Adda Taraon
Iti panagsaganatayo kadagiti temporal a kasapulantayo, mapadasantayo dagiti pannubok ti biag nga addaan iti dumakdakkel a panagtalek.
Sakbay ti naiget a panagbiahe gapu iti agdama a pandemia, agawidakon manipud iti international assignment a, gapu iti problema iti iskediul iti panagbiahe, nagurayak iti dayta a Domingo. Bayat ti panagurayko iti panagbiahek, adda orasko a nagatendar iti miting ti sakramento iti lugar, a nangibinglayak iti ababa a mensahe. Kalpasan ti miting, adda maysa a naragsak a deacon nga immasideg kaniak ket nagdamag no am-ammok ni Presidente Nelson ken no naalamanokon. Imbagak nga am-ammok, a nakaalamanokon, ken kas maysa a miembro ti Presiding Bishopric, adda gundawayko a nakaam-ammok ni Presidente Nelson ken dagiti mammagbagana iti mamin-adu a gundaway iti tunggal lawas.
Nagtugaw ngarud ti agtutubo a deacon, inngatona ti imana ket impukkawna, “Daytoy ti kaindaklan nga aldaw iti biagko!” Kakabsat, diak man maingato ti imak ken agpukkaw, ngem agnanayonakto nga agyaman para iti sibibiag a propeta ken dagiti pannarabay a maawattayo kadagiti propeta, mammadto, ken mammaltiing, aglalo iti panawen ti pannubok.
Manipud idi un-unana, nangipaay ti Apo iti pannarabay a mangtulong iti tattaona para iti naespirituan ken temporal a panagsaganada a mangsupiat kadagiti didigra ken pannubok a sumangbay a kas paset iti panagbiag iti daga. Mabalin a personal wenno para iti kaaduan dagitoy a kalamidad, ngem ti pannarabay ti Apo ti mangipaay iti pannakasaluad ken suporta tapno dumngeg ken agtignay mayannurot iti balakadna. Maysa a napintas a pagwadan a naited iti maysa a pakaammuan manipud iti libro ti Genesis, a pakaadalantayo maipapan ken Jose iti Ehipto ken ti naparegta a panangyulogna iti tagainep ni Faraon.
“Kinuna ni Jose ken ni Faraon, … Impaltiing ti Dios no ania ti dandani nga aramiden ni Faraon. …
“Adtoy, Addanto pito a tawen ti kinawadwad iti intero a daga ti Ehipto:
“Sumarunonto met ti pito a tawen a panagbisin; ngem malipatanto dagiti amin a tawen ti kinawadwad iti intero a daga ti Ehipto.” 1
Dimngeg ni Faraon ken ni Jose ket inaramidna no ania ti inpakita ti Dios kenkuana iti tagainep ken dagus a nagisagana no ania man ti sumangbay. Naisurat kalpasanna iti nasantuan a kasuratan:
“Bayat ti pito a tawen a kinawadwad, nalabon ti apit iti daga.
“Ket inurnongna ti amin a makan iti pito a tawen ket impenpenna. …
“Ket inurnong ni Jose ti apit ti mais a mayarig ti kaaduda iti darat ti baybay, … idi agangay insardengna ti nagsukat gapu iti kaaduda.” 2
Idi nalpas ti pito a tawen a kinawadwad, nabagaantayo a “pito a tawen ti panagbisin, kas imbaga ni Jose: nga adda iti panagbisin iti amin a pagilian; ngem iti intero a daga ti Ehipto adda taraon.” 3
Ita, naparaburantayo nga idauluan dagiti propeta a makaawat a masapul a makapagsaganatayo kadagitoy a didigra “a dumtengto” 4 agpada a temporal ken espiritual, ken mangbigbig kadagiti limitasion wenno lapped a mapadasantayo iti panagtungpal kadagiti pammagbagada.
Nalawag a maawatan a ti epekto ti COVID-19, kasta met dagiti makadadael a didigra iti aglawlaw, nga awan ti idumdumana a tao, puli, kagimongan, ken relihion a beddeng iti tunggal kontinente. Napukaw dagiti trabaho ken bimmaba dagiti sueldo gapu ta ti gundaway nga agtrabaho ket naapektuan gapu ti panagikkat iti trabaho ken ti kabaelan nga agtrabaho gapu ti epekto ti corona virus iti salun-at.
Kadagiti amin a naapektuan, yebkasmi ti pannakaawat ken pannakaseknan iti kasasaadyo, kasta met ti natibker a pammati nga agur-uray dagiti nasaysayaat nga aldaw. Naparaburankayo kadagiti bishop ken branch president a mangsapul kadagiti miembro dagiti kongregasionda nga addaan kadagiti temporal a panagkasapulan, ken addaan access kadagiti tools ken resources a makatulong kadakayo a mangbangon manen iti biagyo ken mangikabil kadakayo iti dana iti panagpannuray iti bukod a kabaelan bayat ti panangusaryo kadagiti pagbatayan ti kinamanagsagana.
Iti aglawlaw iti agdama, adda pandemia a nangdadael iti ekonomia ken biag ti tunggal maysa, saan a maitunos iti naasi a Mangisalakan a tumallikud iti realidad nga adu ti agrigrigat ket idawatna kadakuada a mangrugi nga agurnong iti taraon ken kuarta para iti masakbayan. Numan pay kasta, saan a kayat a sawen dayta a nasken a permanente a baybay-antayo dagiti pagbatayan ti panagsagana … nasken laeng a mausar dagitoy a pagbatayan “iti nainsiriban ken naurnos,” 5 tapno iti masakbayan maisaotayo, ti kas iti inaramid ni Jose iti Ehipto, “Adda taraon.” 6
Di namnamaen ti Apo nga aramidentayo ti ad-adu pay ngem iti kabaelantayo, ngem namnamaenna nga aramidentayo ti kabaelantayo no maaramidtayo daytoy. Impalagip ni Presidente Nelson kadatayo iti naudi a sapasap a komperensia, “Napateg iti Apo ti aramid.” 7
Masansan nga allukoyen dagiti lider ti Simbaan dagiti Santo iti Ud-udina nga Aldaw “nga agisagana para iti rigat iti biag babaen ti kaadda ti kangrunaan nga abasto ti taraon ken danum ken sumagmamano a naurnong a kuarta.” 8 Kasta met nga inallukoynatayo nga agbalin a “masirib” ken “saan nga agbalin a napalalo” 9 kadagiti panagkagumaantayo a mangbangon iti pagidulinan iti pagtaengan ken urnong a kuarta. Maysa a pagadawan [resource] a napauluan iti Personal Finances for Self-Reliance, a naipablaak idi 2017 ken makita iti 36 a pagsasao iti website ti Simbaan, ket mangrugi iti mensahe ti Umuna a Panguluen, a kas naisurat:
“Impakdaar ti Apo, ‘Panggepko ti mangipaay kadagiti santok’ [Doktrina ken Katulagan 104:15]. Maysa a kari daytoy a paltiing manipud iti Apo nga ipaaynanto dagiti bendision a temporal ken ti gundaway para iti panagpannuray iti bukod a kabaelan. …
“… Ti panangawat ken panagbiag kadagitoy a pagbatayan ti nasaysayaat a mangpabael kadakayo nga umawat kadagiti temporal a bendision nga inkari ti Apo.
“Awisendakayo nga adalenyo a sipapasnek ken yaplikaryo dagitoy a pagbatayan ken isuroyo kadagiti miembro ti pamiliayo. Ket no aramidenyo, maparaburanto ti biagyo … [gapu ta] anaknakayo ti Amatayo sadi Langit. Ay-ayatennakayo ken dinakayto kaano man baybay-an. Am-ammonakayo ken nakasagana a mangted kadakayo kadagiti espiritual ken temporal a bendision ti panagpannuray iti bukod a kabaelan.” 10
Iraman daytoy a resource dagiti kapitulo a naipamaysa iti panagpartuat ken panagbiag iti badyet, panangsaluad iti pamiliayo a maisupiat iti kinarigat, panangimaton iti krisis mainaig iti kuarta, panag-invest para iti masakbayan, ken adu a dadduma pay ken addan a magun-od para iti tunggal maysa iti website ti Simbaan wenno babaen dagiti lokal a lideryo.
Iti panangibilang iti pagbatayan ti kinamanagsagana, mabalintayo a lagipen ni Jose iti Ehipto a kas inspirasion. Ti panangammo no ania ti mapasamak ket saan koma nga umdas a mapasingkedda iti “saan unay a nawadwad” a tawtawen nga awan iti uray man laeng a sakripisio idi panawen ti kinawadwad. Imbes nga usaren ti amin a mabalin a napatanor ni Faraon, naaramid ti panagtubeng, a sinaruno ti panangipaay iti umdas a kasapulanda, kasta met dagiti masakbayan a kasapulanda. Saan nga umdas a maammuan dumtengto dagiti mapannubok a panawen. Nasken nga agtignayda, ket gapu iti panagkagumaanda, “adda taraon.” 11
Daytoy ti mangiturong iti napateg a saludsod: “Ngarud, ania?” Ti nasayaat a pangrugian ti panangawat nga espiritual ti amin a banag iti Apo “ket saan iti ania man nga oras” nga inikkannatayo “iti linteg a temporal.” 12 Amin a banag, ngarud, mangitudo ken ni Jesucristo a kas pundasion a nasken a bangonentayo uray iti temporal a kinamanagsaganatayo.
Ti panagbalin a temporal a nakasagana ken managpannuray iti bukod a kabaelan kaipapananna ti “panamati a babaen ti parabur, wenno ti mannakabael a bileg, ni Jesucristo ken ti bukodtayo a panagkagumaan, magun-odtayo amin nga espiritual ken temporal a kasapulan ti biag nga idawattayo para iti bagbagitayo ken iti pamiliatayo.” 13
Dagiti nayon nga aspeto ti espiritual a pundasion para iti temporal a kinamanagsagana ket iramanna ti panagaramid iti “nainsiriban ken naurnos,” 14 a mangisingasing a ti saggabassit a panangbuangay iti pagidulina iti tataon ken panagurnong, kasta met ti panangawat iti “babassit ken gagangay” a wagas, 15 a panangipakitaan iti pammati a ti Apo ti mangpadur-asto iti babassit ngem agtultuloy a panagkagumaantayo.
Addaan iti naespirituan a pundasion, mausartayo a naballigian ti dua a napapate —nga elemento ti temporal a kinamanagsagana—panangimaton ti pakaseknan iti kuarta ken panagidulin iti pagtaengan.
Dagiti napateg a pagbatayan a mangimaton iti pakaseknanyo iti kuarta iramanna ti panagbayad ti apagkapullo ken daton, panangikkat wenno panangliklik iti panagutang, panagsagana ken panagbiag iti badyet, ken panagurnong para iti masakbayan.
Dagiti napateg a pagbatayan ti panagidulin iti pagtaengan ket iramanna ti panagidulin iti taraon, panagurnong iti danum, ken panagurnong iti dadduma pay a kasapulan a batay kadagiti kasapulan ti tunggal tao ken pamilia, gapu ta ti amin “a kasayaatan a pagidulinan” 16 ket ti pagtaengan, nga agbalin a “kaalistuan a pagalaan iti panawen ti panagkasapulan.” 17
No awatentayo dagiti naespirituan a pagbatayan ken gun-oden ti inspirasion manipud iti Apo, matarabaytayonto a mangammo iti pagayatan ti Apo para kadatayo, ken no kasano ti kasayaatan a panangyaplikar kadagiti napapateg a pagbatayan ti temporal a kinamanagsagana. Ti kapatgan nga addang ti amin ket mangrugi.
Insuro ni Elder David A. Bednar daytoy a pagbatayan idi kunana: “Ti panagtignay ti pakakitaan ti kaadda ti pammati. … Naisentro ti pudno a pammati ken ni Apo a Jesucristo ken kanayon a mangiturong iti panagtignay.” 17
Kakabsatko, iti daytoy a managbalbaliw a lubong, masapul nga agsaganatayo para kadagiti saan a mapakpakadaan. Uray pay kadagiti nasayaat nga aldaw a dumteng, ammotayo nga agtultuloy dagiti rigat ken nam-ay iti mortal a panagbiag. No agbalintayo a temporal a nakasagana, kabaelantayo a sanguen dagiti pannubok iti biag nga addaan iti dakkel a panagtalek, talna iti puspusotayo, ken kas ken Jose ti Ehipto, makunatayo, uray pay kadagiti narigat a kasasaad, “Adda taraon.” 18 Iti nagan ni Jesucristo, amen.