Mata a Kumita
Babaen ti bileg ti Espiritu Santo, mapagbalin ni Cristo a makitatayo ti bagbagitayo ken makita dagiti dadduma a kas ti panangkitana.
Panangkita iti Ima ti Dios
Magustuak ti estoria iti Daan a Tulag maipapan iti barito a nagserbi ken ni propeta Eliseo. Maysa a bigat, nakariing ti barito, rimmuar, ket nakitana ti siudad a napalibutan iti dakkel a buyot nga agpanggep a mangdadael kadakuada. Nagtaray a napan ken ni Eliseo: “Mataytayon apo! Ania ti aramidentayo?”
Ti sungbat ni Eliseo, “Dika agbuteng: gapu ta ad-adutayo ngem isuda.”
Ammo ni Eliseo a kasapulan ti barito ti natalna a pammatalged; masapul a makitana. Ket ngarud “Inkararag ni Eliseo, … Apo, … luktam ti matana, tapno makakita. Ket linuktan ti Apo dagiti mata ti barito; ket nakitana: ket, ngarud, nasaknapan ti bantay kadagiti kabalio ken umap-apuy a lugan a nanglikmut ken ni Eliseo.” 1
Mabalin nga adda panawen a, kas iti adipen, marigatanka a mangbigbig no kasano nga agtrabaho ti Dios iti biagmo— dagitipanawen no mariknam nga iturongdaka—dagiti pannubok ti biag nga agpakumbabaka. Urayem ken agtalekka iti Dios ken iti panawenna, gapu ta matalekmo ti pusona iti aminmo. Ngem adda maikadua a leksion ditoy. Patpatgek a kakabsatko, makapagkararagkayo met iti Apo tapno luktanna dagiti matayo a kumita kadagiti banag a saanyo a gagangay a makita.
Panangkita iti Bagbagitayo a kasiti Panangkita ti Dios Kadatayo
Nalabit a ti kapatgan a banag a makitatayo a nalawag ket no asino ti Dios ken no asinotayo a talaga—annak ti nailangitan a nagannak nga addaan iti “nadiosan a kababalin ken agnanayon a pagtungpalan.” 2 Idawatmo iti Dios nga ipalgakna kenka dagitoy a kinapudno a buyogan ti no kasano ti mariknana maipapan kenka. Ti ad-adda a pannakaawatmo iti pudno a kinasiasinom ken panggepmo, kaunggam, ad-adda a mapabilegnanto ti amin a banag iti biagmo.
Ti Panangkita iti Dadduma
Ti pannakaawat no kasano a kitaennatayo ti Dios a mangisagana iti wagas a pakatulongan kadatayo a kumita iti dadduma a kas iti panangkitana. Kinuna ti kolumnista a ni David Brooks: “Kaaduan a problema ti kagimongan gapu iti tattao a di makarikna iti pannakaibilang ken pateg. … [Maysa a] kapatgan … a kababalin a mapasayaattayo, [ket dayta] ti kababalin a nasayaat a panangkita iti tunggal maysa ken nasayaat a pannakakita.” 3
Kitaen ni Jesucristo a nasayaat dagiti tao. Kitaenna ti tunggal maysa, dagiti kasapulanda, ken asino ti pakapagbalinanda. Idinto a nakita ti dadduma dagiti agdakdaklis, managbasol, wenno agsingsingir ti buis, nakita ni Jesus dagiti disipulo; idinto a nakita dagiti dadduma ti lalaki a linuganan ti dakes nga espiritu, di nakita ni Jesus ti pagrigatanna, inawatna ti lalaki, ket inagasanna. 4
Iti baet ti kaadu nga ar-aramidentayo, masurottayo ti pagwadan ni Jesus ket makitatayo ti tunggal maysa—ti kasapulan, pammati, panagrigatda, ken pagbalinanda. 5
No ikararagko iti Apo a luktanna dagiti matak a mangkita kadagiti banag a nalabit a gagangay a diak makita, masansan a damagek ti dua a saludsod iti bagik ken ikasok dagiti impresion nga umay: “Ania ti ar-aramidek?” ken “Ania ti diak ar-aramiden a nasken a rugiak nga aramiden?” 6
Iti naglabas a bulan, bayat ti sakramento, sinaludsodko iti bagik dagitoy ket nasdaawak iti impresion nga immay. “Agsardengka a mangkita iti teleponom no agur-urayka iti pila.” Nakaisigudakon ti kumita iti teleponok iti pila; nakitak nga adu ti maaramidko kas iti panagsungbat ti email, panagkita iti headlines wenno iti social media feed.
Ti kabigatanna, nagur-urayak iti atiddog a pila iti paglakuan. Inruarko ti teleponok ket idi a nalagipko ti impresion a naawatko. Indulinko ti teleponok ket kinitak ti aglawlaw. Nakitak ti maysa a lakay nga immun-una kaniak iti pila. Awan ti nagyan iti kartna malaksid iti sumagmamano a kanen ti pusa. Medio nagbainak, ngem naisaok a husto kas, “Makitak nga adda pusam.” Imbagana nga adda umay a bagyo, ket dina kayat a maawanan iti kanen ti pusana. Apagbiitkami a nagsarita, ket idi kuan kinunana, “Ammom, awan pay nangibagaak daytoy, ngem ita ti kasangayko.” Narunaw ti pusok. Kinablaawak iti naragsak a kasangayna ken nagkararagak iti naulimek nga agyaman ta diak inusar ti teleponok ken naawananak koma iti gundaway a makita ken makasarita ti sabali a tao a nakasapul iti daytoy.
Diak tarigagayan ti agbalin a kas iti padi wenno Levita iti dalan a mapan iti Jerico—maysa a kumita ken lumabas laeng. 7 Ngem masansan unay a panunotek a kasdiayak.
Panangkitak iti Pangibaonan ti Dios Kaniak
Itay nabiit, nasursurok ti napateg nga adal maipanggep iti nasayaat a panangkita iti balasitang nga agnagan iti Rozlyn.
Insarita kaniak daytoy nga estoria ti gayyemko a naldaangan idi nagsinada iti asawana iti 20 a tawen. Iti panagbingay ti oras dagiti annakna para iti dua a nagannak, ken kasla narigat kenkuana ti makimisa nga is-isuna. Malagipna:
“Iti simbaan a napateg unay ti pamilia, mabalin a nasakit ti agtugaw a maymaysa. Dayta umuna a Domingo, simrekak a sikakararag nga awan makisao kaniak. Nakalmaak lang ngem dandanin agtedted dagiti luak Nagtugawak iti siguda pagtugtugawak, a mangnamnama nga awan ti makadlaw nga awan ti nakatugaw.
“Maysa a balasitang ti wardmi ti timmaliaw a kimmita kaniak. bNagin-iisemak. Immisem met i. Makitak iti rupana ti pannakaseknanna. Naaulimek nga indawatko a di umasideg amakisarita kaniak—awan ti napintas nga isaok ken ammok nga agsangitak. Nagdumogak ken liniklikak ti kumita.
“maysa nga oras kalpasanna, nadlawko a sagpaminsan a kumita kaniak. Idi nalpasen ti miting, inasitgannak a dagus. ‘Hi, Rozlyn,’ inyarasaasko. Inarakupnak ket kinunana, ‘Sister Smith, maibagak a madi kenka daytoy nga aldaw. Ladingitek unay. Ay-ayatenka.’ Kas naibagakon, nakaluaak iti panangarakupna manen kaniak. Ngem idi pumanawak, napanunotko iti bagik, ‘Nalabit a kabaelak daytoy kalpasan ti amin.’
“Dayta naayat nga agtawen iti 16 a balasitang, nga ub-ubing nga amang ngem siak, sapulennak iti kada Domingo iti dayta a tawen tapno arakupennak ket kunana, ‘Kumusta ka?’ Nakaaramid daytoy iti pagdumaan no kasano ti nariknak iti pannakimisak. Kinapudnona nangrugiak a nagtalek kadagidiay nga arakup. Nakitanak ti maysa a tao. Ammo ti tao nga addaak idiay. Maseknan ti maysa a tao.”
Iti amin a sagut nga idiaya ti Ama, iti panagkita a nasayaat agkasapulannga agdawattayo Kenkuana—ken kalpasanna agtignay. Agdawat a makita ti dadduma a kas iti panangkitana—kas annakna a lallaki ken babbai nga addaan iti awan patinggana ken nadiosan a potensial. Ket agtignay babaen ti panagayat, panagserbi, ken panangpatalged iti pateg ken potensialda no maparegta. No agbalin a pagtuladan daytoy iti biagtayo, makitatayo ti bagitayo nga agbalin a “napudno a pasurot ni … Jesucristo.” 8 Mabalin a maitalek dagiti dadduma ti puspusoda iti puspusotayo. Ket iti daytoy a pagtuladan matakuatantayonto ti bukodtayo a pakabigbigan ken panggep.
Linagip ti gayyemko ti sabali pay a padas bayat ti panagtugawna nga agmaymaysa, masmasdaaw no ti 20 a tawen a panagbiag iti ebanghelio iti pagtaenganna ket masayang laeng. Masapulna ti nataltalna a pammatalged: masapul a makitana. Nariknana ti maysa a saludsod a nagsalput iti pusona: “Apay a naaramidmo dagidiay a banag? Inaramidmo dagidiay para iti gunggona, pammadayaw ti dadduma, wenno ti kalikagumam a bungana?” Nagsardeng iti apagkanito, sinapulna ti pusona, ket sitatalek a nangsungbat, “Inaramidko dagitoy gapu ta patpatgek ti Mangisalakan. Ken ipatpategko ti ebangheliona.” Linuktan ti Apo dagiti matana tapno matulonganna a makakita. Daytoy simple ngem nabileg a panagbaliw a panangkita ti nangtulong kenkuana nga agtultuloy a mamati ken ni Cristo, iti laksid dagiti pannubokna.
Paneknekak nga ay-ayatennatayo ni Jesucristo ken maipaayna kadatayo dagiti mata a makakita—nupay narigat daytoy, nupay nabannogtayo nupay nalidaytayo, ken nupay saan a dagidiay a bunga ti ninamnamatayo. Babaen ti paraburna, bendisionannatayo ken papigsaenna ti kabaelantayo. Babaen ti bileg ti Espiritu Santo, mapagbalin ni Cristo a makitatayo ti bagbagitayo ken makita dagiti dadduma a kas ti panangkitana. Babaen ti tulongna, maawatantayo no ania ti kasapulan unay. Marugiantayo a makita ti ima ti Dios nga agar-aramid ken babaen kadagiti gagangay a pasamak iti biagtayo—makitatayo a nasayaat.
Ket iti dayta nga aldaw “tapno inton agparang, agbalinkayonto a kas kenkuana ta makitatayonto met laeng ta makita tayonto isuna a kas isu; tapno maaddaantayo kadaytoy a namnama” 9 nga isu ti kararagko iti nagan ni Jesucristo, amen.