedna kadagiti sagrado nga ordinansa a mangiturong iti pannakaitan-ok. Immayda a maikari.
Naipatakder dagiti templo, sadino man ti yanda, iti ngatuen dagiti wagas ti lubong. Tunggal templo ti Santo ti Ud-udina nga Aldaw iti lubong—amin a168 kadagitoy—agtakderda a kas testamento ti pammatitayo iti biag nga agnanayon ken ti rag-o ti kaaddatayo ditoy a kaduatayo ti pamiliatayo ken ti Nailangitan nga Amatayo. Ti idadar-aytayo iti templo ti mangpadakkel iti pannakaawattayo iti Kinadios ken ti agnanayon nga ebanghelio, ti panagkumittayo nga agbiag ken mangisuro iti kinapudno, ken ti kinatudiotayo a mangsurot iti pagwadan ti Apo ken Mangisalakantayo, ni Jesucristo.
Iti ruar ti tunggal templo iti Simbaan ket makita dagiti maitutop a balikas, “Kinasanto iti Apo [Holiness to the Lord].” Ti templo ket isu ti balay ti Apo ken maysa a santuario manipud iti lubong. Ti Espirituna ti mangsallukob kadagiti agdaydayaw iti uneg dagita sagrado a diding. Itudingna dagiti pagrukodan a pakaserkantayo kas sangailina.
Ti katugangak a lalaki, ni Blaine Twitchell, maysa kadagiti kasayaatan a lalaki a naam-ammokon, insuronak iti maysa a napintas nga adal. Sinarungkaranmi ken ni Sister Rasband idi asidegen daytoy a pumusay. Idi sumrekkami iti kuartona, apagisu met a pumanawen ti bishopna. Idi kablaawanmi ti bishop, napanunotko, “Nagsayaaten a bishop. Adda ditoy nga ag-ministering iti maysa a napudno a miembro ti wardna.”
Kinunak ken ni Blaine, “Di kadi a nagsayaaten nga umay sumarungkar ti bishop.”
Kinitanak ni Blaine ket simmungbat, “Napatpateg pay daytoy nga amang ngem dayta. Dinawatko nga umay ti bishop gapu ta kayatko ti agpa-interview para iti temple recommendko. Kayatko ti mapan a mairekomenda iti Apo.” Ket inaramidna!
Dayta a ragup ti balikas, “nairekomenda iti Apo,” ket nagtalinaed kaniak. Nangted iti sibubukel a maysa a baro a pannirigan maipapan iti regular a pananginterbyu dagiti lidertayo ti Simbaan. Napateg unay ti temple recommend nga iti nagkauna iti Simbaan, agingga iti 1891, tunggal temple recommend ket inendorso ti Presidente ti Simbaan. 1
Para kadagiti agtutubo man wenno nataengan, ti interbyuyo para iti temple recommend saan a maipapan kadagiti aramiden ken saan nga aramiden. Ti maysa a recommend ket saan a maysa a checklist, maysa a hall pass, wenno maysa a tiket para iti espesial a pagtugawan. Addaan daytoy iti nangatngato ken nasansantuan nga amang a maysa a panggep. Tapno maikarika para iti dayaw ti maysa a temple recommend, nasken nga agbiagka a maitunos kadagiti pannursuro ti Ti Simbaan ni Jesucristo dagiti Santo iti Ud-udina nga Aldaw.
Iti interyium addaanka iti gundaway a mangsukisok iti kararuam maipapan iti bukodmo a pammati ken ni Jesucristo ken iti Pannubotna. Addaanka iti bendision a mangipeksa iti pammaneknekmo maipapan ti naisubli nga ebanghelio; ti kinatallugodmo a mangkanunong kadagiti inawagan ti Apo a mangidaulo iti Simbaanna; ti pammatim iti doktrina ti ebanghelio; ti panangipatungpalmo kadagiti pagrebbengam iti pamilia; ken dagiti kababalinmo iti kinapudno, kinadalus iti dayaw, pidelidad, panagtungpal, ken panagtulnog iti Word of Wisdom, ti linteg ti apagkapullo, ken ti kinasagrado ti aldaw ti Sabbath. Dagita dagiti pundasion a pagbatayan ti maysa a biag a maipaay ken ni Jesucristo ken iti aramidna.
Ti temple recommendmo ket mangyanninaw iti nauneg, naespirituan a panggep nga ikarkarigatam ti agbiag kadagiti linteg ti Apo ken mangipateg kadagiti ipatpategna: kinapakumbaba, kinaemma, kinatibker, asi, tured, panangngaasi, panangpakawan, ken panagtungpal. Ken ikumitmo ti bagim kadagita a pagrukodan no ipirmam ti naganmo iti dayta sagrado a dokumento.
Ti temple recommendmo ti manglukat kadagiti ruangan ti langit para kenka ken iti dadduma pay nga addaan kadagiti seremonia ken ordinansa nga addaan iti agnanayon a kinapateg, agraman dagiti panagbuniag, endowment, kallaysa, ken panaglantip.
Tapno “mairekomenda iti Apo” ket mapalagipan no ania ti manamnama iti maysa a Santo iti Ud-udina nga Aldaw nga agtungtungpal iti katulagan. Nakita daytoy ti katugangak a lalaki, ni Blaine, kas napateg a panagsagana para iti aldaw no sipapakumbabanto daytoy nga agtakder iti sango ti Apo.
Ibilangyo idi immuli ni Moises iti Bantay Horeb ken nagparang ni Apo Jehova kenkuana iti maysa a maur-uram a kayo. Kinuna ti Dios kenkuana, “Ikkatem ta sapatosmo iti sakam, ta nasantuan ti daga a pagtaktakderam.” 2
Ti panangikkat kadagiti sapatostayo iti ridaw ti templo ket pananglipattayo kadagiti nainlubongan a tarigagay wenno pagragsakan a mangsinga kadatayo iti naespirituan a panagdur-as, pananglipat kadagita a banag a mangyaw-awan kadatayo iti napateg a biagtayo iti daga, panangrimbaw iti mapannupiat nga ugalitayo ken panagkalikagum a maaddaan iti oras nga agbalin a nasantuan.
Babaen ti nadiosan a plano, ti pisikal a bagitayo ket maysa a pinarsua ti Dios, maysa a templo para iti espiritutayo, ken nasken a matrato iti panagraem. Pudno unay dagiti balikas ti kanta ti Primary: “Maysa a templo ti bagik [a ]nasken nga maaywanan a nasayaat.” 3 Idi nagparang ti Apo kadagiti Nephite, imbilinna, “Mapasantokayo babaen ti panangawat ti Espiritu Santo, tapno makapagtakderkayo nga awan mulitna iti sangok.” 4 “Ania a kita ti tao ti rumbeng a pagbalinanyo?” dinamag ti Apo ket kalpasanna sinungbatanna, “Kas kaniak.” 5 Tapno “mairekomenda iti Apo,” ikarigatantayo ti agbalin a kas Kenkuana.
Malagipko a nangngegko ni Presidente Howard W. Hunter iti umuna a mensahena iti sapasap a komperensia kas maika-14 a Presidente ti Simbaan. Kinunana: “Ti kaunggan a tarigagay ti pusok a maikari koma ti tunggal miembro ti Simbaan a sumrek iti templo. Maragsakan ti Apo no maikari ti tunggal nataengan a miembro—ken agikut—iti maysa nga agdama a temple recommend.” 6 Inayonko pay a ti limited-use recommend ti mangtedto iti maysa a nalawag a dana para kadagiti napateg nga agtutubotayo.
Nalagip ni Presidente Russel M. Nelson dagiti balikas ni Presidente Hunter: “Iti dayta nga aldaw, Hunio 6, 1994, ti temple recommend nga iggemtayo ket nagbalin a naidumduma a banag iti uneg ti pitakak. Sakbay dayta, daytoy ti panangitungpal iti panggep. Daytoy ti pamuspusan tapno makastrekak iti sagrado a balay ti Apo; ngem kalpasan nga inaramidna dayta a waragawag, nagbalinen dayta a pagtungpalan. Nagbalinen a tsapak iti panagtungpal iti maysa a propeta ti Dios.” 7
No dikayo pay nakaawat iti maysa a recommend wenno no nagpason ti recommendyo, agpilakayo iti ridaw ti bishop kas iti panagpila dagiti immuna a Santo iti ridaw ti Templo iti Nauvoo idi 1846. 8 Maibilang dagiti kapuonak kadagiti napudno. Pinanawanda ti napintas a siudadda ken nagpalaudda, ngem ammoda nga adda dagiti sagrado a padas nga agur-uray kadakuada iiti templo. Insurat ni Sarah Rich manipud iti narangkis a pagnaan iti Iowa, “No saan koma a gapu iti pammati ken pannakaammo a naipaay kadakami iti dayta a templo …, ti panagdaliasatmi ket kas koma iti … panagtappuak iti kasipngetan.” 9 Dayta ti pakaikapisantayo no agbibiagtayo nga agmaymaysa nga awan ti inspirasion ken talna a naikari iti templo.
Rugiam ti proseso itan tapno agbalin a “mairekomenda iti Apo” tapno ti Espirituna addanto kenka iti kinawadwad ket dagiti pagrukodanna ti mangtedto kenka iti “talna ti konsiensia.” 10
Dagiti youth leadermo, elders quorum president, Relief Society president, ken ministering brothers ken sisters ket tulongandakanto nga agsagana, ken siaayat a tarabayennakantoo ti bishopmo wenno branch presidentmo.
Mapadpadasantayo ti panawen a nagserra dagiti templo wenno limitado ti pannakausarda. Para ken ni Presidente Nelson ken kadatayo nga agserserbi iti sibayna, ti naparegta a desision a mangiserra kadagiti templo ket “nasaem” ken “napnuan iti panagdanag.” Nagsalsaludsod ni Presidente Nelson iti bagina, “Anianto ngata ti isaok ken ni Propeta Joseph Smith? Anianto ngata ti isaok kada Brigham Young, Wilford Woodruff, ken dagiti dadduma pay a Presidente, agingga ken ni Presidente Thomas S. Monson?” 11
Ita, in-inut ken siyayamankami a mangluklukat manen kadagiti templo para kadagiti panaglantip ken endowment ngem limitado pay laeng.
Ti panagbalin a maikari a dumar-ay iti templo, nupay kasta, ket saan a napasardeng. Yunay-unayko man, makapankayo man iti templo wenno saan, masapulyo iti agdama a temple recommend tapno agtalinaedkayo a natibker iti dana ti katulagan.
Itay napalabas a naladaw a tawen napankami ken ni Sister Rasband iti New Zealand a nagsarita iti dakkel a grupo dagiti babbaro ken babbalasang. Awan ti nalaka nga accessda iti maysa a templo; madama a matartarimaan ti maysa a templo iti Hamilton, ket yur-urayda pay laeng ti groundbreaking para iti templo idiay Auckland. Nupay kasta, inallukoyko ida a mangipabaro wenno umawat iti temple recommendda.
Uray pay saanda a maipakita dagitoy iti templo, maipakitada ti natarnaw a bagbagida iti sango ti Apo ken nakasaganada nga agserbi Kenkuana. Ti pannakaikari a mangiggem iti maysa a temple recommend ket agpada a salaknib manipud iti kabusor, gapu ta nagaramidka iti natibker a panagkumit iti Apo maipapan iti biagmo, ken ti kari a mangkadkaduanto ti Espiritu kenka.
Aramidentayo ti temple work no sukisokentayo dagiti kapuonantayo ken ipatulod ti nagnaganda para kadagiti ordinansa. Nupay nagserran dagiti templotayo, nakapagsukisoktayo latta kadagiti pamiliatayo. Addaan iti Espiritu ti Dios iti puspusotayo, babaen iti panangisaup [proxy], nakatakdertayo para kadakuada a “mairekomenda iti Apo.”
Idi agserserbiak nga Executive Director iti Temple Department, kanayonko a mangngegan ni Presidente Gordon B. Hinckley a mangusar iti daytoy a nasantuan a kasuratan nga insao ti Apo maipapan ti Nauvoo Temple: “Itultuloy koma ti aramid iti templok, ken ti amin nga aramid nga intudingko para kadakayo, ket saan nga isardeng; ket paminduaenyo koma ti kinapasnekyo, ken ti kinapingetyo, ken ti kinaanusyo, ket awanto ti gapuna a mapukawyo ti gunggonayo, kinuna ti Apo ti Pangen.” 12
Naibegkes ti aramidtayo iti templo iti agnanayon a gunggonatayo. Itay nabiit naipasangotayo iti pannubok. Inawagannatayo ti Apo nga agtrabaho kadagiti templo nga addaan iti “kinapasnek … kinaregget, ken kinaanus.” 14 Ti “mairekomenda iti Apo” agkasapulan kadagita a kababalin. Nasken nga agpasnektayo nga agbiag kadagiti bilin, agreggettayo iti atensiontayo kadagiti katulagantayo iti templo, ken agyamantayo iti agtultuloy a panangisuro ti Apo maipanggep kadagitoy ken aganustayo nga aguray iti panaglukat manen dagiti templo iti naan-anay a pannakausarda.
No awagannatayo ti Apo a “paminduaentayo” dagiti panagkagumaantayo, dawdawatenna a padur-asentayo ti kinalintegtayo. Kas pagarigan, mapadur-astayo ti panagadaltayo kadagiti nasantuan a kasuratan, ti panagsukisoktayo iti family history, ken dagiti kararagtayo a sipapammati tapno maibinglaytayo ti ayattayo iti balay ti Apo kadagiti agsagsagana nga umawat ti temple recommend, kangrunaanna kadagiti miembro ti pamiliatayo.
Ikarik kadakayo kas maysa nga Apostol ni Apo Jesucristo, bayat ti panangikarigatanyo a mangpamindua dagiti nalinteg a panagkagumaanyo, mariknayonto ti napabaro ti debosionyo iti Dios nga Ama ken ni Jesucristo, mariknayonto ti kinabuslon ti Espiritu Santo a mangtartarabay kadakayo, agyamankayonto kadagiti sagrado a katulaganyo, ken mariknayonto ti talna iti pannakaammoyo a “nairekomendakayo iti Apo.” Iti nagan ni Jesucristo, amen.