Kakabsat a Babbai iti Zion
Dakayto ti kasapulan a puersa iti panangummong iti Israel ken iti panangbukel iti tattao ti Zion.
Patpatgek a kakabsatko a babbai, napagasatanak nga agsarita iti daytoy nakaskasdaaw nga oras ti pakasaritaan ti lubong. Inaldaw, umas-asidegtayon iti nadayag a kanito no umayto manen ti Mangisalakan, ni Jesucristo iti daga. Ammotayo dagiti nakam-amak a pasamak kasakbayan ti yaayna, ngem naragsaktayo ken agtalektayo unay gapu ta ammotayo dagiti nadayag a kari a matungpalto sakbay ti panagsublina.
Kas maipatpateg nga annak a babbai ti Nailangitan nga Ama, ken kas annak a babbai ni Apo Jesucristo iti pagarianna, 1 napateg ti akemyo iti naindaklan a panawen nga agur-uray. Ammotayo nga umayto ti Mangisalakan kadagiti tao a naguummong ken nakasagana nga agbiag kas iti inaramid dagiti tao iti siudad ti Enoc. Nagkaykaysa dagiti tao idiay iti pammati ken Jesucristo ken nagbalin a naan-anay a natarnaw ta naitayabda iti langit.
Daytoy ti naipalgak a panangiladawan ti Apo iti mapasamak kadagiti tao ni Enoc ken ti mapasamakto itoy maudi a dispensasion ti pannakatungpal dagiti panawen:
“Ket dumtengto ti aldaw nga aginana ti daga, ngem sakbay dayta nga aldaw sumipngetto ti langit ket abbonganto ti belo ti sipnget ti daga; ket agarigenggento dagiti langit, ken kasta met ti daga; ket adunto a panagrigat ti sagrapen dagiti annak ti tattao, ngem taginayonekto dagiti taok;
“Ket pababaekto ti kinalinteg manipud iti langit; ket ibaonkonto ti kinapudno iti daga, a mangpaneknek iti Bugbugtongko; ti panagungarna manipud kadagiti natay; wen, ken kasta met ti panagungar dagiti amin a tao; ket ti kinalinteg ken kinapudno ti ibilinkonto nga agsaknap iti daga a kas iti layus, a mangummong kadagiti piliek manipud iti uppat a suli ti daga, iti lugar nga isaganak, ti Nasantuan a Siudad, a pakapapigsaan dagiti taok kadagiti lomoda, ken mangur-uray iti panawen a yaayko; ta sadiayto ti tabernakulok, ket maawaganto iti Zion, ti Baro a Jerusalem.
“Ket kinuna ti Apo ken ni Enoc: Ket sadiayto ti pagsasarakanyo kadagiti amin a siudadmo, ket awatentayonto ida iti sidongtayo, ket makitadatayonto; ket agsadagtayonto iti tengngedda, ket agsadagdanto met kadagiti tengngedtayo, ket agiinnagektayonto;
“Ket sadiayto ti pagindegak, ket isunto ti Zion, nga aggapunto kadagiti amin a pinarsuak; ket iti uneg ti sangaribu a tawen aginananto ti daga.” 2
Dakayo sisters, dagiti annak ken appokoyo a babbai, ken babbai a pinatanoryo ket agbalinto a nakapatpateg a paset ti panangbukel iti dayta a gimong dagiti tao a tumiponto iti nadayag a pannakikadua iti Mangisalakan. Dakayto ti kasapulan a puersa iti panangummong iti Israel ken iti panangbukel iti tattao ti Zion nga agindegto iti talna iti Baro a Jerusalem.
Ti Apo, babaen dagiti propetana, nagkari kadakayo. Kadagiti immuna nga aldaw ti Relief Society, kinuna ni Propeta Joseph Smith iti kakabsat a babbai, “No agtalinaedkayo iti karbenganyo, saanto a malapdan dagiti anghel iti panagbalinda a kadkaduayo.” 3
Pasetnakayon dayta datdatlag a potensial, ket maisagsaganakayon iti daytoy.
Kinuna ni Presidente Gordon B. Hinckley:
“Dakayo sisters … diyo ibilang a maikadua ti lugaryo iti plano ti Amatayo para iti agnanayon a ragsak ken pagimbagan dagiti annakna. Naan-anaykayo a napateg a paset dayta a plano.
“No awankayo di makaipatungpal ti plano. “No awankayo di agballigi ti intero a programa. …
“Tunggal maysa kadakayo ket anak a babai ti Dios, naikkan iti nadiosan a saguday iti pannakayanak.”
Ti agdama a propetatayo, ni Presidente Russell M. Nelson, nangted iti daytoy a pangiladawan ti paset nga akmenyo kas pangisagana para iti yaay ti Mangisalakan:
“Imposible a marukod ti impluensia nga … adda kadagiti babbai, saan laeng kadagiti pamilia ngem iti pay Simbaan ti Apo, kas assawa, inna, ken lelong ken lelang; kas kakabsat a babbai ken iikit; kas mannursuro ken lider; ken nangnangruna kas ulidan ken napudno a mangsalsalaknib iti pammati.
“Pudno daytoy iti tunggal dispensasion ti ebanghelio manipud pay kadagiti aldaw da Adan ken Eva. Ngem dagiti babbai daytoy a dispensasion maidumada iti babbai ti asino man gapu ta maiduma daytoy a dispensasion iti asino man. Daytoy a pakaidumaan ti mangted iti agpada a pribilehio ken pagrebbengan.” 5
Maiduma daytoy a dispensasion nga iturongnatayto ti Apo nga agbalin a nakasagana nga agbalin a siudad ti Enoc. Inladawanna babaen dagiti apostol ken propetana no anianto ti pakairamanan dayta a transpormasion iti tattao iti Zion.
Insuro ni Elder Bruce R. McConkie:
Iti [panagbiag ni Enoc] adu ti nadangkes a tao, aldaw ti kinasipnget ken panagalsa, aldaw ti gubat ken leddaang, aldaw a mangiturong iti pannakadalus ti daga iti danum.
“Nupay kasta, napudno ni Enoc. ‘Nakitana ti Apo,’ ket nakisao kenkuana a ‘rupanrupa’ a kas iti pannakisao ti maysa a tao iti sabali.(Moises(Moises 7:4.) Imbaon ti Apo a mangyararaw iti panagbabawi iti lubong, ket binilinna a mamuniag iti nagan ti Ama, ken ti Anak, a napno iti parabur ken kinapudno, ken ti Espiritu Santo, a mangipaneknek iti Ama ken iti Anak.(Moises 7:11.) Nakitulag ni Enoc ken inummongna ti kongregasion dagiti pudno a mamati, amin ida nagbalin a napudno unay ta ‘immay ti Apo ket nakipagnaed kadagiti taona, ket nagindegda iti kinalinteg,’ ken naparaburanda manipud iti ngato. ‘Ket ninaganan ti Apo dagiti taona iti Zion, gapu ta sangsangkamaysa ti puso ken panunotda, ken nagtaengda iti kinalinteg; ket awan ti nakurapay kadakuada.’ (Moises 7:18.) …
“Kalpasan nga inawagan ti Apo dagiti taona iti Zion, kuna ti nasantuan a kasuratan a ni Enoc ‘nangbangon iti siudad a naawagan iti Siudad ti Kinasanto, nga isu ti Zion;’ a ti Zion ‘naitayab iti langit’ nga ‘inawat ti Dios iti sidongna;” ket “manipud idin nagtultuloy ti pagsasao a, pimmanaw ti Zion.’ (Moises 7:19, 21, 69.) …
“Daytoy met la a Zion a naitayab iti langit ti agsublinto … no yeg manen ti Apo ti Zion, ken tumiponto dagiti agindegna iti baro a Jerusalem, a maipasdekto kalpasanna.” 6
No napateg ti napalabas, iti panawen ti yaay ti Mangisalakan, dagiti annak a babbai a sipupudno a nagkumit iti katulaganda iti Dios ket nasurokdanto a kagudua dagiti naisagana a mangpasangbay Kenkuana iti yaayna. Ngem ania man ti bilang, ti tulongyo iti panangbukel iti kaykaysa kadagiti tao a naisagana para iti dayta a Zion ket dakdakkel nga amang ngem iti kagudua.
Ibagakto kadakayo no apay a patiek a kastanto. Salaysayen ti Libro ni Mormon maipapan kadagiti tao ti Zion. Malagipyo a kalpasan a sinuruan, inayat, ken pinaraburan ida ti nagungar a Mangisalakan nga “awan ti panagririnnupir iti pagilian, gapu iti ayat ti Dios a nagnaed iti puso dagiti umili.” 7
Insurona kaniak ti padasko nga adda sagut ti Nailangitan nga Ama iti annakna a babbai a mangikkat iti supiat ken mangitandudo iti kinalinteg babaen ti ayatda iti Dios ken iti ayat ti Dios matulonganda dagiti pagserbianda.
Idi ubingak nasaksiak a nagmiting ti bassit a branchmi iti balaymi. Ti kabsatko ken siak laeng ti Aaronic Priesthood holder, ni tatangko ti agmaymaysa a Melchizedek Priesthood holder. Convert ti Relief Society president ti branch a ti asawana saan a maragsakan iti serbisiona iti Simbaan. Nataengan amin a babbai dagiti miembro nga awan priesthood holder iti balayda. Binuyak ti inak ken dagita a kakabsat a babbai nga agpipinnateg, agpipinnaregta, ken aggiinnaywan nga awan sardayns. Naamirisko itan a naikannak iti nasapa a taldiap ti Zion.
Nagtultuloy ti panagsursurok iti impluensia dagiti napudno a babbai iti bassit a branch ti Simbaan iti Albuquerque, New Mexico. Nakitak ti asawa ti branch president, ti asawa ti district president, ken ti Relief Society president a kumablaaw iti tunggal newcomer ken convert. Ti Domingo a pinanawak ti Albuquerque, kalpasan ti dua tawen a panangpaliiwko iti impluensia dagiti kabsat a babbai sadiay, nabukel ti umuna a stake. Itan nangipan ti Apo iti templo sadiay.
Immakarak iti Boston, a nagserbiak iti district presidency a nangidaulo iti babassit a branch a nagsaknap iti dua nga estado. Adda panagsisinnupiat a namin-adu a rinisut dagiti naayat ken naasi a babbai a nangpalukneng iti puspusoda. Ti Domingo a pinanawak ti Boston, binukel ti miembro ti Umuna a Panguluen ti umuna a stake iti Massachusetts. Adda templo itan idiay, iti asideg iti naminsan a nagindegan ti district president. Nagbalin isuna nga aktibo a miembro ti Simbaan ken idi agangay naawagan nga agserbi kas stake president ket kalpasanna kas mission president, nga inimpluensiaan ti maysa a napudno ken naayat nga asawa.
Sisters, naparaburankayo nga agbalin nga annak a babbai ti Dios nga addaan espesial a sagut. Intugotyo iti mortal a biag ti naespirituan a kabaelan a mangaywan iti dadduma ken itag-ay a nangatngato iti ayat ken kinatarnaw a pakaikariandanto nga agkaykaysa nga agbiag iti maysa a gimong ti Zion. Naisangrat a ti Relief Society ti umuna a timpuyog ti Simbaan a naipangpangruna para kadagiti annak a babbai ti Nailangitan nga Ama, addaan iti pagsasaona a “Ti Asi Awan Pagkamtudanna.”
Ti asi ti nadalus nga ayat ni Cristo. Ken ti pammati Kenkuana ken ti naan-anay nga epekto ti agnanayon a Pannubbotna ti mangpaikarinto kadakayo, ken dagiti patpatgen ken pagserbianyo, para iti nadiosan a sagut nga agbiag iti dayta a gimong ti nabayagen a sapsapulen ken naikari a Zion. Idiay nga agbalinkayto nga agkakabsat iti Zion, personal nga ayatennakayo ti Apo ken dagiti pinaraburanyo.
Paneknekak a dakayo ti makipagili iti pagarian ti Apo iti daga. Annaknakayo a babbai ti naayat a Nailangitan nga Ama, a nangibaon kadakayo iti lubong nga addaan iti naidumduma a sagut nga inkariyo nga usaren a mangbendision iti dadduma. Ikarik kadakayo a kibinennakayto ti Apo babaen ti Espiritu Santo. Umayto a sumango kadakayo bayat ti panangtulongyo Kenkuana a mangisagana kadagiti taona nga agbalin a naikari a Zionna. Ipaneknekko daytoy iti sagrado a nagan ni Jesucristo, amen.