Subokentayonto Ida
Itan ti panawen nga agsagana ken mangsubok iti bagbagitayo no aramidentayo amin a banag nga ibilinto ti Apo a Diostayo.
Ikararagak ti tulong ti Espiritu Santo para kadatayo amin bayat ti panangiburayko iti kapanunotan ken rikna nga umay iti panunotko ken pusok kas panagsagana para iti daytoy sapasap a komperensia.
Ti Kinapateg dagiti Pannubok
Nasurok a dua dekada sakbay ti awagko iti full-time a serbisio iti Simbaan, nagtrabahoak kas mannursuro ti unibersidad ken administrador. Kangrunaan a pagrebbengak kas mannursuro ti mangtulong kadagiti estudiante nga agsursuro para iti bagbagida. Ket napateg a paset ti trabahok ti panangaramid, pananggrado, , ken panangted iti feedback maipapan iti gapuanan ti estudiante kadagiti pannubok. Kas ammoyon manipud iti bukod a padas, dagiti pannubok gagangay a saan a paset ti proseso ti panagsursuro a magustuan unay dagiti estudiante!
Ngem kasapulan unay dagiti masansan a pannubok iti panagsursuro. Tuongannatayo ti nasamay a pannubok nga idilig ti nasken a maammuantayo iti pudno nga ammotayo maipapan iti nalawag a topiko; mangted pay iti pagrukodan kontra iti maamiristayo a panagsursuro ken panagdur-astayo.
Kasta met, dagiti pannubok iti panagadal iti daytoy a biag napateg a paset ti panagdur-astayo. Nupay kasta, ti sao a [test] pannubok ket saan a masarakan uray maminsan iti teksto dagiti nasantuan a kasuratan iti Ingles. Ketdi, dagiti sao kas iti suboken, amirisen, ken padasen ket mausar a pangiladawan iti agduduma a pagtuladan ti umno a panangipakita iti naespirituan a pannakaammotayo, pannakaawat, ken kinapasnektayo iti agnanayon a plano ti ragsak ti Nailangitan nga Amatayo ken ti kabaelantayo nga agkalikagum iti bendision ti Pannubbot ti Mangisalakan.
Isu nga akin-aramid iti plano ti pannakaisalakan inladawanna ti mismo a panggep ti mortal a pannakapadastayo nga inusarna dagiti sao a suboken, amirisen, ken padasen iti nagkauna ken agdama a nasantuan a kasuratan. “Ket subokentayo ida, ta kitaentayo no aramidenda amin a banag nga ibilin kadakuada ti Apo a Diosda.” 1
Ibilang daytoy a panangyararaw ti Salmista a ni David:
“Usigennak , O Apo, ken padasennak ; tingitingem toy pusok ken isipko.
“Ta ti kinamanagayatmo adda iti imatangko: ken nagnaak iti kinapudnom.” 2
Ket impakdaar ti Apo idi 1833, “Ngarud, saankayo nga agbuteng kadagiti kabusoryo, ta impaulogko a sipupuso, kinuna ti Apo, ta subokenkayto iti amin a banag, no agtungtungpalkayo met la iti katulagak, nga uray pay iti patay, tapno mapaneknekankayo a maikari.” 3
Pannakasubok ken Pannakapadas iti Agdama nga Aldaw
Ti tawen 2020 a natandaan, iti pasetna, babaen ti maysa a sangalubongan a pandemia a nangipaneknek, nangusig, ken nangpadas kadatayo iti adu a wagas. Ikararagko a masursurotayo kas indibidual ken pamilia dagiti napapateg a leksion a dagiti laeng mapannubok a padas ti makaisuro kadatayo. Namnamaek met a napnuan pammigbigtayo iti “kinaimbag ti Dios” ken ti kinapudno “nga isu ti mangted-pateg kadagiti sagabaen[tayo] nga agpaay a pakairanudan[tayo].” 4
Dua a kangrunaan a pagbatayan ti makatarabay ken makapapigsa kadatayo no masubok ken mapadastay iti biag, ania man dagitoy: (1) ti pagbatayan ti panagsagana, ken (2) ti pagbatayan ti agtultuloy a sitatalingenngen ken ni Cristo.
Pannakapadas ken Panagsagana
Kas dagiti disipulo ti Mangisalakan, nabilintayo nga “isagana amin a kasapulan; ken mangbangon iti balay, nga isu ti balay a pagkararagan, balay a pagayunuan, balay ti pammati, balay a pagadalan, balay ti gloria, balay ti urnos, balay ti Dios.” 5
Inkari pay ti Apo kadatayo a “no nakasaganakayo saankayo nga agbuteng.
“Ken tapno malibasanyo ti bileg ti kabusor, ket maummongkayo kaniak a nalinteg a tattao, nga awanan iti mulit wenno pakababalawanna.” 6
Mangted dagitoy a nasantuan a kasuratan iti naan-anay a suporta iti panangbukel ken panangisagana iti biag ken pagtaengantayo agpada a temporal ken espiritual. Dagiti aramidtayo nga agsagana para kadagiti padas a mangsubok iti biag maitulad koma iti pagwadan ti Mangisalakan a “dimmakkel iti kinasirib ken kinatayag, ken ti gundaway iti Dios ken tao” 7 —napagkaysa a timbeng ti panagsagana nga intelektual, pisikal, espiritual, ken sosial.
Iti maysa a malem iti napalabas a sumagmamano a bulan, inimbentariomi ken Susan ti food storage ken emergency suplaymi. Iti panawen nga alisto a nagwaras ti COVID 19, ken nagsasaruno dagiti ginggined a nangyugyog iti balaymi iti Utah. Intrabahomin manipud pay kadagiti immuna nga aldaw ti panagdennami kas agassawa a nangsurot iti balakad ti propeta maipapan kadagiti di madlaw a pannubok, a ti “panangamiris” iti kasasaadmi iti panagsagana iti baet ti virus ken ginggined kasla nasayaat ken naitiempo a banag nga aramiden. Tinarigagayanmi a mangduktal iti gradomi kadagitoy di naipakpakaammo a pannubok.
Adu ti nasursuromi. Iti adu a tay-ak, ti panagisagana nga aramidmi ti maiparbeng laeng. Iti dadduma a tay-ak, nupay kasta, kasapulan ti panagpasayaat gapu ta dimi nailasin ken nakita ti naipangruna a kasapulan iti naitiempo a wagas.
Kasta unay pay ti panagkatawami. Kas pagarigan, natakuatanmi dagiti banag iti remote closet nga adda iti food storagetayo iti adun a dekada. Kinaagpaysona, mabutengkami a manglukat ken mangkita iti sumagmamano a container amangan ta makaited daytoy iti sabali pay a pandemia! Ngem maragsakankayo koma a mangammo a naibellengmin dagiti nadadael a taraon, ket naliklikan ti pagpeggadan ti salun-at iti lubong.
Adda dagiti miembro ti Simbaan nga agkuna a saanen a napateg dagiti emergency plan ken suplay, food storage, ken 72-hour kit gapu ta awan pay ti nagsarita a Kakabsat itay nabiit maipapan daytoy ken kadagiti mainaig a topiko iti sapasap a komperensia. Ngem madagdagullit nga imballaag dagiti lider ti Simbaan nga agsagana iti adun a dekada. Ti panagtultuloy ti balakad ti propeta ket mangparnuay iti nabileg ken nalawag a mensahe ken napatpateg dagiti madagdagullit a mensahe ngem iti maysa a ballaag.
Kas iti ipakita dagiti mapannubok a panawen ti kaawan ti temporal a panagsagana, kasta met, dagiti sakit ti naespirituan a panangyaleng-aleng ket mangyeg iti makadadael unay nga epektoda kabayatan dagiti narigat a pannubok. Masursurotayo, kas pagarigan, iti pangngarig dagiti sangapulo a babbalasang a ti panangitantan iti panagsagana ket mangiturong iti napaay a pannakasubok. Lagipen no kasano a napaay ti lima a naampang a babbalasang nga agsagana a husto iti pannubok a naited kadakuada iti aldaw a yaay ti nobio.
“Ta dagiti naampang idi innalada dagiti pagsilawanda, saanda a nangikuyog ti lana:
“Ngem dagiti manakem nangikuyogda ti lana kadagiti basoda agraman kadagiti pagsilawanda.
Ngem idi tengnga ti rabii, adda maysa a pukkaw, Adtoy ti nobio: rummuarkayo a sumabet kenkuana.
“Idin amin dagiti babbalasang timmakderda ket tinarimaanda dagiti pagsilawanda.
“Ket dagiti naampang kinunada kadagiti manakem, Ikkandakami iti lanayo, ta dagiti pagsilawanmi maiddepdan.
“Ngem dagiti manakem simmungbatda a kunkunada,Tapno di, agkurang ti maipaay kadakami ken kadakayo: inkayo kadagiti aglako, ket gumatangkayo ti maipaay kadakayo.
“Ket idi napanda gimmatang, dimteng ti nobio; ket dagiti adda a nakasagana simrekda a kimmuyog kenkuana iti pagbodaan: ket ti ruangan napunitan.
“Idin immay metten dagiti dadduma a babbalasang, nga agkunkuna, Apo, Apo, ilukatandakami.” 8
“Ngem simmungbat ket kinunana, Pudno kunak kadakayo, Saandak nga am-ammo.” 9
Uray iti daytoy a pannubok, sinubok dagiti lima a babbalasang ti bagbagida a managdengngeg laeng ngem saan a managtungpal iti sao. 10
Adda patpatgek a maysa a gayyem nga inheniero iti tren. Kabayatan ti semestre, ni Sam inaldaw nga agrebyu, maggupgop, ken agsursuro manipud iti notesna iti tunggal kurso a nakayenrolanna. Sinurotna ti agpada a pagtuladan para iti amin a klasena iti gibus ti tunggal lawas ken bulan. Ti wagasna ti nakasursuruanna iti linteg a di laeng mangyulo kadagiti detalye. Ket idi immasideg ti maudi nga eksamen, nakasaganan ni Sam. Kinapudnona, nakitana a ti maudi nga eksamen ti kalalag-anan a paset ti legal trainingna. Umun-una ti nasamay ken naitiempo a panagsagana iti naballigian a pannakasubok.
Yunay-unay ti wagas ni Sam iti legal nga adalna ti maysa kadagiti kangrunaan a pagtuladan ti Apo iti panagdakkel ken panagdur-as. “Ta adtoy, kastoy ti kinuna ti Apo a Dios: Itdekto kadagiti annak ti tattao nga ibinsabinsa, bilin iti bilin, sangkabassit ditoy ken sangkabassit idiay; ket maparaburanto dagiti dumngeg kadagiti bilinko, ken dumngeg iti balakadko, tapno makaadaldanto iti pagsiriban; ta ad-adunto pay ti itedko kadagiti umawat.” 11
Awisek ti amin kadatayo nga “utoben[tayo] dagiti dalan[tayo]” 12 ken “sukimaten[tayo] dagiti bagbagi[tayo] met laeng, no addan[tayo] iti pammati; ken suboken[tayo] dagiti bagbagi[tayo].” 13 Ania ti nasursurotayo kadagitoy naglabas a bulan maipapan ti panagbalbaliw iti estilo ti biag ken panagiget? Ania ti aramidentayo a mangpasayaat iti biagtayo mainaig iti naespirituan pisikal, sosial, emosional, ken intelektual? Itan ti panawen nga agsagana ken mangsubok iti bagbagitayo no aramidentayo amin a banag nga ibilin ti Apo a Diostayo.
Pannakasubok ken Panagtultuloy
Naminsan dimmar-ayak iti pumpon ti agtutubo a misionario a napapatay iti aksidente. Nagsarita ti ama ti misionario iti serbisio ket inladawanna ti sakit ti nakemna iti di ninamnama nga ipupusay ti patpatgenna nga anak. Imbagana a dina mismo maawatan dagiti gapu wenno pannakaaramid ti kasta a pasamak. Ngem kanayon a malaglagipkonto daytoy a tao a nangibagbaga a naammuanna nga ammo ti Dios dagiti gapu ken pannakapasamak ti ipupusay ti anakna—ket umdasen kenkuana dayta. Imbagana iti kongregasion nga umimbagdanto iti pamiliana, nupay naladingit; nagtalinaed a natibker ti pammaneknekda. Inggibusna ti saritana iti kastoy a pakdaar, “Kayatko a maammuanyo a no maipapan iti ebanghelio ni Jesucristo, adda rebbengen ti pamiliami. Agrebbengtayo amin.”
Uray no makasair iti puso ken narigat ti mapukawan iti maysa a patpatgen, nakasagana iti pannakasubok ti espiritualidad dagiti miembro daytoy natured a pamilia tapno masursuroda dagiti leksion nga addaan agnananyon a pateg babaen dagiti sinagabada. 14
Ti kinapudno saan a kinamaag wenno panatiko. Ketdi, daytoy ket panagtalek ken panagkumit nga agtalek ken Jesucristo kas Mangisalakantayo, iti naganna, ken iti karkarina. No “agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao,” 15 mabendisionantayo iti agnanayon a pannirigan ken sirmata nga agtultuloy iti labes ti kabaelantayo. Mabalintayonto ti “aguummong, ken agtakder kadagiti nasantuan a lugar” 16 ket “saan nga aggaraw, agingga a dumteng ti Apo.” 17
Bayat ti panagserbik kas presidente ti Brigham Young University–Idaho, immay ni Elder Jeffrey R. Holland iti campus iti Disiembre1998 nga agsarita iti maysa kadagiti linawas a debosionalmi. Inawismi ken Susan ti maysa a grupo dagiti estudiante a makipagkita ken ken Elder Holland sakbay nga itedna ti mensahena. Idi dumani agngudon ti orasmi, sinaludsodko ke ni Elder Holland, “No maisurom ti maysa a banag kadagitoy nga estudiante, ania koma?”
Insungbatna:
“Saksaksiantayo ti dakdakkel a tignay iti polaridad. Aawanto ti kankanunongantayo kas Santo iti Ud-udina nga Aldaw. Ket maikkatto ti panagkanunong.
“No agpatapawka iti danum ti agus ti maysa a karayan, maisadsadkanto. Mapankanto iti sadino man a pangipanan ti agus kenka. Saanto a mapan iti waig, mangsurot iti panagati,, agpaanud iti agus.
“Nasken a maaramid dagiti pili. Maysa a pili ti saan nga agpili. Sursuruen ti agpili itan.”
Ti palawag ni Elder Holland maipapan iti panagsaknap iti polarisasion ket napaneknekan a naipadtuan babaen kadagiti ayo ken pasamak iti kagimongan iti 22 a tawen manipud pay idi sinungbatanna ti saludsodko. Iti panangipadles iti dakkel a pagdumaan ti nagbaetan ti wagas ti Apo ken ti lubong, imballaag ni Elder Holland a ditayton makiramam kadagiti banag a nailubongan ngem pasettayo latta ti naisubli a Simbaan. Daytoy a katulongan ti Apo ti nangal-allukoy kadagiti agtutubo nga agpili, agsagana, ken agbalin a napasnek a disipulo ti Mangisalakan. Tinulonganna ida nga agsagana ken agtultuloy ke babaen ti panangsubok, panangamiris, ken dagiti mangsubsubok a padas iti biagda.
Kari ken Pammaneknek
Ti proseso a pakasubokan ti bagbagitayo ket kangrunaan a paset ti naindaklan a plano ti ragsak ti Nailangitan nga Ama. Ikarik a no agsagana ken agtultuloytayo iti pammati iti Mangisalakan, makaawattayo amin iti isu met laeng a grado iti kangrunaan a pannubok ti mortalidad: “Naimbag, nalaing ken mapagtalkan nga adipen: nagbalinka a napudno iti sumagmamano a banag, ket aramidenka a mangituray iti adu a banag: sumrekka iti rag-o ti apom.” 18
Paneknekak a ti Dios nga Agnanayon nga Ama ti Amatayo. Ni Jesucristo ti Kakaisuna a Bugbugtong ken sibibiag nga Anak, ti Mangisalakan ken Mannubbottayo. Sirarag-o a paneknekak dagitoy a kinapudno iti sagrado a nagan ni Apo Jesucristo, amen.