Amin a Pagilian, Kakabsat, ken Pagsasao
Iti bukodtayo a wagas, makapagbalintayo a paset ti pannakaipatungpal dagiti padto ken kari ti Apo—paset ti ebanghelio a mangparabur iti lubong.
Patpatgek a kakabsat, itay nabiit indauluak ti maysa a pannakailantip iti templo, kalpasan dagiti pangiwanwan iti COVID-19. Kakuyog ti nobia ken nobio, agpada a nagsublin a misionario, dagiti dadakkelda ken amin a kakabsatda. Saan a nalaka daytoy. Maikasiam ti nobia iti sangapulo nga annak. Nagtugaw ti siam nga agkakabsat a naurnos, inauna iti inaudi, nga adda distansia iti baetda.
Ti pamilia nagbalin a nasayaat a kaarruba sadino man ti nagnaedanda. Nupay kasta, saan a makaay-ayo ti maysa a komunidad—gapu ta kuna ti ina ti nobia, miembro ti pamiliada ti Simbaan ni Jesucristo dagiti Santo iti Ud-udina nga Aldaw.
Inaramid ti pamilia ti amin a makigayyem iti pagadalan, tumulong, ken maawat, ngem napaayda. Inkararagan ti pamilia a mapalukneng koma dagiti pusoda.
Maysa a sardam, narikna ti pamilia a nasungbatan dagiti kararagda, iti saan a ninamnama a wagas. Nauram ti balayda agingga a dimmapo iti daga. Ngem napasamak ti maysa a banag. Ti uram ti nangpalukneng iti puso dagiti kaarrubada.
Nagurnong dagiti kaaruba ken lokal a pagadalan iti kawes, sapatos, ken dadduma pay a kasapulan ti pamilia, a napukawan iti amin a banag. Nagbunga iti pannakaawat ti kinaimbag. Saan a kastoy a ninamnama ti pamilia a pannakasungbat dagiti kararagda. Nupay kasta, nagyamanda iti nasursuroda babaen dagiti narigat a padas ken saan a ninamnama a sungbat kadagiti naimpusuan a kararag.
Pudno, kadagiti addaan napudno a puso ken mata a kumita, maipakita ti nadungngo nga ayat ti Apo iti baet ti karit ti biag. Mangyeg iti parabur ti langit dagiti napudno a nakaipasanguan a karit. Ditoy a biag, nalabit a mapukaw wenno aguraytayo iti sumagmamano a banag, ngem masarakantayto ti banag a kapatgan iti udina. 1 Dayta ti karina. 2
Rugian ti 2020 bicentennial proclamation iti napasnek a kari nga “ay-ayaten ti Dios dagiti annakna iti tunggal pagilian iti lubong.” 3 Iti tunggal maysa kadatayo iti tunggal pagilian, kabsat, pagsasao, ken tattao, 4 agkari ti Dios, makitulag, ken awisennatayo a makiranud iti nawadwad a rag-o ken kinaimbagna.
Naipatalged ti ayat ti Dios iti amin a tao iti intero a nasantuan a kasuratan. 5 Sakupen dayta nga ayat ti katulagan ni Abraham, panangummong iti nawarawara nga annakna, 6 ken ti planona iti ragsak.
Iti sangakabbalayan ti pammati awan dagiti ganggannaet, 7 awan ti nabaknang ken napanglaw, 8 awan ti “mabaybay-an.” Kas “kailian dagiti santo,” 9 naawistayo a mangbalbaliw iti lubong para iti nasaysayaat, manipud iti maysa a tao, maysa a pamilia, maysa a sangakarrubaan iti maysa a panawen.
Mapasamak daytoy no agbiag ken ibinglaytayo ti ebanghelio. Idi damo daytoy a dispensasion, inawat ni Propeta Joseph ti padto a tarigagayan ti Nailangitan nga Ama a tunggal maysa takuatenna ti ayat ti Dios ken mangpadas iti bilegna a dumur-as ken agbalbaliw.
Naawat ditoy ti padto, iti kayo a pagtaengan ti pamilia Smith iti Palmyra, New York. 10
Nalpas idi 1998, naulit a naipatakder ti pagtaengan ti Smith iti sigud a pundasionna. Ti siled ti maikadua a kadsaaran mangsakup iti 18 x 30 x 10 kadapan (5.5 by 9 by 3m) nga espasio nga immayan ni Moroni kas nadayag a mensahero manipud iti Dios, ken ni ubing a Joseph iti sardam ti Septiembre 21,1823. 11
Malagipyo ti insalaysay ni Propeta Joseph:
“Ni [Moroni] kinunana … adda paaramid ti Dios kaniak; masapul nga agpaay ti naganko kadagiti naimbag ken dakes iti amin a pagilian, kakabsat, ken pagsasao. …
“Kinuna ni [Moroni] nga adda libro a naidulin, … a linaonna ti naan-anay a pakabuklan ti Ebanghelio.” 12
Ditoy isardengmi. Agrukbabtayo iti Dios ti Agnanayon nga Ama ken ti Anakna, ni Jesucristo, saan nga iti Propeta a ni Joseph wenno asino man a mortal a lalaki wenno babai.
Ngem panunoten no kasano a matungpal dagiti padto nga ited ti Dios kadagiti katulonganna. 13 Adda dagiti natungpal a nasapsapa, adda naladladaw, ngem natungpal amin. 14 No denggentayo ti espiritu ti padto ti Apo, agbalintayo a paset ti pannakaipatungpal dagiti padto ken karina—paset ti ebanghelio a mangparabur iti lubong.
Idi 1823, ni Jose saan nga am-ammo nga agtawen iti 17 a barito nga agnaed iti maiputputong a purok, iti baro a pagilian. Malaksid no pudno, kasano a napanunotna nga ibaga nga agbalin a ramit iti aramid ti Apo ken agipatarus babaen ti sagut ken bileg ti sagrado a scripture a maammuan iti amin a lugar?
Ngem, gapu ta pudno, saksiantayo dayta a padto a maipatpatungpalen nupay naawistayo a tumulong a mapasamak daytoy.
Kakabsat, iti sangalubongan, datayo amin a makiramraman itoy Oktubre 2020 sapasap a komperensia maibilangtayo kadagiti pagilian, kakabsat, ken pagsasao a maisasao.
Ita, dagiti miembro ti Simbaan ni Jesucristo dagiti Santo iti Ud-udina nga Aldaw nga agnanaedg iti 196 a pagilian ken teritorio, 3,446 a stake ti Simbaan iti 90 kadagitoy. 15 Ibagitayo ti adu a lugar ti heograpia a kalawa ken sentro ti kinapigsa.
Idi 1823, asino koma ti makaarapaap nga iti 2020 addanto tallo a pagilian nga addaan ti tunggal maysa iti nasurok a sangamilion a miembro daytoy a Simbaan—ti Estados Unidos, Mexico, ken Brazil?
Wenno duapulo-ket-tallo (23) a pagilian nga addaan ti tunggal maysa iti nasurok a 100,000 a miembro ti Simbaan—tallo iti North America, sangapulo-ket-uppat iti Central ken South America, maysa iti Europe, uppat iti Asia, ken maysa iti Africa? 16
Awagan ni Presidente Russell M. Nelson ti Libro ni Mormon a “namilagruan a milagro.” 17 Ipaneknek dagiti saksina, “Maipakaammo iti amin a pagilian, kakabsat, pagsasao ken tattao.” 18 Ita, addan a magun-od iti 100 a pagsasao ti sapasap a komperensia. Impaneknek ni Presidente Nelson ni Jesucristo ken ti naisubli nga ebangheliona iti 138 a pagilian ken umad-adu pay.
Nagrugi iti 5,000 a naiprenta a kopia ti 1830 umuna nga edision ti Libro ni Mormon, agarup 192 million a kopia ti amin wenno paset ti Libro ni Mormon a naipablaak iti 112 a pagsasao. Sapasap a magun-od pay iti digital dagiti patarus ti Libro ni Mormon. Iraman dagiti agdama a patarus ti Libro ni Mormon ti 23 a pagsasao ti lubong nga isasao ti 50 million a tao wenno ad-adu pay, nagtitipon a pagsasao ti agarup nga 4.1 billion a tao. 19
Babaen dagiti babassit ken simple a wagas—a nakaawisantayo a makiraman—mapasamakto dagiti dadakkel a banag.
Kas pagarigan, iti komperensia ti stake, iti Monroe, Utah, populasion a 2,200, dinamagko no mano ti nakapagmision. Dumani amin ti nangitayag iti imana. Kadagiti kallabes a tawen, iti dayta maysa a stake, 564 misionario ti nagserbi iti 50 nga estado ti U.S. ken 53 a pagilian—iti tunggal kontinente malaksid ti Antarctica.
Maipapan iti Antarctica, uray iti Ushuaia, iti abagatan ti Argentina, nakitak ti padto a maipatpatungpal bayat ti panangibinglay dagiti misionariotayo iti naisubli nga ebanghelio ni Jesucristo iti lugar a naawagan “ti intero a daga.” 20
Ti naipinta a ladawan a nangakkub iti uppat a libro ti Saints 21 mangiladawan iti tapisteria dagiti bunga ti panagbiag iti ebanghelio kadagiti Santo iti amin a lugar. Nailagda ti pakasaritaan ti Simbaantayo iti nabiag a pammaneknek ken panagdaliasat iti ebanghelio ti tunggal miembro, agraman ni Mary Whitmer, ti napudno a kabsat a babai a nangipakitaan ni Moroni kadagiti pinanid ti Libro ni Mormon. 22
Iti umay nga Enero 2021, ti tallo a sangalubongan a magasin ti Simbaan—ti Friend, For the Strength of Youth, ken ti Liahona—mangawis iti amin nga agkameng ken mangibinglay iti padpadas ken pammaneknek iti sangalubongan a komunidad ti pammati. 23
Kakabsat, no papigsaentayo ti pammatitayo iti Ama iti Langit ken ni Jesucristo, umawat kadagiti parabur a masarakan iti panagbiag iti kinapudno ti ebanghelio ken sagrado a katulagan, ken adalen, utoben, ken ibinglay ti agtultuloy a Pannakaisubli, makiramantayo a mangipatungpal ti padto.
Balbaliwantayo ti bagitayo ken ti lubong iti pagrukodan ti ebanghelio a mangparabur iti biag.
Kuna ti sister nga Aprikano, “Ti serbisio ti priesthood ti asawak mamagbalin kenkuana a naan-anus ken naas-asi. Ken agbalbalinak a nasaysayaat nga asawa ken ina.”
Kuna ti respetado nga international business consultant iti Central America sakbay a natakuatanna ti naisubli nga ebanghelio ti Dios, nagnaed isuna iti kalsada. Itan nasarakanna ken ti pamiliana ti kinasiasino, panggep, ken pigsana.
Ti barito iti South America ket agtaraken iti manok ken ilakona dagiti itlogda a makatulong a panggatang iti tawa ti balay a bangbangonen ti pamiliana. Umuna bayadanna ti apagkapullona. Makitananto mismo nga agglukat dagiti tawa ti langit.
Iti Four Corners, iti southwest United States, nangpadakkel ti pamilia a Native American iti napintas a rosas a nagbukar iti disierto, simbolo ti pammati ti ebanghelio ken panagtalek iti bagi.
Maysa a survivor ti napait a gubat a sibil, kuna ti maysa a kabsat a lalaki iti Southeast Asia nga awan kaipapanan ti biag. Nasarakanna ti namnama iti maysa a tagainep a nakaiggem ti sigud a kaklasena iti sacrament tray ken impaneknekna maipapan kadagiti pangisalakan nga ordinansa ken ti Pannubbot ni Jesucristo.
Awisennatayo ti Ama iti Langit a mangrikna iti ayatna, agadal ken dumur-as iti edukasion, nadayaw a trabaho, serbisio iti self reliance, ken pagtuladan ti kinaimbag ken ragsak a masarakantayo iti naisubli a Simbaanna.
No agtalektayo iti Dios, no dadduma babaen ti panangyararaw iti kalideman, kalidayan ken awan kasiguraduan a kanitotayo, maadaltayo nga am-ammonatayo a nasaysayaat ken patpatgennatayo.
Daytoy ti gapu no apay a kasapulantayo ti tulong ti Dios a mangparnuay iti agpaut a hustisia, panagpapada, ken talna iti pagtaengan ken komunidadtayo. Ti kapudnuan, kaunggan, ken kangrunaan a lugar ken pagkamengan no mariknatayo ti pangsubbot nga ayat ti Dios, agsapul iti parabur ken milagro babaen ti Pannubbot ti Anakna, ken mangipasdek iti agpaut a pagnaigan babaen dagiti sagrado a katulagan.
Kasapulan ti kinasayaat iti relihion ken sirib iti agdama a natao, naringgor, ken narugit a lubong. Kasano a mapabaro, maparegta, ken maitandudo ti espiritu ti tao? 24
Ti panagmula iti kaykayo iti Haiti ket maysa laeng iti rinibribu a pagwadan dagiti tao nga agkaykaysa nga agaramid iti naimbag. Naguummong ti lokal a komunidad, agraman ti 1,800 miembro ti Simbaan, a nagidonar iti kaykayo nga imula ti dumani 25,000 a kayo. 25 Daytoy a multi-year reforestration project ket nakapagmulan iti nasurok a 121,000 a kaykayo. Manamnama ti panagmula iti nasurok a pinullo a ribu pay.
Mangted daytoy nagkaykaysa nga aramid iti paglinongan, ken manglapped kadagiti layus iti masakbayan. Daytoy ti mangpapintas iti sangakarrubaan, mangbangon iti komunidad, mangpakan iti tao, ken mangtaraon iti kararua. No damagem kadagiti Haitian no asinonto ti agapit iti bunga dagitoy a kayo, kunada, “Asino man a mabisin.”
Sumagmamano a 80 a porsiento ti populasion ti naikappeng iti relihion. 26 Sidadaan dagiti komunidad ti relihion a mangted iti dagus a kasapulan kalpasan ti didigra ken ti agtultuloy a kasapulan iti taraon, pagdagusan, edukasion, kabaelan nga agbasa ken agsurat, ken training iti trabaho. Iti sangalubongan, tumulong dagiti miembro, gagayyem, ken Simbaantayo kadagiti komunidad a mangsuporta kadagiti makidagdagus [refugees] ken mangted iti danum, sanitasion, handicap mobility, pannakaaywan iti mata—maysa a tao, maysa a purok, maysa a kayo iti maminsan. 27 Sadino man, agkalikagumtayo nga agbalin a naimbag a nagannak ken makipagili, tulongan ti kaarruba ken kagimongan, agraman babaen ti Latter-day Saint Charities. 28
Ikkannatayo ti Dios iti karbengan nga agpili—ken kaadda ti sungsungbatan. Kuna ti Apo, “Siak, ti Apo a Dios, wayawayaankayo, ngarud nawayakayon nga awan duadua.” 29 Iti panangipakdaar iti “wayawaya iti balud,” 30 ikari ti Apo ti Pannubbotna ken ti dana ti ebanghelio a mangwarwar iti temporal ken espiritual a begkes. 31 Babaen iti asi, maited daytoy a wayawaya iti pannakasubbot kadagiti pimmusayen.
Sumagmamanon a tawen ti naglabas, imbaga kaniak ti maysa a padi iti Central America a nagadal-adal iti “panagbuniag kadagiti pimmusayen a tao” ti Santo iti Ud-udina nga Aldaw. “Daytoy kasla laeng,” kuna ti padi, “ited ti Dios ti gundaway iti tunggal tao nga umawat iti panagbuniag, sadino man ti pagnaedanda, ken bendisionanna ti babassit nga ubbing a ‘sibibiag ken Cristo.’ 32 Ni Apostol Pablo,” kuna ti padi, “ibagana maipanggep iti natay nga agur-uray iti panagbuniag ken pannagungar.” 33 Ikari dagiti pangisaup nga ordinansa iti templo “amin a pagilian, kakabsat, ken pagsasao” nga awan “agtalinaed nga adipen ti patay, impierno, wenno tanem.” 34
No takuatentayo ti Dios, no dadduma ti di ninamnama a sungbat iti kararagtayo mangipaturong kadatayo iti awan balayna, mangipan kadatayo iti komunidad, mangiturong kadatayo a mangsapul iti naespirituan a pagkamangan iti kinaimbag dagiti katulagan ken ayatna.
Mangrugi iti bassit ti dadakkel a banag, ngem maipakita ti milagro ti Dios iti inaldaw. Agyamantayo iti nadiosan a sagut ti Espiritu Santo, ti Pannubbot ni Jesucristo, ken ti naipalgak a doktrina, ordinansa, ken katulaganna a masarakan iti naisubli a Simbaanna, a nayawag iti naganna.
Siraragsaktayo koma nga umawat ti awis ti Dios tapno umawat ken tumulong a mangipatungpal iti naikari ken naipadto a bendisionna iti amin a pagilian, kakabsat, ken pagsasao, ikararagko, iti sagrado ken nasantuan a nagan ni Jesucristo, amen.