Agragsakkayo
Ti di maisin a pammatitayo iti doktrina ti naisubli nga ebanghelio ni Jesucristo ket mangiwanwan kadagiti addangtayo ken mangparag-o kadatayo.
Kadagiti maudi nga aldaw ti biagna iti daga, imbaga ni Jesucristo kadagiti Apostolna maipapan iti rigrigat a sagabaenda. 1 Inggibusna nga addaan iti daytoy a namnama: “Ditoy lubong addanto rigatyo: ngem agragsakkayo; siak pinarmekko ti lubong” (Juan 16:33). Dayta ti mensahe ti Mangisalakan iti amin nga annak ti Nailangitan nga Ama. Dayta ti kangrunaan a napintas a damag para kadatayo iti biagtayo iti daga.
“Agragsakkayo” ti kasapulan pay a panangipanamnama iti lubong a nangibaonan ti nagungar a Cristo kadagiti Apostolna. “Iti amin a disso mailetankami,” kuna ni Apostol Pablo kadagiti taga Corinto, “ngem saan a maparigat; agduaduakami ngem saan a maikkat ti inanamami; naidadaneskami, ngem saan a nabaybay-an; natuangkami ngem saankami a napukaw” (2 Taga Corinto 4:8–9).
Kalpasan ti dua ribu a tawen “iti amin a disso mailetantayo,” kasapulantayo dayta met la a mensahe a saan a maparigat ngem agragsaktayo. Espesial ti ayat ken pannakaseknan ti Apo kadagiti napateg nga annakna a babbai. Ammona dagiti tarigagay, kasapulan, ken pagamkanyo. Ti Apo ti kabilgan iti amin. Agtalekkayo Kenkuana.
Naisuro ken ni Propeta Joseph Smith a “dagiti aramid, ken dagiti balabala, ken dagiti panggep ti Dios saan a mapaay, wenno masayang” (Doktrina ken Katulagan 3:1). Kadagiti mangikarkarigatan nga annakna, inted ti Apo dagitoy a pammatalged:
“Adtoy, daytoy ti kari ti Apo kadakayo, O dakayo a katulongak.
“Gapuna, agragsakkayo, ket saankayo nga agbuteng, ta siak nga Apo adda kadakayo, ket agtakderakto iti abayyo; ket paneknekandakto, a siak ni Jesucristo, a siak ti Anak ti sibibiag a Dios” (Doktrina ken Katulagan 68:5–6).
Adda ti Apo iti asidegtayo, ket kinunana:
“Ania man ti ibagak iti maysa ibagak iti amin, agragsakkayo, babassit nga ubbing; ta addaak iti tengngayo, ket saankayo a binaybay-an” (Doktrina ken Katulagan 61:36)
“Ta kalpasan ti adu a panagtutuok umay dagiti bendision” (Doktrina ken Katulagan 58:4).
Sisters, paneknekak a naited dagitoy a kari iti baet dagiti pammarparigat ken bukod a trahedia, mayaplikar iti tunggal maysa kadakayo dagiti narikut a kasasaadyo ita. Napategda kenmangipalagip iti tunggal maysa kadatayo nga agragsak ken maaddaan iti rag-o iti pakabuklan ti ebanghelio bayat ti panagtultuloytayo iti baet dagiti karit ti biag ditoy daga.
Gagangay a padpadas iti biag ditoy daga dagiti panagtutuok ken karit. Ti oposision ket maysa a napateg a paset ti nadiosan a plano a tumulong iti panagdur-astayo, 2 ken iti baet dayta a proseso, impatalged ti Dios nga iti atiddog a pannirigan ti kinaagnanayon, dinto mapalugodan ti oposision a mangparmek kadatayo. Babaen iti tulongna ken ti kinapudno ken panagibturtayo, agtalinaedtayto. Kas iti mortal a biag a nakaipasetanda, saan nga agpaut ti amin a panagtutuok. Kadagiti kontrabersia a simmaruno iti naulpit a gubat, impalagip ti presidente ti United States a ni Abraham Lincoln iti audience-na maipapan iti nagkauna a pagsiriban a “mapukawto met daytoy.” 3
Kas ammoyo, dagiti rigat ti biag a sarsaritaek—a pakarigatan tapno agbalin a naragsak—no dadduma gagangay a pagpasarantayo a kadua ti adu a dadduma pay, kas iti riniwriw nga agkarkarigatan ita gapu iti adu a makadadael nga epekto ti COVID-19 pandemia. Kastoy met, iti United States a riniwriw ti agsagsagaba babaen ti gura ken supiat a kanayon a kasla karagpin dagiti eleksion ti kinapangulo, ngem ita a panawen ti kakaruan a di malipatan ti adu a kabaketan/kalakayan kadatayo.
Iti personal a batayan, agkarigatan ti tunggal maysa kadatayo iti adu a rigat ditoy a biag, kas iti kinapanglaw, rasismo, sakit ti bagi, pannakapukaw iti panggedan wenno pannakapaay, nasukir nga annak, di nagballigi a panagasawa wenno saan a nagasawa, ken dagiti bunga ti basol—a bukodtayo wenno dagiti sabali.
Ngem, iti baet ti amin dagitoy, binalakadannatayo ti Dios nga agragsak ken agsapul iti rag-o kadagiti pagbatayan ken kari ti ebanghelio ken iti bunga dagiti aramidtayo. 4 Kanayon a naited dayta a balakad, kadagiti propeta ken kadatayo amin. Ammotayo daytoy iti padpadas dagiti immun-una kadatayo ken ti kinuna ti Apo kadakuada.
Laglagipen dagiti kasasaad ni Propeta Joseph Smith. Panunotentayo ti pannirigan iti rigatna, ti biagna a nakurapay, naidadanes, nauppapay, naladingit a pamilia, ken naggibus iti pannakapapatayna. Iti pannakabaludna, nagsagaba iti nakaro a rigat ti asawa ken dagiti annakna ken ti dadduma pay a Santo idi napapanawda iti Missouri.
Idi nagpakaasi ni Joseph iti tulong, insungbat ti Apo:
“Anakko, pagtalnaem ti kararuam; saan nga agbayag ti rigatmo ken dagiti sagabaem;
“Ket kalpasanna, no agituredka, itan-oknakanto ti Dios iti ngato; agballigikanto kadagiti amin a kabusormo” (Doktrina ken Katulagan121:7–8).
Daytoy ti personal, agnanayon a balakad a nangtulong ken ni Propeta Joseph a nangtimbeng iti ragsakna ken ti ayat ken kinapudno kadagiti taona. Dagitoy met la a kalidad ti nangpapapigsa kadagiti lider ken pioneer a nangsurot ken mabalin a mangpapigsa met kadakayo.
Panunotenyo dagiti nagkauna a miembro! Manen, napapanawda iti tunggal lugar a pagnaedanda. Kamaudiananna sinangoda dagiti karit a mangipasdek iti pagtaenganda ken ti Simbaan iti let-ang. 5 Dua a tawen kalpasan ti umuna a ragup dagiti nagkauna a miembro [pioneer] a simmangpet iti tanap ti Great Salt Lake, inkarigatandagiti nagkauna a miembro ti nagbiag iti dayta nadangkes latta a lugar. Kaaduan a miembro ti agdaldaliasat pay laeng iti tanap a mangikarkarigatan a makaala kadagiti pamataudanda. Ngem mangnamnama ken naragsak latta dagiti lider ken miembro.
Nupay saan a nagindeg dagiti Santo iti baro a pagtaenganda, idi sapasap a komperensia ti Oktubre 1849 dakkel a baro a grupo dagiti misionario ti naibaon iti Scandinavia, France, Germany, Italy, ken South Pacific. 6 Nupay riknada ti napaay, nakaipatungpal dagiti nagkauna a miembro [pioneer] iti dadakkel a banag gapu iti namnama ken ragsakda. Kalpasan laeng ti tallo a tawen, naawagan ti sabali pay a 98 a mangummong iti nawarawara nga Israel. Inlawlawag ti maysa kadagiti lider ti Simbaan a dagitoy a mision “gagangay, a di napaut; nalabit a 3 agingga iti 7 tawen kapaut ti kaawan ti asino man a lalaki iti pamiliana.” 7
Sisters, maseknan ti Umuna Panguluen maipapan kadagiti karityo. Ay-ayatendakayo ken ikararagandakayo. Kasta met a, masansan nga agyamankami a dagiti pannuboktayo iti bagi—malaksid kadagiti ginggin-ed, uram, layus, ken alipugpog—gagangay a nalaglag-an ngem iti napasaran dagiti immun-una ngem datayo.
Iti baet dagiti rigat, nadiosan a talged ti “kanayon nga agragsakkayo, ta iturongkayonto. Kukuayo ti pagarian ken dagiti paraburna, ken kukuayo pay dagiti kinabaknang ti kinaagnanayon” (Doktrina ken Katulagan 78:18). Kasano a mapasamak daytoy? Kasano a napasamak kadagiti nagkauna a miembror? Kasano a mapasamakto kadagiti babbai ti Dios ita? Babaen ti panangsurottayo iti pangiwanwan ti propeta, “saan nga agballigi ti ruangan ti impierno a maibusor [kadatayo],” kinuna ti Apo iti paltiing idi Abril 1830. ““Wen,” kinunana,”… paksiatento ti Apo a Dios dagiti bileg ti kasipngetan iti imatangmo, ket padayyegennanto dagiti langit nga agpaay iti pagimbagam, ken iti dayag ti naganna” (Doktrina ken Katulagan 21:6). Ngarud, dikayo agbuteng, bassit a pangen; agaramidkayo iti nasayaat; bay-anyo nga agtipon ti daga ken ti impierno a mangbusor kadakayo, ta no nabangonkayo iti batok, saanda nga agballigi” (Doktrina ken Katulagan 6:34).
Iti dayta a kari ti Apo, “maitag-ay[tayo] ti puso[tayo] ken agrag-o[tayo]” (Doktrina ken Katulagan 25:13), ken “addaan iti naragsak a puspuso ken ruprupa” (Doktrina ken Katulagan 59:15), agtultuloytayo iti dana ti katulagan. Kaaduanna kadatayo ti saan a amaipasango kadagiti dadakkel a pangngeddeng, kas iti ipapanaw kadagiti pagtaengantayo tapno agindeg iti saan nga ammo a pagilian. Dagiti pangngeddengtayo ket kaaduanna nga iti inaldaw nga aramid ti biag, ngem imbaga ti Apo kadatayo, “Saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud kadagiti babassit a banag ti naindaklan” (Doktrina ken Katulagan 64:33).
Adda di mabedngan a bileg ti naisubli nga ebanghelio ni Jesucristo. Ti di maisin a pammatitayo iti dayta a doktrina mangiwanwan iti addangtayo ken mangparag-o. Lawlawaganna ti panunottayo ken papigsaen ken pagtalkannatayo kadagiti aramidtayo. Daytoy a pangiwanwan ken pannakalawlawag ken bileg ket dagiti naikari a sagsagut nga inawattayo manipud iti Nailangitan nga Amatayo. Babaen ti pannakaawat ken panangitunos iti biagtayo iti dayta a doktrina, agraman ti nadiosan a sagut ti panagbabawi, makapagragsaktayo no pagtalinaeden ti bagbagitayo iti dana iti agnanayon a pagtungpalan—pannakikaysa ken pannakaitan-ok a kadennatayo dagiti naayat a nailangitan a nagannaktayo.
“Nalabit a mapadpadasanyo dagiti nakaro a pannubok,” insuro ni Elder Richard G. Scott. “No dadduma nakatalimudok ken naasian unay dagitoy ta mariknayo a nalabesda iti kabaelanyo a mangkontrol. Diyo sanguen nga agmaymaysa ti lubong. ‘Agtalek iti Apo iti amin a pusom; ket saan nga agpannuray iti bukod a pannakaawat’ [Dagiti Proverbio 3:5]. … Nairanta a mapannubok ti biag, tapno dika matnag, ngem makapagballigika babaen iti panangparmek.” 8
Paset amin daytoy ti plano ti Dios Ama ken ti Anakna, ni Jesucristo, a paneknekak, kas ikararagak nga agpursigitayo amin iti nailangitan a pagtungpalantayo, iti nagan ni Jesucristo, amen.