Panangsapul iti Rag-o ken ni Cristo
Ti pannakikadua ken Cristo a tumulong ti dadduma isu ti katalgedan a wagas a pangsapul iti rag-o ditoy a biag.
Saan a dawaten ti Apo nga aramiden dagiti agtutubotayo iti Aaronic Priesthood ti amin a banag, no di laeng dagiti makaparegta.
Sumagmamano a tawen ti naglabas, napasaran ti pamiliami ti napasaran ti adu a pamilia ditoy natnag a lubong. Nagsakit iti kanser, ti buridek nga anakmi a lalaki, ni Tanner Christian Lund. Nasingpet nga ubing daytoy, kas kadagiti ubbing a siam ti tawenna. Naalikuteg ngem silalagip isuna maipanggep kadagiti naespirituan a banag. Demonio ken anghel, naloko ken nasayaat. Idi bassit pay daytoy ken inaldaw a kellaatennakami iti kinamanagpartuat ken kinalokona, napanunotmi a dumakkelto nga agbalin a propeta wenno mannanakaw iti bangko. Ania man kadagita, nalabit nga addanto maibatina a maysa a tanda ditoy lubong.
Ket kalpasanna kellaat a nagsakit iti nakaro. Iti simmaruno a tallo a tawen, naaramat ti amin a kabaelan tapno maipaagas, nairaman ti dua a bone marrow transplant, a nakaalaanna iti pneumonia, a kinasapulanna ti mangbubos iti 10 a lawas nga awan puotna iti maysa a ventilator. Milagro a nalaingan daytoy iti nabiit ngem kalpasanna nagsubli iti kanserna.
Nabiit sakbay ti ipupusayna, dimmanon ti kanser ni Tanner iti tulangna, ken uray pay adda dagiti napigsa nga agas ti ut-ot, nasaktan latta. Marigatan unay a bumangon iti iddana. Iti maysa a bigat ti Domingo, napan ti inana, ni Kalleen, iti kuartona tapno kitaenna sakbay a mapan ti pamilia iti simbaan. Nasdaaw a nakakita a nakasukaten ken nakatugaw iti iking ti katrena, a marigrigatan a mangibutones iti badona. Nagtugaw ni Kalleen iti abayna. “Tanner,” kinunana, “siguradoka kadi a kabaelam ti umay iti simbaan? Mayat no ditoyka laeng balayen tapno makainanaka ita.”
Pinerrengna ti datar. Deacon isuna. Adda korumna. Ken adda pagrebbenganna.
“Agibunongak koma iti sacrament ita.”
“Siguradoak adda maysa a deacon a mangaramid parakenka.”
“Wen,” kinunana, “ngem … makitak no kasano a kitkitaendak dagiti tao no agibunongak iti sacrament. Panagkunak makatulong kadakuada.”
Tinulongan ni Kalleen a nagibutones iti badona ken nagkurbata, sada napan iti simbaan. Nalawag, adda napateg a mapaspasamak.
Dimtengak iti simbaan manipud iti nasapsapa a miting isu a nasdaawak idi makitak ni Tanner a nakatugaw iti ayan dagiti deacon. Imbaga ni Kalleen kaniak no apay nga adda idiay ken no ania ti kinunana: “Makatulong iti tao.”
Minatmatak dagiti deacon a nagturong iti sacrament table. Nagsadag isuna iti sabali a deacon bayat ti panagipasa dagiti priest iti bread trays kadakuada. Naginnayad ni Tanner a napan iti puestona ket tinengngelna ti murdong ti tugaw tapno magin-awaan ti bagina iti panangtedna iti sacrament.
Kasla kumitkita ti amin iti chapel kenkuana, a madmadlaw ti ib-ibturanna nga ut-ot bayat ti panangaramidna iti pagrebbenganna. Uray no kaskasano nangyeg ti aramid ni Tanner iti lawag bayat ti nadaeg a tignayna a—nabasa ti kalbo nga ulona iti ling-et—mangitaktakder iti Apo iti wagas nga aramiden dagiti deacon. Daytoy nakapuy itan a deacon nga am-ammo ken inayatda ti dumawdawat ti nakapsuten a bagina a nadunor, nadadael, ken napirgis, sisasagana nga agsagaba tapno maserbianna ida babaen ti panangimetna kadagiti simbolo ti Pannubbot ti Mangisalakan iti biagtayo.
Ti pannakakitami no kasano a panunotenna maipapan iti panagbalinna a maysa a deacon ket nabalbaliwanna met ti panunotmi—maipapan ti sacrament, maipapan ti Mangisalakan, ken maipapan kadagiti deacon, teacher ken priest.
Pampanunotek ti di maisawang a milagro a nagparegget kenkuana iti dayta a bigat tapno situtured a nagtulnog iti dayta naulimek, bassit nga awag nga agserbi, ken maipapan iti pigsa ken kabaelan dagiti agtutubo iti isusungbatda iti awag ti propeta nga agpailista iti buyot ti Dios a kumappeng iti aramid ti pannakaisalakan ken pannakaitan-ok.
Tunggal kanito nga agiggem ti maysa a deacon iti sacrament tray, maipalagip kadatayo ti estoria ti Maudi a Pangrabii, iti Getsemani, ti Kalbario, ken iti tanem iti minuyongan. Idi kinuna ti Mangisalakan kadagiti Apostolna, “Aramidenyo daytoy a panglaglagipyo kaniak,” 1 Ibagbagana met daytoy kadatayo. Ibagbagana dagiti awan sardayna a milagro nga ited ti Dios bayat ti panangyawatto dagiti masakbayan a deacon, teacher, ken priest iti simbolona ken awisenna dagiti annakna a mangawat ti pangsubbot a sagutna.
Amin a simbolo ti ordinansa ti sakramento itudonatayo iti dayta a sagut. Panunotentayo ti tinapay a pinirsapirsayna idi—ken ti tinapay iti sanguanantayo, a pirsapirsayen itan dagiti priest. Panunotentayo ti kaipapanan ti likido a naikonsagrar, idi ken ita, bayat ti iruruar dagiti balikas ti kararag ti sakramento manipud iti bibig dagiti priest nga agturong iti pusotayo ken iti langit, a mangpabaro iti katulagan a mangisilpo kadatayo ti bileg ti panangisalakan ni Cristo. Bayat ti sacrament, panunotentayo ti kaipapananna no yawat ti deacon ti sagrado a simbolo kadatayo, agtaktakder iti pagtakderan koma ni Jesus no adda sadiay, a mangidiaya a mangitag-ay iti dadagsentayo ken mangagas iti sakittayo.
Naimbag ta saanen a masapul nga agsakit dagiti agtutubo tapno matakuatanda ti rag-o ken panggep ti panagserbida iti Mangisalakan.
Insuro ni Elder David A. Bednar a tapno dumakkel ken agbalin a misionario nasken nga, aramidentayo ti ar-aramiden dagiti misionario, ken kalpasanna, “tunggal binatog ken iti tunggal annuroten, … in-inut a makapagbalintayo a misionario … a namnamaen ti Mangisalakan.” 2
Kasta met, no kayattayo ti “agbalin a kas ken ni Jesus,” 3 aramidentayo ti ar-aramiden ni Jesus, ket iti maysa a binatog, ilawlawag ti Apo ti aramidenna: Kinunana, “Ta adtoy, daytoy ti aramidko ken gloriak—ti mangipatungpal iti saan nga ipapatay ken ti agnanayon a biag ti tao.” 4
Ti kanayon ken agnanayon a mision ti Mangisalakan ket agserbi iti Amana babaen ti panangisalakanna kadagiti annakna.
Ti pannakirkadua ken Cristo a tumulong ti dadduma isu ti katalgedan a wagas a mangsapul ti rag-o.
Daytoy ti simple a kinapudno a nangparegta iti programa ti Children and Youth.
Amin nga aktibidad ken pannursuro ti Children and Youth ti makatulong kadagiti ubbing nga agbalin a kas ken Jesus babaen ti pannakikaduada Kenkuana iti aramidna ti pannakaisalakan ken pannakaitan-ok.
Ti Children and Youth ket maysa a tool a tumulong ti ubing ti Primary ken agtutubo a dumakkel iti kinadisipulo ken maaddaan ti pannirigan a napno iti pammati a mangipakita ti langa ti kinaragsak. Mabalinda ti agsakbay ken agtarigagay kadagiti dalan ken pagilasinan iti dana ti katulagan, a pakabuniagan ken pakakumpirmaanda iti sagut ti Espiritu Santo ken iti mabiit pannakikamengda kadagiti korum ken klase ti Young Women, a pakariknaanda iti rag-o ti panangtulong iti dadduma babaen ti panagsasaruno nga aramid ti panagserbi a kas ken Cristo. Agplanoda kadagiti panggep a tun-oyen, a mangtedto ti timbeng ti biagda ken mangtulong kadakuada nga agbalin a kas ti Mangisalakan. Dagiti komperensia ti For the Strength of Youth ken magasin, ti Friend, ken ti Gospel Living app mangtulongto kadakuada a mangsarak ti rag-o ken ni Cristo. Namnamaendanto dagiti bendision ti kaadda iti limited-use temple recommend ken mariknadanto ti espiritu ni Elijah babaen ti impluensia ti Espiritu Santo iti pananggun-odda iti bendision ti aramid iti templo ken family history, Matarabaydanto babaen ti patriarchal blessing. Iti agangay, makitadanto ti bagida a mapmapan iti templo a naparaburan ti bileg ken mangsapul tii rag-o ken agnanayon a maikonektada, ania man ti dumteng, iti pamiliada.
Maibusor Iti pandemia ken kalamidad, ti pannakapasamak iti naan-anay a kari ti baro a programa a Children and Youth ket madama a maar-aramid—ngem adda panagkasapulan. Saan a mauray dagiti agtutubo ti panagbalbaliw ti lubong sakbay a maam-ammoda ti Mangisalakan. Adda dagiti agar-aramiden ti desision a dida aramiden no naawataanda ti pudno a kinasiasinoda—ken kinasiasinona.
Ngarud ti naganat nga awag ti buyot ti Dios ket “kumpet ti amin nga ima!”
Dakayo nga inna ken amma, masapul dagiti annakyo a lallaki ti dakkel a suporta ita a kas iti napalabas idi bassit pay laeng ti adda kadakuada. Dakayo a nagannak, lider ti priesthood ken Young Women, no agkarigatan ti agtutuboyo, ti Children and Youth ti mangtulong kadakuada a mayasideg iti Mangisalakan, ket ti Mangisakalan ti mangyegto iti talna kadakuada. 5
Dakayo a panguluen ti korum ken klase, agtignaykayo a tumulong iti aramid ti Apo.
Dakayo a bishop, isilpoyo dagiti tulbekyo iti presidente ti korum, ken kadagiti korumyo—ken tiwardyo—agnanayonto nga agbalbaliw.
Kadakayo a tumantanor a kaputotan, paneknekak, kas maysa a makaammo a dakayo ti annak ti Dios ken adda paaramidna kadakayo.
Iti panangannongyo kadagiti takemyo, iti amin a puso, kabaelan, panunot, ken pigsayo, ayatenyonto ti Dios ken agtungpal iti katulaganyo ken agtalek iti Priesthoodna iti panagtrabahoyo a mangbendision ti dadduma, mangrugi iti pagtaenganyo.
Ikarkararagko nga ikarigatanyo, a mangdoble iti pigsayo, anmaikari itoy a panawen, nga agserbi, mamati, agbabawi, ken dumur-as iti inaldaw, maikari nga umawat iti bendision ti templo ken manayon a rag-o ti ebanghelio ni Jesucristo. Ikararagko nga agsaganakayto nga agbalin a napasnek a misionario, napudno nga asawa, ken managayat nga ama wenno ina naikari nga agbalinkayto a kasta babaen iti panagbalin a pudno a disipulo ni Jesucristo.
Tumulongkayo koma a mangisagana iti lubong para iti panagsubli ti Mangisalakan babaen ti panangawis iti amin nga umay ken ni Cristo ken umawat iti bendision ti Pannubbotna. Iti nagan ni Jesucristo, amen.