Ti Pangagas a Bileg ni Jesucristo
No umasidegtayo ken ni Jesucristo babaen ti panangaramattayo iti pammati Kenkuana, panagbabawi, ken panagaramid ken panagtungpaltayo kadagiti katulagan, dagiti, dagiti pannakaupaytayo—ania man ti gapuna—ket maagasan.
Manipud pay rugi daytoy a tawen, adu ti inasikasomi a di ninamnama a paspasamak. Ti pannakapukaw ti biag ken pagsapulan gapu iti pandemia ket nakaro a nakaapekto iti komunidad ken ekonomia iti sangalubongan.
Dagiti ginggined, uram, ken layus iti nadumaduma a paset ti lubong, kasta met dagiti didigra, ti nakaipaay kadagiti tao a makarikna iti kinakapuy, kinaawan namnama, ken kinaliday, a masmasdaaw no maisublinto pay iti sigud a biagda.
Isaritak man ti bukodko nga estoria maipapan iti pannakaupay.
Idi ubbing pay dagiti annakmi, inkeddengda ti agadal nga agpiano. Kayatmi iti asawak a ni Rudy nga ipaay daytoy a gundaway kadagiti annakmi, ngem awan ti pianomi. Dimi kabaelan ti gumatang iti maysa a baro a piano, isu a nagsapul ni Rudy iti maysa a segunda mano.
Paskua iti dayta a tawen, sinorpresanakami iti maysa a piano, ket iti panaglabas dagiti tawen, nasursuruan nga agpiano dagiti annakmi.
Idi dimmakkelen dagiti annakmi a lallaki ken pimmanawdan iti balaymi, nataptapukan laeng ti daan a piano isu nga inlakomi daytoy. Naglabas dagiti tawen, ket nakaurnongkami iti kuarta. Maysa nga aldaw kinuna ni Rudy, “Panagkunak, panawenen a gumatangta iti maysa a baro a piano.”
Dinamagko, “Apay a gumatangta iti maysa a baro a piano, no dita met ammo ti agpiano?”
Kinunana, “Ay, ket gumatangta iti maysa a piano nga agtokar nga is-isu! Babaen ti panangusar iti iPad, mabalinmo nga i-program ti piano nga agtokar ti nasursurok nga 4,000 a kanta, agraman dagiti himno, dagiti kanta ti Tabernacle Choir, amin a kanta iti Primary, ken ad-adu pay.”
Nalaing nga agkumbinsir ni Rudy.
Gimmatangkami iti napintas a maysa a baro a player piano, ket kalpasan ti sumagmamano nga aldaw, insangpet ti dua a dadakkel, ken nabaked a lallaki daytoy iti balaymi.
Impakitak kadakuada ti puesto a kayatko a pakaikabilanna ket naglisiak iti dalan.
Nadagsen a maysa a dakkel a piano daytoy, ken tapno makaanay iti ridaw, inikkatda dagiti sakana ket impasikigda nga inkarga iti rabaw ti mowing dolly nga intugotda.
Naipatakder ti balaymi iti medio bangkirig, sa nasapa a nagniebe iti dayta nga aldaw, isu a nabasa ken nagalis ti aglawlaw. Makitayo kadi ti no ania ti naaramid iti daytoy?
Idi ipangato dagiti lallaki ti piano, gimmalis daytoy, ket nangngegko ti dakkel ken napigsa a pannakaibaltogna. Natnag ti piano iti daga manipud iti moving dolly ta nangibati iti dakkel nga likkaong iti paraanganmi.
Kinunak, “Oh, my goodness. OK kayo kadi?”
Agyamanak ta OK met ti dua a lallaki.
Dimmakkel dagiti matada a nagkinnita, sadak kinita ket kinunada, “Dispensarendakami. Isublimi daytoy iti paglakuan ket patawagandakayto iti managermi.”
Kalpasanna makisasaon ti manager ken ni Rudy tapno mangipatulod iti maysa a baro a piano. Nasayaat ken naasi ni Rudy ket kinunana iti manager nga OK lang no tarimnenda lattan ti dadael ket isublida ti isu met la a piano, ngem impapilit ti manager a mangtedda iti maysa a kabarbaro.
Insungbat ni Rudy, “Bassit met ti perdina. Tarimnenyo lattan ket ipanyo ditoy.”
Kinuna ti manager, “Natukkol ti kayona, ket no matukkol ti kayo, madinton ti awengna. Mangipankami ti maysa a baro a piano.”
Kakabsat, ditayo kadi maipada amin iti daytoy a piano, natukkol bassit, nagbirri, ken nadadael, a mariknatayo a ditayton makasubli pay iti sigud? Nupay kasta, no umasidegtayo ken ni Jesucristo babaen ti panangaramattayo iti pammati Kenkuana, panagbabawi, ken panagaramid ken panagtungpaltayo kadagiti katulagan, dagiti pannakaupaytayo—ania man ti gapuna—ket maagasan. Daytoy a proseso, a mangawis iti panangagas a bileg ti Mangisalakan, saan laeng a mangisubli kadatayo no aniatayo idi ngem mangaramid kadatayo a nasaysayaat ngem iti sigud. Ammok a babaen ti Mangisalakantayo, ni Jesucristo mabalin a maaturtayo amin, maaramidtayo a naan-anay, ket ipatungpaltayo ti paggeptayo, kas met laeng iti napintas ti awengna a maysa a baro a piano.
Insuro ni Presidente Russell M. Nelson: “No umay dagiti nakaro a pannubok kadatayo, panawenen a papigsaentayo ti pammatitayo iti Dios, agtrabahotayo a sipapasnek, ken agserbitayo kadagiti dadduma. Sa agasanna ti nasugatan a puspusotayo. Ipaayannatayonto iti talna ken liwliwa. Dinto madadael dagita a naindaklan a sagut, uray pay iti patay.” 1
Kinuna ni Jesus:
“Umaykayo kaniak, dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay kadagiti kararuayo.
“Ta ti sangolko nalaka ken nalag-an ti awitko” (Mateo 11:28–30).
Tapno maagasan ti pannakadadael babaen ti yaasideg Kenkuana, nasken nga adda pammatitayo ken Jesucristo. “Ti kaadda ti pammati ken Jesucristo kayatna a sawen ti panagpannuray a naan-anay Kenkuana—panagtalek iti awan patinggana a bilegna … ken ayatna. Iramanna ti panamati kadagiti pannursurona. Kayatna a sawen ti panangpati a nupay ditayo maawatan ti amin a banag, Isu ket maawatanna. Gapu ta napadasanna amin dagiti saem, rigat, ken sakittayo, ammona no kasano a tulongannatayo a mangrimbaw kadagiti inaldaw a pagrigatantayo.” 2
No umasidegtayo Kenkuana, “mapnotayo iti rag-o, talna, ken liwliwa. Maaramid nga umno ti amin a [rigat ken karit] maipapan iti biag babaen iti Pannubbot ni Jesucristo.” 3 Binalakadannatayo, “Kitaendak iti tunggal panunot; saankayo nga agduadua, saankayo nga agbuteng” (Doktrina ken Katulagan 6:36).
Iti Libro ni Mormon idi ni Alma ken dagiti taona ket dumani parmeken dagiti dagensen a naibaklay kadakuada, nagpakaasi dagiti tao ti tulong. Saan nga inikkat ti Apo dagit dagensenda; ngem inkarina kadakuada:
“Kasta met a palag-anek dagiti dagensen nga adda iti abagayo, tapno diyo ida marikrikna iti kaaddada iti likudyo, uray pay iti pannakaadipenyo; ket aramidek daytoy tapno agbalinkayo a saksi kalpasanna, ken tapno maammuanyo nga awan duadua a siak, ti Apo a Dios, sarungkarak dagiti taok iti panagsagabada.
“Ket ita napasamak a limmag-an dagiti dagensen a naipabaklay ken ni Alma ken dagiti kabsatna; wen, pinatibker ida ti Apo tapno laklakaenda nga ibaklay dagiti dagensenda, ket pinaiturayanda a siraragsak ken siaanus iti amin a pagayatan ti Apo” (Mosiah 24:14–15).
Ti kabaelan ti Mangisalakan a mangagas ken mangpalag-an iti dagensen, insuro ni Elder Tad R. Callister:
“Maysa kadagiti bendision ti Pannubbot ti makaawat iti pangtulong a bileg ti Mangisalakan. Inulit nga imbaga ni Isaias ti pangagas, pangpatalna nga impluensia ti Apo. Pinaneknekanna a ti Mangisalakan ‘maysa a sarikedked ti addaan pannakasapul iti pakarigatanna, maysa a pagkamangan iti bagyo, maysa a paglinongan iti pudot’ (Isaias 25:4). Kadagiti agladladingit, impakdaar ni Isaias nga adda bileg ti Mangisalakan a ‘mangliwliwa iti amin nga agdung-aw’ (Isaias 61:2), ken ‘punasenna ti lua ti isu amin a ruprupa’ (Isaias 25:8; kitaen met iti Apocalipsis 7:17); ‘biagen manen ti espiritu ti napakumbaba’ (Isaias 57:15); ken ‘mamatapat iti puso a nadunor’ (Isaias 61:1; kitaen met iti Lucas 4:18; Salmo 147:3). Nasakup unay ti pangtulong a bilegna ta mapagsinnukatna ‘ti ngayed iti dapo, ti lana ti rag-o iti panagladingit, iti pagan-anay ti pammadayaw iti lugar ti espiritu ti ladingit’ (Isaias 61:3).
“Dakkel ti namnamatayo gapu kadagitoy a kari! … Ti espirituna ti mangagas; mangsukog; mangliwliwa; mangted namnama iti napukawan namnama. Adda bilegna a mangbaliw iti amin a nalaad ken dakes ken awanan pateg iti biag iti maysa a banag a kangatuan ken kadayagan. Adda Kenkuana ti bileg a mamagbalin ti dapo ti mortalidad iti ngayed ti kinaagnanayon.” 4
Paneknekak a ni Jesucristo ti managayat a Mangisalakantayo, ti Mannubbottayo, ti Maestro a Mangngagas, ken ti napudno a gayyemtayo. No umasidegtayo Kenkuana, agasan ken paimbagennatayo manen. Paneknekak a daytoy ti Simbaanna ken agsagsagana Isuna nga agsubli manen ditoy a daga tapno agturay nga addaan iti bileg ken dayagna. Iti nagan ni Jesucristo, amen.