Ituloy ti Agbalbaliw
Babaen ken ni Jesucristo, maikkantayo ti pigsa nga agaramid kadagiti manayon a panagbalbaliw. No sipapakumbabatayo nga umasideg Kenkuana, padakkellennanto ti kabaelantayo nga agbalbaliw.
Sisters, pakaragsakak a makaduakayo.
Ipapanmo a maysa a tao ti mapan iti tiendaan a gumatang iti maysa a banag. No bayadanna ti kahera iti ad-adu ngem iti gatad ti banag, isublinto ti kahera ti suplina.
Insuro ni Ari Benjamin kadagiti taona iti nagkauna nga America ti nabuslon a bendision nga awatentayo manipud iti Mangisalakantayo, ni Jesucristo. Pinarsuana dagiti langit, ti daga, ken ti amin a kinangayed a sagsagrapentayo. 1 Babaen ti naayat a Pannubbotna, ipaayna ti wagas kadatayo tapno masubbottayo manipud iti basol ken patay. 2 No agyamantayo Kenkuana babaen ti sipapasnek a panagtungpal kadagiti bilinna, dagus a bendisionannatayo, ket agbalintayo a siuutang latta Kenkuana.
Ikkannatayo iti adu, ad-adu pay ngem iti gatad a mabalin nga isublitayo Kenkuana. No kasta, ania ngarud ti maitedtayo Kenkuana, a nagbayad iti dakkel a gatad para kadagiti basoltayo? Maitedtayo Kenkuana ti panagbalbaliw. Maitedtayo Kenkuana ti panagbalbaliwtayo. Mabalin a panagbalbaliw iti kapanunotan, ugali, wenno direksion a turongentayo. Ti panangsubad ti di magatadan a bayad iti tunggal maysa, dawaten ti Apo kadatayo ti panagbalbaliw ti pusotayo. Saan a para iti pagimbagan ti Apo ti panagbalbaliw a dawatenna no di ket para kadatayo. Ngarud, saan a kasla tay gimmatang iti tiendaan a dawatenna ti supli nga itedtayo, ti naasi a Mangisalakan awisennatayo nga agtultuloy nga agbalbaliw.
Kalpasan a nangngegda dagiti sao ni Ari Benjamin, impukkaw dagiti taona, a nagbaliw dagiti pusoda, imbagada, “Agsipud ta ti Espiritu ti Apo a Mannakabalin amin, a nangipaay iti naindaklan a panagbalbaliwmi, … awanen ti tarigagaymi nga agaramid iti kinadakes, ngem ti ketdi agtultuloy a panagaramid iti kinaimbag.” 3 Saan nga ibaga ti nasantuan a kasuratan a dagus a nagbalinda a naan-anay; ketdi, ti tarigagayda nga agbalbaliw ti nangpilit kadakuda nga agtignay. Ti panagbalbaliw ti pusoda ti nangikkat ti nailubongan a tao ken panagtulnog iti Espiritu bayat ti panagreggetda nga agbalin nga ad-adda a kas ken ni Jesucristo.
Insuro ni Presidente Henry B. Eyring: “Agpannuray ti pudno a kumbersion iti nawaya a panangtunton iti pammati, ti dakkel a panagkagumaan ken adda saem. No kasta, ti Apo ti makaited … iti milagro ti panangdalus ken panagbalbaliw.” 4 Ti panangtipon ti aramidtayo iti kabaelan ti Mangisalakan a mangbalbaliw kadatayo, agbalintayo a baro a parsua.
Idi ubingak, nailadawanko iti panunotko a magmagnaak iti agpangato a dana nga agturong iti panggepko a tun-oyen nga agnanayon a biag. Tunggal makaaramidak wenno mkaisawangak iti biddut mariknak ti bagik nga aguy-uyas nga agpababa iti dana, tapno laeng rugiak manen ti pannagnak. Kasla ti panagbaba iti maysa a kuadrado ti ay-ayam a Chutes ken Ladders a mangipauyas kenka nga agpababa manipud iti ngato nga agsubli iti pagrugian ti ay-ayam! Makapaupay idi daytoy! Ngem idi mangrugin a maawatak ti dokrtina ni Cristo 5 ken no kasano a mayaplikar daytoy iti inaldaw iti biagko, nasarakak ti namnama.
Inikkannatayo ni Jesucristo iti agtultuloy a pagtuladan ti panagbalbaliw. Awisennatayo a mamati Kenkuana, a mangparegget nga agbabawitayo—“a nangted ti pammati ken panagbabawi iti panagbalbaliw ti puso.” 6 No agbabawitayo ken isublitayo ti puspusotayo Kemkuana, magun-odtayo iti dakdakkel a tarigagay nga agaramid ken agbiag kadagiti sagrado a katulagan. Agibturtayo agingga iti panungpalan babaen iti agtultuloy a panangyaplikar kadagitoy a pagbatayan ken panangawis iti Apo a mangbalbaliw kadatayo. Ti kaipapanan ti agibtur agingga iti panungpalan ket agbalbaliw agingga iti panungpalan. Maawatak itan a saanak a mangirugi manen iti tunggal napaay a panggep, ngem iti tunggal padas, itultuloyko ti prosesok ti panagbalbaliw.
Adda makaparegta a ragup ti balikas iti tema ti Young Women nga agkuna nga, “Ipategko ti sagut ti panagbabawi ket agkalikagum a dumur-as iti inaldaw.” 7 Ikararagko nga ipategtayo koma daytoy napintas a sagut ken aramidentayo ti panagbalbaliw. No dadduma, dagitoy nasken a panagbalbaliw mainaig iti nadagsen a basol. Ngem iti masansan, ikagumaantayo a pasayaaten dagiti ugalitayo tapno maitunos ti bagitayo iti kababalin ni Jesucristo. Makatulong wenno makatubeng iti panagdur-astayo dagiti inaldaw a pilitayo. Ti bassit, ngem agtultuloy, dagiti panggep a panagbalbaliw ti mangtulong kadatayo a dumur-as. Dikayo maup-upay. Maysa nga agtultuloy a pasamak iti biag ti panangbalbaliw. Agyamanak nga iti panangikarigatantayo nga agbalbaliw, naanus ti Apo kadatayo.
Babaen ken ni Jesucristo, maikkantayo ti pigsa nga agaramid iti manayon a panagbalbaliw. No sipapakumbabatayo nga umasideg Kenkuana, padakkellenna ti kabaelantayo nga agbalbaliw.
Kas nayon iti bileg a panagbalbaliw iti Pannubbot ti Mangisalakantayo, tulongan ken iwanwannatayo ti Espiritu Santo no itedtayo ti pigsatayo. Matulongannatayo pay a mangammo kadagiti masapul a panagbalbaliw nga aramidentayo. Masapulantayo pay iti tulong ken pammaregta babaen dagiti bendision ti priesthood, panagkararag, panagayuno, ken idadar-ay iti templo.
Kasta met, a makatulong kadagiti panagkagumaantayo nga agbalbaliw dagiti matalek a miembro ti pamilia, lider, ken gagayyem. Idi walo ti tawenko, agbubuoskami no kua ken ni manongko a Lee iti oras a makiay-ayam kadagiti gagayyemmi kadagiti sanga ti kayo ti sangakaarrubaan. Magustuanmi ti makidanggay kadagiti gagayemmi iti linong dayta a kayo. Maysa nga aldaw, natnag ni Lee iti kayo ket nablo ti takiagna. Gapu ta nablo ti takiagna, marigatan nga umuli iti kayo nga is-isuna. Ngem ti panagay-ayam iti kayo nga awan isuna ket saanen a kas iti sigud. Isu nga, inatibaymi ti likudna sa dagitay dadduma ginuyodda nga impangato ti naimbag a takiagna, ket iti bassit lang a pigsa, nakasubli ni Lee iti kayo. Nabullo pay laeng ti takiagna, ngem kaduami man isunan nga agragragsak bayat ti panagpalaingna.
Masansan a mapanunotko a ti panagay-ayamko iti kayo a kapada ti aktibidadtayo iti ebanghelio ni Jesucristo. Iti linong dagiti sanga ti ebanghelio, agragsaktayo iti adu a bendision a mainaig kadagiti katulagantayo. Mabalin a natnag dagiti dadduma manipud iti kinatalged dagiti katulaganda ket masapulda ti tulongtayo nga umuli nga agsubli iti talged dagti sanga ti ebanghelio. Mabalin a narigat nga agsublida iti bukodda. Maguyodtayo kadi ida a nainnayad ditoy ken ingato ida sadiay tapno matulongan ida nga umimbag bayat ti panagragsakda iti panaggagayyemtayo?
No agsagsagabaka iti sugat manipud iti pannakatnag, ipalubosmo koma a tulongandaka dagiti dadduma a makasubli iti katulagam ken dagiti bendision nga idiayada. Matulongannaka ti Mangisalakan a maagasan ken agbalbaliw, bayat ti pananglawlawda kenka dagiti mangipatpateg kenka.
Masansan nga innak kitaen dagiti gagayyemko a diak nakita iti uneg ti adu a tawen. Kunada no maminsan, “Dika pay nagbalbaliw!” Tunggal mangngegko dayta, mabainak bassit, gapu ta namnamaek a nagbalbaliwakon iti naglabas a tawtawen. Sapay ta nagbalbaliwak manipud idi kalman! Sapay ta nasingsingpetak bassit, saanak a managhusga, ken naas-asiak. Sapay ta al-alistoak a mangted iti kasapulan dagiti dadduma ken naan-anusak.
Magustuak ti ag-hiking iti bantay nga asideg ti balayko. Masansan, nga adda maipan a bassit a bato iti sapatosko iti pannagnak iti riles. Kalpasanna, agsardengak ket iwagwagko ti sapatosko. Ngem masdaawak no apay ipaturayko a masaktannak iti mabayag sakbay nga agsardengak a mangikkat iti bato.
Iti pannagnatayo iti dana ti katulagan, no dadduma ikkatentayo ti batbato iti sapatostayobabaen ti dakes nga ug-ugali, basbasol wenno dakes a kababalin. No al-alisto nga ikkaten ida iti panagbiagtayo, ad-adda a naragsak ti panag-daliasattayo iti biag.
Agkasapulan ti pigsa ti agtultuloy a panagbalbaliw. Diak mapanunot iti agsardeng iti dalan tapno lang isublik iti sapatosko ti makapasuron ken makapaut-ot a bato nga inikkatko. Diak kayat nga obraen daytan ngem tay maysa a nalapsat a kulibangbang a pilienna ti agsubli iti nagtaudanna.
Paneknekak a gapu ken ni Jesucristo, kabaelantayo ti agbalbaliw. Mabalbaliwantayo dagiti ugalitayo, dagiti kapanunotantayo, ken mapasayaattayo ti galadtayo tapno agbalin nga ad-adda a kas Kenkuana. Ket babaen iti tulongna, kabaelantayo ti agbalbaliw. Iti nagan ni Jesucristo, amen.