Awaten ti Masakbayan nga Addaan Pammati
Agbalinto a nadayag ti masakbayan kadagiti nakasagana ken agtultuloy nga agsagana nga agbalin a ramit kadagiti ima ti Apo.
Saan a malipatan daytoy a sardam. Patpatgek a kakabsatko a babbai, napadayawanak a makaduakayo. Masansan unay a pampanunotenkayo itoy naglabas a sumagmamano a bulan. Nasurokkayon a walo a milion a babbai ti simbaan. Addaankayo saan laeng iti bilang ngem addaankayo pay iti naespirituan a bileg a mangbalbaliw iti lubong. Binuybuyak ti panagtrabahoyo kabayatan daytoy a pandemia.
Sumagmamano kadakayo ti dagus a nakasarak iti bagbagida iti panagsapsapul kadagiti manmano nga abasto wenno baro a panggedan. Nangisuro kadagiti ubbing ti adu kadakayo ken nangtaming kadagiti kaarruba. Adda dagiti nangpasangbay kadagiti misionario a nagawid a nasapsapa ngem iti ninamnama, idinto a ti dadduma pinagbalinda a Missionary Training Center dagiti pagtaenganda. Inusaryo ti teknolohia a kumonekta iti pamilia ken gagayyem, agminister kadagiti nakarikna a nailasinda, ken nakipagadal iti Come, Follow Me iti dadduma. Nakasarakkayo iti baro a wagas a mangaramid a naragsak ti Sabbath. Ken nagaramidkayo kadagiti pangsaluad a mask—minilion kadagitoy!
Addaan iti naimpusuan nga asi ken ayat, makipagriknaak iti adu a babbai iti sangalubongan a namatayan kadagiti ipatpateg. Makipagladingitkami kadakayo. Ken ikararagandakayo. Dayawen ken ikararaganmi ti amin a nagbannog nga awan sardayna a mangsaluad iti salun-at ti dadduma.
Nakaskasdaawkayo met a babbalasitang. Napno ti social media ti sinnupiat, adu kadakayo ti nakasarak kadagiti wagas a mangallukoy iti dadduma ken nangiburay iti silaw ti Mangisalakantayo.
Sisters, nagbalinkayo amin a naan-anay a banuar! Masdaawak iti pigsayo ken pammatiyo. Impakitayo a kadagiti narigat a kasasaad, naturedkayo a nagtultuloy iti aramidyo. Ay-ayatenkayo, ken ipanamnamak nga ay-ayatennakayo ti Apo ken makitana ti naindaklan nga ar-aramidenyo. Agyamanak kadakayo! Manen, napaneknekanyo a dakayo a talaga ti namnama ti Israel!
Buklenyo dagiti namnama nga adda idi ken ni Presidente Gordon B. Hinckley idi yam-ammona ti “Ti Kaamaan: Maysa a Waragawag iti Lubong,” 25 a tawen ti naglabasen idi Septiembre 1995 a sapasap a miting iti Relief Society. 1 Napateg a pinilina a yam-ammo daytoy napateg a waragawag kadagiti kabsat a babbai iti Simbaan. Iti panangaramidna, inyunay-unay ni Presidente Hinckley ti di masukatan nga impluensia dagiti babbai iti plano ti Apo.
Ita, kayatko a maammuan no ania ti nasursuroyo iti daytoy a tawen. Naas-asidegkayo kadin iti Apo, wenno mariknayo kadi nga ad-adayokayo Kenkuana? Kasano nga imparikna kadakayo ti agdama a paspasamak maipapan iti masakbayan?
Kinapudnona, insao ti Apo maipapan iti aldawtayo iti managparbeng a balikas. Imballaagna nga iti aldawtayo “ti puspuso dagiti tao paglulokendanto ida” 2 ken dagiti mismo a napili agpeggadda iti pannakaallilaw. 3 Imbagana ken ni Propeta Joseph Smith a “maagaw[to]ti kappiamanipud iti daga” 4 ket mapasamakto dagiti didigra iti sangkataw-an. 5
Ngem impaay pay ti Apo ti maysa a pannirigan no kasano ti kinakaskasdaaw daytoy a dispensasion. Pinaregtana ni Propeta Joseph Smith a mangipakdaar a “ti aramid … kadagitoy maudi nga aldaw, dakkel ti pategna. … Narigat nga iladawan dagiti gloriana, ken awan mangrimbaw iti kinadaegna.” 6
Ita, nalabit a diyo pilien ti balikas a nadaeg a pangiladawan kadagitoy sumagmamano a naudi a bulan! Kasano a nasken a sanguentayo ti agpada a naliday a padto ken ti nadayag a pakdaar iti aldawtayo? Imbaga ti Apo no kasano iti simple, ngem nakaskasdaaw a pammatalged: “No nakasaganakayo saankayo nga agbuteng.” 7
Nagpintasen a kari! Maysa daytoy a makapagbalbaliw iti pannirigantayo iti masakbayantayo. Itay kallabes nangngegko ti babai a nauneg ti pammaneknekna iti dayta a pandemia, a nabuyogan iti gingined iti Salt Lake Valley, ket nangtulong a maamirisna a saan a nakasagana kas iti impagarupna. Idi damagek no tuktukoyenna ti pagidulinanna iti taraon wenno ti pammaneknekna, immisem ket kinunana ti, “Wen!”
No ti panagsagana ti tulbektayo iti panangawat itoy a dispensasion ken ti masakbayantayo a sipapammati, kasano a kasayaatan a makapagsaganatayo?
Iti adu a dekada, inallukoynatayo dagiti propeta ti Apo nga agurnong iti taraon, danum, ken urnong a kuarta para iti panawen ti panagkasapulan. Impatalged manen ti agdama a pandemia ti pagsiriban dayta a balakad. Allukoyenkayo nga umaddang nga agsagana a temporal. Ngem masekseknanak maipapan iti naespirituan ken nainriknaan a panagsaganayo.
Gapu iti dayta, adu ti masursurotayo manipud ken ni Kapitan Moroni. Kas komander dagiti buyot a Nephite, naipasango kadagiti agsinnupiat a puersia a napigpigsa, ad-adu, ken naul-ulpit. Isu nga insagana ni Moroni dagiti taona iti tallo a kasapulan a wagas.
Umuna, tinulonganna ida a mangparnuay kadagiti lugar a pagtalgedanda—“lugar ti kinatalged” ti awagna kadagitoy. 8 Maikadua, insaganana “ti panunot dagiti tao nga agbalin a napudno iti Apo.” 9 Ken maikatlo, di pulos nagsardeng a nangisagana iti tattaona—pisikal wenno espiritual. 10 Ibilangtayo koma daytoy tallo a prinsipio.
Umuna a prinsipio: Mangparnuay kadagiti Natalged a Lugar.
Pinatibker ni Moroni ti tunggal siudad a Nephite kadagiti tambak, sarikedked, ken alad. 11 Idi dimmarup dagiti Lamanite kadakuada, “nalaus ti siddaawa[da] gapu iti kinasirib dagiti Nephite iti panangisaganada kadagiti lugarda a natalged.” 12
Maipada met, iti riribuk iti aglawlawtayo, nasken a mangparnuaytayo kadagiti lugar a natalgedtayo agpada a pisikal ken espiritual. No agbalin ti pagtaenganyo a bukod a santuario ti pammati—a pagindegan ti Espiritu—agbalin ti pagtaenganyo nga umuna a pagsaluadan.
Kasta met a dagiti stake ti Zion ti “pagkamangan iti bagyo” 13 gapu ta idauluan dagiti agiggem kadagiti tulbek ti priesthood ken agaramat iti turay ti priesthood. No ituloyyo a suroten ti balakad dagiti pinusgan ti Apo a mangtarabay kadakayo, mariknayonto a nataltalgedkao.
Ti templo—ti balay ti Apo—lugar a pagtalgedan saan a kas iti anian man a dadduma. Idiay, dakayo a kabsat a babbai naikkankayo iti bileg ti priesthood babaen dagiti sagrado a katulagan ti priesthood nga aramidenyo. 14 Idiay a, nailantip dagiti pamiliayo iti kinaagnanayon. Uray iti daytoy a tawen, a limitado unay ti ipapan kadagiti templotayo, ti endowmentyo ti nangted kadakayo iti agtultuloy a yaawat iti bileg ti Dios bayat ti panangdayawyo kadagiti katulaganyo Kenkuana.
Gagangay a nakuna, ti lugar a pagtalgedan iti sadino man mariknayo ti kaadda ti Espiritu Santo ken matarabay Kenkuana. 15 No kaduayo ti Espiritu Santo, maisuroyo ti kinapudno, uray no maisuppiat iti opinon a nalatak iti tao. Ken mautobyo dagiti napudno a saludsod maipanggep iti ebanghelio iti lugar a pakaawatan iti paltiing.
Awisenkayo, patpatgek a kakabsatko, a mangparuay iti balay a natalged a lugar. Ket pabaruek ti awisko kadakayo a mangpadakkel iti pannakaawatyo iti bileg ti priesthood ken dagiti katulagan ken bendision ti templo. Ti kaadda ti natalged a lugar a pakasaluadanyo matulongannakayo a mangawat iti masakbayan nga addaan pammati.
Maikadua a Prinsipio: Isaganayo ti Panunotyo nga Agbalin a Napudno iti Dios.
Impatungpalmi ti dakkel a proyekto a mangtaginayon iti kapasidad ti Templo iti Salt Lake.
Adda nagduadua iti panagkasapulan a mangala iti kakasta a nakaskasdaaw a pagrukodan. Nupay kasta, idi sinagaba ti Salt Lake Valley ti 5.7-magnitude a ginggined iti nasapa daytoy a tawen, nakaro ti pannakagunggon daytoy a templo ta natnag ti estatua ni anghel Moroni! 16
Kas iti pisikal a pundasion ti Templo ti Salt Lake a nasken a natibker a mangsarked kadagiti didigra, nasken a solido dagiti naespirituan a pundasiontayo. No dagiti maipada a ginggined ti mangsinga iti biagtayo, makapagtakdertayo a “natibker ken di maisin” gapu iti pammatitayo. 17
Sinuruannatayo ti Apo no kasano a papigsaentayo ti pammatitayo babaen ti “panagsursuro, uray pay iti panagadal ken iti pammati.” 18 Papigsaentayo ti pammatitayo ken ni Jesucristo no ikarigatantayo ti agtungpal kadagiti bilinna ken “kanayon a manglaglagip kenkuana.” 19 Kasta met a dumakkel ti pammatitayo tunggal aramatentayo ti pammatitayo Kenkuana. Dayta ti kaipapanan ti panagsursuro babaen ti pammati.
Kas pagarigan tunggal adda pammatitayo nga agtungpal iti linteg ti Apo—nupay tagibassitennatayo dagiti nalatak nga opinon—tunggal pagkedkedantayo ti ragragsak wenno relihion nga aglabsing iti katulagan, ar-aramatentayo ti pammatitayo, nga agbanag iti panagdur-as ti pammatitayo.
Kasta met a manmano ti ad-adda a mangbukel iti pammati ngem iti masansan a pannakairarem iti Libro ni Mormon. Awan sabali pay a libro ti mangipaneknek ken ni Jesucristo nga addaan iti kasta a bileg ken kinalawag. Dagiti propetana, kas pinaregta ti Apo, nakitada ti aldawtayo ken pinilida ti doktrina ken kinapudno a mangtulong kadatayo a kasayaatan. Ti Libro ni Mormon iti pangiwanwantayo iti panagbiag iti ud-udina nga aldaw.
Siempre, dumteng ti kangrunaan a talgedtayo no isangoltayo ti bagitayo iti Nailangitan nga Ama ken ni Jesucristo. Ti biag nga awan Dios ket biag a napnuan iti buteng. Ti biag nga adda Dios ket biag a napnuan iti kappia. Gapu ta umay dagiti naespirituan a bendision kadagiti napudno. Ti panangawat iti bukod a paltiing ti maysa kadagiti kaindaklan kadagita a bendision.
Inkari ti Apo a no agdawattayo, makaawattayo iti “paltiing iti kada paltiing.” 20 Ikarik a no padakkelenyo ti kabaelanyo nga umawat iti paltiing, bendisionannakayo ti Apo iti nayon a direksion iti biagyo ken nawadwad a sagut ti Espiritu.
Maikatlo a Prinsipio: Dikayo Agsardeng iti Panagsagana
Nupay simmayaaten dagiti banag, intuloy ni Kapitan Moroni nga insagana dagiti taona. Di pulos nagsardeng. Di pulos nagbalin a kampante.
Di pulos nagsadeng a dimmarup ti kabusor. Ngarud, ditayo pulos makapagsardeng iti panagsagana! No ad-adda a self-reliant-tayo—iti temporal, emosional, ken espiritual—ad-adda a nakasaganatayo a masaluadan maibusor awan sarday nga idadaup ni Satanas.
Kakabsat, nalaingkayo nga agparnuay iti lugar a pagtalgedan ti bagbagiyo ken dagiti ay-ayatenyo. Kasta met nga addaankayo iti nadiosan nga endowment a mangpabael kadakayo a mangbangon iti pammati iti dadduma. Ket dikayo pulos nagsardeng. Impakitayo manen dayta iti daytoy a tawen.
Pangngaasiyo, agtultuloykayo! Ti panagannadyo iti panangbantay kadagiti pagtaenganyo ken panangitukityo iti pammati iti puspuso dagiti patpatgenyo ket agapitto kadagiti gunggona para kadagiti henerasion nga umay.
Kakabsatko a babbai, nakaad-adu dagiti padpadaanantayo! Inkabilnakayo ti Apo ditoy ita gapu ta ammona a kabaelanyo ti mangparmek kadagiti narikut a problema ti maudi a paset dagitoy ud-udina nga aldaw. Ammona a maawatanyo ti kinangayed ti aramidna ken aggagarkayo a tumulong a mapasamak daytoy.
Diak ibagbaga a nalakanto dagiti aldaw nga umun-una, ngem ikarik kadakayo nga agbalinto a nadayag ti masakbayan kadagiti nakasagana ken agtultuloy nga agsagana nga agbalin a ramit kadagiti ima ti Apo.
Patpatgek a kakabsatko a babbai, ditayo koma ibturan laeng daytoy agdama a panawen. Awatentayo koma ti masakbayan nga addaan iti pammati! Dagti narigat a panawen ti gundaway a panagtalinaedtayo a naespirituan. Dagitoy ti panawen a mabalin a nasamsamay ti impluensiatayo ngem iti nataltalna a panawen.
Ikarik a no parnuayentayo dagiti natalged a lugar, isaganatayo dagiti panunottayo nga agbalin a napudno iti Dios, ken ditayo pulos agsardeng, bendisionnannatayonto ti Dios. Isunto ket “isalakannatayo; agingga nga ibaga[nanto] ti kappia iti kararuami, ket intedna kadakami ti nabileg a pammati, ket imbilinna kadakami a nasken a namnamaenmi nga ilisinakami.” 22
No isaganayo nga awaten ti masakbayan nga addaan pammati, dagitoy a kari ket kukuayonto! Paneknekak daytoy a sipepeksa ti ayatko para kadakayo ken ti panagtalekko kadakayo iti sagrado a nagan ni Jesucristo, amen.