Aramidento ti Dios ti Maysa a Banag a Di Maarapaap
Insagana ti Dios dagiti annakna ken ti Simbaanna para iti daytoy a panawen.
Nabiit kalpasan ti isasangpet iti Salt Lake Valley, nangbangon iti nasantuan a templo dagiti Santo iti Ud-udina nga Aldaw. Nariknada a nakasarakdan iti lugar a mabalin a pagrukbabanda iti Dios a natalna ken nawaya iti pannakaidadanes.
Nupay kasta, idi asidegen a malpas ti pundasion ti templo, simmangpet ti buyot ti Estados Unidos a nangpilit a mangipuesto iti maysa a baro a gobernador.
Gapu ta saan nga ammo dagiti lider ti Simbaan no kasano ti kinadangkes ti buyot, imbilin ni Brigham Young kadagiti Santo a panawan ken gaburanda ti pundasion ti templo.
Siguradok a nasdaaw ti sumagmamano a miembro ti Simbaan no apay a kanayon a mapaay dagiti aramidda a mangbangon iti pagarian ti Dios.
Idi agangay, naglabas ti peggad, ket nakali ken naamiris dagiti pundasion ti templo. Ditoy a natakuatan dagiti pioneer builder nga adu dagiti immuna a bato ti nagbirri, a namangbalin a saanen a maibagay dagitoy kas pundasion.
Gapu itoy, pinatarimaan ni Brigham ti pundasion tapno umdas ti katibkerna a mangsuporta kadagiti granito1 a diding ti nangayed a Salt Lake Temple.2 Kamaudiananna, nakapagkanta dagiti Santo iti “How Firm a Foundation”3 ken ammoda a nabangon ti nasantuan a temploda iti natibker a pundasion nga agpautto iti adu a henerasion.
Masuruannatayo daytoy nga estoria no kasano nga usaren ti Dios ti rigat a mangipatungpal kadagiti panggepna.
Sangalubongan a Pandemia
No kasla pamiliar kadagiti pasamak a pakaipasanguantayo ita, ket gapu iti daytoy.
Agduaduaak nga adda maysa a tao a dumngeg iti timekko wenno mangbasa kadagiti balikasko a saan a naapektuan iti sangalubongan a pandemia.
Kadagiti agladingit iti pannakapukaw iti pamilia ken gagayyem, makipagladingitkami kadakayo. Idawatmi iti Ama iti Langit a mangliwliwa ken manglinglingay kadakayo.
Nalablabes pay ngem iti salun-at ti bagi dagiti napaut a bunga daytoy a virus. Adu a pamilia ti naawanan iti trabaho ken nagpeggad iti bisin, panagduadua, ken panagbuteng. Dayawenmi dagiti nabuslon nga aramid ti adu tapno lapdan ti panagwaras daytoy a sakit. Napakumbabakami ti naulimek a sakripisio ken natakneng nga aramid dagiti nangpapeggad iti bukodda a pagtalgedan tapno tumulong, mangagas, ken sumuporta kadagiti tao nga agkasapulan. Agyamankami unay gapu iti kinaimbag ken kinaasiyo.
Ikararagmi a sibibileg a luktan koma ti Dios dagiti tawa ti langit ken mapunno ti biagyo kadagiti agnanayon a parabur ti Dios.
Datayo dagiti Bukel
Adu pay laeng ti saan nga ammo maipapan daytoy a virus. Ngem no adda maysa nga ammok, saan a nangpasiddaaw daytoy a virus iti Ama iti Langit. Dina inummong dagiti nayon a buyotna nga anghel, agpamiting a di ninamnama, wenno mangdutok a mangparsua iti lubong tapno maasikaso iti pettat a panagkasapulan.
Ti mensahek ita a nupay ditayo ninamnama daytoy a pandemia, insagana ti Dios dagiti annakna ken ti simbaanna para itoy a panawen.
Maibturantayonto daytoy, wen. Ngem ad-adunto pay ti maaramidtayo saan laeng a ti panagngariettayo, agibtur, ken aguraytayo kadagiti banag a maisubli iti old normal. Agtultuloytayo, ken agbalintayo a nasayaat gapu iti daytoy.
Iti sabali a wagas, datayo dagiti bukel. Ken tapno dumakkel dagiti bukel, nasken a maitukitda sakbay a makapagtuboda. Paneknekak a nupay mariknatayo a napnuantayo iti pannubok ti biag wenno panagrigat ti rikna, ti ayat ti Dios ken dagiti parabur ti naisubli nga ebanghelio ni Jesucristo ti mangisangbayto iti maysa a banag a di maarapaap a mapasamak.
Aggapu dagiti Parabur iti Rigat
Naipasango ti tunggal dispensasion iti panawenna iti pannubok ken rigat.
Nagbiag ni Enoc ken dagiti taona iti panawen ti kinadangkes, gubgubat, ken panagsayasay iti dara. “Ngem immay ti Apo ket nakipagnaed kadagiti taona.” Napanunotna ti maysa a banag a di maarapaap para kadakuada. Tinulonganna ida a mangipasdek iti Zion—maysa a tattao a “sangsangkamaysa ti puso ken panunotda” a “nagtaengda iti kinalinteg.”4
Ni ubing a Jose, ti anak ni Jacob, naipan iti abut, nailako iti pannakaadipen, ken nabaybay-an.5 Nalabit a napanunot ni Jose a nalipatanen isuna ti Dios. Napanunot ti Dios ti maysa a banag a di maarapaap para ken Jose. Inusarna daytoy a panawen ti pannubok a mangpapigsa iti kinatao ni Jose ken nangipatugaw kenkuana iti maysa a saad tapno maisalakan ti pamiliana.6
Panunotenyo ni Joseph Smith a Propeta idi naibalud iti Liberty Jail, no kasano a dimmawat iti tulong para kadagiti agsagsagaba a Santo. Nalabit a nasdaaw daytoyno kasano a maipasdek ti Zion kadagita a kasasaad. Ngem insao ti Apo ti kapia kenkuana, ken ti simmaruno a nadayag a paltiing a nangyeg iti kapia kadagiti Santo—ket nagtultuloy daytoy a nangyeg iti kapia kadatayo.7
Namin-anon kadagiti immun-una a tawen ti Ti Simbaan ni Jesucristo dagiti Santo iti Ud-udina nga Aldaw a naupay ken nasdaaw no nalipatan idan ti Dios? Ngem babaen kadagiti pannakaidadanes, peggad, pammutbuteng iti pannakapapatay, adda maysa a banag a napanunot ti Apo a Dios para iti bassit nga arbanna. Maysa a banag a di maarapaap.
Ania ti masursurotayo manipud kadagitoy a pagarigan—ken kadagiti ginasgasut a dadduma pay iti nasantuan a kasuratan?
Umuna, saan a mailaksid dagiti nalinteg a makapadas kadagiti pannubok wenno rigat. Nasken a mapadasantayo amin dagiti narigat a panawen, gapu ta dagitoy a panawen ti pakasursuruantayo kadagiti prinsipio a mangpatibker kadagiti ugalitayo ken mangigapu iti yaasidegtayo iti Dios.
Maikadua, ammo ti Amatayo iti Langit nga agsagabatayo, ken gapu ta annaknatayo, dinatayonto baybay-an.8
Panunotenyo ti maysa a manangnggasi, ti Mangisalakan, a nagbubos iti kaaduan a panawen iti biagna a nagserbi iti masakit, iti malidlidayan, iti managduadua, ken iti maup-upay.9 Panagkunayo kadi a saan a maseknan kadakayo ita?
Patpatgek a gagayyemko, ay-ayatek a kakabsatko, bantayannakayto ti Dios ken aywanannakayto bayat dagitoy a panawen ti panagduadua ken panagbuteng. Am-ammonakayo. Denggenna dagiti ararawyo. Napudno ken mapagtalkan. Tungpalennanto dagiti karina.
Adda maysa a banag a di maarapaap a napanunot ti Dios para kadakayo ken ti Simbaan a sangkamaysa—nakaskasdaaw nga aramid ken pagsidsiddaawan.
Agyamankami Kenka, O Dios, iti maysa a Propeta
Masakbayan dagiti kasayaatan nga aldawtayo, saan a napalabas. Daytoy ti gapu nga ikkannatayo ti Dios iti agdama a paltiing! No awan daytoy, nalabit a ti biag kasla agtaytayab iti maniobra, nga agur-uray iti panagawan ti linnaaw tapno makapagdissotayo a sitatalged. Nangatngato nga amang dagiti panggep ti Apo para kadatayo. Gapu ta daytoy ti Simbaan ti sibibiag a Cristo, ken gapu ta iturongna dagiti propetana, agtultuloytayo nga agpasango ken agpangato, kadagiti lugar a ditayo pay napanan, iti kangato a narigattayo a maarapaap!
Ita, di kayat a sawen a ditayto mapadasan ti turbulensia iti panagtayabtayo iti daytoy a biag. Di kayat a sawen nga awan dagiti di namnamaen a pannakapaay iti padas, ken di agandar a makina, ken dagiti parikut ti dakes a tiempo. Kinapudnona, mabalin a dumakes dagiti banag sakbay a sumayaatda.
Kas fighter pilot ken airline captain, naadalko nga idinto a diak mapili ti rigat a maipasango kaniak bayat ti panagpatayab, mapilik no kasano a nagsaganaak ken ti aramidek. Ti kasapulan iti panawen ti krisis ket agbalin a kalmado ken alisto.
Kasano nga aramidentayo daytoy?
Sanguentayo ti kinapudno ken agsubli kadagiti napateg a banag, iti kangrunaan a prinsipio ti ebanghelio, iti kaskenan a banag. Papigsaenyo ti ugaliyo iti relihion—kas iti panagkararag ken panagadal iti nasantuan a kasuratan ken panagtungpal iti bilin ti Dios. Mangikeddengkayo a maibatay kadagiti kasayaatan a nasuboken a kannawidan.
Agpokuskayo iti bambanag a maaramidyo, saan a dagiti bambanag a diyo maaramid.
Ummongenyo ti Pammatiyo Denggenyo ti pangtarabay a balikas ti Apo ken ti propetana a mangiturong kadakayo iti talged.
Laglagipenyo, daytoy ti Simbaan ni Jesucristo—Isu ti mangkontrol.
Panunotenyo ti adu a naparegta a pannakaipatal-o a napasamak iti napalabas a dekada laeng. Sumagmamano laeng ti dakamatek:
-
Naulit a nayunay-unay ti sakramento kas sentro ti panagdaydayawtayo iti Sabbath.
-
Naited tiUmaykayo, Sumurot Kaniak kas maysa a ramit iti naisentro iti pagtaengan ken suportado ti Simbaan a mangpapigsa kadagiti indibidual ken pamilia.
-
Rugiantayo ti nangatngato ken nasansantuan a wagas ti ministering iti amin.
-
Ti panangusar iti teknolohia a mangibinglay iti ebanghelio ken mangaramid iti trabaho ti Apo ket agsaknapen iti intero a Simbaan.
Uray dagitoy sesion ti sapasap a komperesia ket saan koma a posible no awan dagiti napintas a ramit ti teknolohia.
Kakabsat, iti panangkontrol ni Cristo, di laeng agsayaatto dagiti banag; ngem didanto maarapaap.
Agtultuloy ti Aramid iti Panangummong iti Israel
Idi damo, nalabit a kasla tubeng iti aramid ti Apo ti sangalubongan a pandemia. Kas pagarigan, saan a posible dagiti gagangay a wagas ti panangibinglay iti ebanghelio. Numan pay kasta, mangmangted ti pandemia iti baro ken naparpartuat a wagas a makatulong kadagiti napudno. Dumurdur-asen iti bileg ken pasnek ti aramid a panangummong iti Israel. Ipaneknek ti ginasgasut ken rinibribu nga estoria daytoy.
Maysa a gayyem nga agnanaed iti napintas a Norway ti nagsurat kadakami maipapan iti kallabes a ngimmatuan kadagiti panagbuniag. “Kadagiti disso a bassit ti Simbaan,” insuratna, “agbalin a sanga dagiti puted, ken agbalin dagiti sanga iti ward!”
Idiay Latvia, naammuan ti maysa a babai maipapan ti Simbaan babaen iti panangiklikna iti internet ad ken naggagar unay a mangadal iti ebanghelio ni Jesucristo ta simmangpet pay a nasapsapa iti maysa nga oras iti appointmentna, ken sakbay a ginibusan dagiti missionary ti umuna a lesson, dinamagna ti petsa ti panagbuniagna.
Idiay Eastern Europe, kinuna ti maysa a babai nga immawat iti awag kadagiti missionary, “Sisters, apay a naladawkayo a timmawag? Nagur-urayak! “
Ad-adda a nakumikom ti adu kadagiti misionariotayo. Adu ti mangisursuro iti ad-adu pay a tao ngem iti sigud. Adda dimmakkel a koneksion iti nagbaetan dagiti miembro ken missionary.
Iti napalabas, mabalin a naibegkestayon kadagiti wagas ti tradision a nangpalukat iti pandemia iti matatayo. Nalabit a nagus-usartayo pay laeng ti darat iti panagipatakdertayo idinto nga addan a mausar ti granito. Gapu iti kasapulan, masursurotayo itan nga usaren dagiti agduduma a wagas, agramam ti teknolohia, a pangawis iti tao—iti gagangay ken natural a wagas—nga umay ken mangkita, umay ken tumulong, ken umay ken agkameng.
Ti Aramidna, ti Wagasna
Daytoy ti aramid ti Apo. Awisennatayo a mangsapul iti wagasna a panangaramid iti daytoy, ken mabalin a maidumada kadagiti napalabas a padastayo.
Napasamak daytoy ken ni Simon Pedro ken dadduma pay a disipulo a napan nagkalap iti Baybay ti Tiberias.
“Awan nakalapda iti dayta a sardam.
“Ngem idi bumigaten , ni Jesus nagtakder iti igid. …
“Ni Jesus kinunana kadakuada, Iwayatyo ti iket iti [sabali] a bakrang ti barangay, ket makaalakayto.”
Inwayatda ngarud, ket saanda a mabalinen idi a guyoden a maipuon iti kaadu ti ikan.”10
Impalgak ti Dios ken ituloynanto nga ipalgak ti mannakabalin nga imana. Dumtengto ti aldaw a lagipentayo ken maammuan nga iti daytoy a panawen ti rigat, tultulongannatayo ti Dios a mangsarak iti nasaysayaat a wagas—ti wagasna—a mangbangon iti pagarianna iti natibker a pundasion.
Paneknekak a daytoy ti aramid ti Dios ket ituloynanto nga aramiden ti adu a di maarapaap a banag kadagiti annakna, dagiti attaona. Tenglennatayo iti dakulap dagiti manangipateg ken manangngaasi nga imana.
Paneknekak a ni Presidente Russell M. Nelson ti propeta ti Dios iti panawentayo.
Kas maysa nga Apostol ti Apo, awisen ken bendisionankayo nga “agragsakkayo koma nga aramiden amin dagiti naipakumit iti bileg[yo]; kalpasanna agtakder[kayo], a sililinteg, a sinanama, a makaimatang iti panangisalakan ti Dios, nga ipalgak ti takiagna.”11 Ken ikarik nga aramidento ti Apo dagiti di maarapaap a banag a sumangbay gapu kadagiti nalinteg nga aramidyo. Iti nagan ni Jesucristo, amen.