Babaen ti Panagkaykaysa ti Rikna Magun-odtayo ti Bileg ti Dios
No kalikagumantayo ti panagkaykaysa ti rikna, umayto ti bileg ti Dios a mangpapigsa kadagiti aramidtayo.
Imbaga ti ina ni Gordon kenkuana a no malpasna dagiti trabahona, ilutuanna iti pie. Ti paboritona a makan. Para laeng kenkuana. Lineppas ni Gordon dagiti trabahona, ket nagmasa ni nanangna iti pie. Simmangpet ni manangna a Kathy a kaduana ti gayyemna. Nakitana ti pie ket dinamagna no mabalinda iti gayyemna ti mangan iti pie.
“Saan,” kinuna ni Gordon, “kukuak dayta. Inaramid ni Nanang dayta para kaniak, ket tangdanko dayta.”
Nakapungtot ni Kathy iti adingna a lalaki. Managimbubukod ken naimot. Kasano a bukbukodanna lattan daytoy?
Kalpasan ti sumagmamano nga oras, idi luktan ni Kathy ti kotse tapno itulnogna ti gayyemna, adda iti pagtugawan ti dua a napkin, tinidor a nakaparabaw, ken dua a dadakkel a pie iti plato. Inestoria ni Kathy daytoy iti pamumpon ni Gordon tapno mangipakita a kayatna ti agbalbaliw ken agbalin a nasayaat uray kadagiti saan a maikari a kanayon iti daytoy.
Idi 1842, nagaed dagiti Santo a nangbangon iti Templo ti Nauvoo. Kalpasan ti pannakabuangay ti Relief Society iti Marso, masansan a makitartaripnong ni Propeta Joseph tapno isaganana ida para iti sagrado, mamagkaykaysa a katulagan iti templo.
Idi Hunio 9, “imbaga ti Propeta a mangisuronto maipanggep iti asi[.] No kas pagarigan supringennatayo ni Jesucristo ken [dagiti] anghel iti awan kaes-eskanna a bambanag, ania ti mapasamak kadatayo? Nasken nga agbalintayo a manangngaasi ken saantayo a lisian dagiti babassit a bambanag.” Intuloy ni Presidente Smith, “Malidayannak ta awan ti naana-anay sinninged—no maysa a miembro ti agsagaba marikna ti amin daytoy—babaen ti panagkaykaysa ti rikna magun-odtayo iti bileg ti Dios.” 1
Kaslaak la nakimat iti dayta ababa a binatog. Babaen ti panagkaykaysa a rikna magun-odtayo ti bileg ti Dios. Saan a daytoy a lubong ti kayatko a pagbalinanna. Adu dagiti banag a kayatko a gubuayen ken pasayaaten. Ket agpayso, adu dagiti kasupadi ti no ania ti namnamaek, ken no dadduma mariknak nga awan ti maaramidak. Itay kallabes, damdamagek iti bagik dagiti agsuksukisok a saludsod: Kasano a maawatak a nasaysayaat dagiti tao iti aglawlawko? Kasano nga aramidekto ti “panagkaykaysa ti rikna” no agduduma unay ti amin? Ania a bileg ti magun-odko iti Dios tapno ad-adda a makipagkaykaysaak bassit iti dadduma? Manipud ti panagsukisokko, adda tallo a singasingko. Mabalin a makatulong pay dagitoy kadakayo.
Maaddaan iti Asi
ItiJacob 2:17 mabasatayo, “Panunotenyo dagiti [kabsatyo a lallaki ken babbai] a kas iti bagbagiyo, ken amin ken diyo ipaidam ti adda kadakayo, tapno bumaknangda met a kas kadakayo.” Sukatantayo ti balikas nga . adda kadakayo iti kaasi—diyo ipaidam ti kaasi tapno bumaknangda met a kas kadakayo.
Masansan a panunotentayo ti adda kadatayo a maiturong iti taraon wenno kuarta, ngem nalabit a ti ad-adda a kasapulantayo amin iti panagministertayo ket asi [mercy].
Kinuna ti Relief Society presidentko itay nabiit: “Ti banag nga innak … ikari … kenka isu ti panangsaluadkonto iti naganmo. … Ibilangkanto no asinoka a kasingpetan a tao. … Diakto pulos agsao iti ania man a banag a saan a nasayaat maipapan kenka, a saanto a mangitag-ay kenka. Dawatek nga aramidem met kaniak dayta gapu ta maamakak, a mangpaay kenka.”
Imbaga ni Joseph Smith kadagiti babbai iti dayta nga aldaw ti Hunio idi 1842:
“No ipakita dagiti tao kaniak ti uray la bassit nga asi ken ayat, O ania ketdin ti bilegna dayta iti panunotko. …
“… No umas-asidegtayo iti Nailangitan nga Amatayo, ad-adda ti pannakipagrikna iti panangkitatayo kadagiti mapukpukawen a kararua—[mariknatayo a kayattayo] nga ibaklay ida kadagiti abagatayo ken iwaksitayo dagiti basolda iti likudantayo. [Nairanta daytoy a saritak para iti] amin daytoy a Gimong—no kayatyo a kaasiannakayo ti Dios, kaasianyo ti tunggal maysa.” 2
Nangnangruna a para iti Relief Society daytoy a balakad. Ditayo koma husgaan ti tunggal maysa wenno agsao iti makapasakit. Saluadantayo koma ti nagan ti tunggal maysa ken itedtayo ti sagut ti asi. 3
Igaudyo ti Bilogyo
Idi 1936, adda saan a nalatak a grupo dagiti aggagaud iti Unibersidad ti Washington a nagbiahe iti Germany tapno makiraman iti Olympic Games. Daytoy ti kapalalo idi ti Nakaro a Panagrigat. Nangidonar dagiti ili a pagminasan ken pagtrosoan a pagobraan dagitoy nga agtutubo iti kuarta tapno makapagbiaheda a mapan iti Berlin. Iti tunggal aspeto ti kumpetision kasla awan namnamada, ngem adda maysa a banag a napasamak iti lumba. Iti panaggaud, awaganda daytoy iti “aggigiddan a panaggaud.” Denggen ti pannakailadawan a naibatay iti libro Dagiti Agtutubo a Lallaki iti Bilog:
Adda mapasamak a maysa a banag a no dadduma narigat a gun-oden ken narigat nga iladawan. Awagan daytoy iti “aggigiddan a panaggaud.” Mapasamak laeng daytoy no aggigiddan amin iti panaggaud iti kasta a kaperpekto a kaykaysa nga awan uray maysa a tignay a di maigiddan.
Masapul a kontrolen dagiti aggaud ti naiget a wayawayada ket agtalekda iti bukodda a kabaelan. Saan a mangatiw iti lumba dagiti agpapada. Agtunos dagit nasayaat a grupo—adda maysa a mangidaulo, maysa nga agiggem, maysa a lumaban iti laban, maysa a mangpatalna. Awan ti napatpateg nga aggaud ngem iti sabali, napateg amin iti bilog, ngem no aggigiddanda nga aggaud a nasayaat, masapul nga ibagayda iti kasapulan ken kabaelan ti dadduma—ti bassit ti takiagna ikadakkelna ti panaggaudna, ken ti at-atiddog a takiag, gumaud la basbassit.
Agbalin dagiti pagsusupadian a pagsayaatan imbes a pagdaksan. Iti daytoy a wagas a marikna no ti bilog umak-akar a bukodna. Iti daytoy a wagas a ti sakit makaipaay ti panangabak Kasla daniw ti nasayaat a “panaggaud.” 4
Maisuppiat iti dadakkel a lapped, nakasarak daytoy a grupo iti perpekto a panaggaud ken nangabakda. Nangyeg iti ragsak ti Olympic gold, ngem ti kaykaysa a napadasan ti tunggal aggaud iti dayta nga aldaw ket nasantuan a kanito iti unos ti biagda.
Ikkaten ti Dakes kas Kapardas ti Pannakapadur-as ti Nasayaat
Iti pangngarig iti Jacob 5, nagmula iti kayo ti Apo ti bangkag iti nasayaat a kayo iti nasayaat a daga, ngem nadadael iti panaglabas ti panawen ket nagbunga iti balang a bunga. Naminwalo nga imbaga ti Apo ti bangkag a: “Maldaangannak [iti] pannakapukawko itoy a kayo.”
Imbaga ti katulongan ti Apo ti bangkag: “Aguraytayo pay bassit [iti kayo]. Ket kinuna ti Apo: Wen, agurayak pay bassit.” 5
Ket sumangbay ti bilin a mabalin a mayaplikar kadatayo a mangpadas a mangsapul ti nasayaat a bunga iti bukodtayo a bangkag: “Gapuna salingsinganyo ngarud dagiti dakes tapno rumangpaya dagiti nasayaat.” 6
Saan a mapasamak a kasla madyik ti panagkaykaysa; itrabaho daytoy. Narigat daytoy, no dadduma saan a nanam-ay, ken mapasamak nga in-inut no ikkatentayo ti dakes a kas kapardas ti panagdakkel ti nasayaat.
Ditayo kaano man nga agmaymaysa iti panagkagumaantayo nga agkaykaysa. TiJacob 5 ituloyna, “Ket napan dagiti katulongan ket nagtrabahoda iti amin a kabaelanda; ket nakipagtrabaho met kadakuada ti Apo.” 7
Tunggal maysa kadatayo ket maaddaan kadagiti nasakit unay a padas, banag a di nasken a saan a mapasamak. Tunggal maysa kadatayo, iti agduduma a panawen, bay-antayo pay a ti kinatangig ken kinapalangguad ti mangdadael iti bungatayo. Ngem ni Jesucrsito ti Mangisalakantayo iti amin. Dumanon ti bilegna iti mismo a kaunggan ken mapagtalkan no umawagtayo Kenkuana. Agdawatttayo amin para iti asi iti basbasoltayo ken pannakapaaytayo. Siwawaya nga itedna. Ket idawatna dadatayo no maitedtayotayo ti isu met la nga asi ken pannakaawat iti tunggal maysa.
Imbaga ni Jesus: “Agkaykaysakayo; ket no saankayo nga agkaykaysa saankayo a kukua.” 8 No agkaykaysatayo—no makaitedtayo ti maysa a pie wenno maitunos ti bukodtayo a talento tapno magaudan ti bilog nga aggigiddan—ngarud kukuanatayo. Ket tulongannatayo a mangikkat ti dakes kas ti kapardas ti panagdur-as iti kinasayaat.
Dagiti Kari ti Propeta
Mabalin nga awantayo pay iti kayattayo a papanan, ken awantayo pay iti papanantayo. Mamatiak a ti panagbalbaliw para iti bagbagitayo ken iti ragup a pagkamengantayo sumangbayto a basbassit babaen ti naregta a panangikarigatan iti inaldaw nga agkikinnawatan. Apay? Gapu ta bangbangonentayo ti Zion— tattao a “sangsangkamaysa iti puso ken panunot.” 9
Kas babbai iti katulagan, adu ti maimpluensiaantayo. Mayaplikar dayta nga impluensia iti inaldaw no agadaltayo a kadua ti maysa a gayyem, agpaturog ti annak, makisarta iti katugaw iti bus, isagana ti presentasion a kadua ti katrabaho. Adda bilegtayo a mangikkat ti preuhisio ken mangbangon iti panagkaykaysa.
Saan a basta klase ti Relief Society ken Young Women. Agbalinda pay a di malipatan a padas a papanan dagiti agduduma a babbai iti maymaysa a bilog ket aggaud agingga a makitatayo ti aggigiddan a panaggaudtayo. Idiayak daytoy nga awis: makipasetkayo iti nagmaymaysa a puersa a mangbalbaliw para iti pagsayaatan ti lubong. Ti naitulag a pagrebbengantayo ket agminister, mangitag-ay ti ima dagiti nalupoy, panangibaklaytayo kadagiti tao a marigrigatan wenno panagkibin kadakuada. Saan a narigat ti mangammo no ania ti aramiden, ngem masansan a supiatentayo ti managimbubukod a pagimbagantayo, ken nasken nga ikarigatantayo. Addaan dagiti babbai iti daytoy a Simbaan iti awan patinggana a potensial a mangbalbaliw ti kagimongan. Addaanak iti naan-anay a naespirituan a panagtalek a, no kalikagumantayo ti panagkaykaysa ti rikna, umayto ti bileg ti Dios a mangan-anay kadagiti panagkagumaantayo.
Idi linagip ti Simbaan ti paltiing maipapan iti riesthood idi 1978, nangted ni Presidente Russell M. Nelson iti nabileg a naimpadtuan a bendision: “Daytoy ti kararag ken pammendisionko nga ibatik iti amin a dumdumngeg a maparmektayo koma ti ania man a dagensen ti prehuisio ken magnatayo a sililinteg iti Dios—ken iti tunggal maysa—iti naan-anay a kappia ken panagtutunos.” 10
Ditayo koma lipaten daytoy napadtuan a bendision ket usarentayo ti bukod ken agkaykaysa nga aramidtayo a mangpatibker iti panagkaykaysa iti lubong. Ibatik ti pammaneknekko iti balikas ni Apo Jesucristo, ti napakumbaba ken awan patinggana a kararagna: “Tapno agmaymaysada koma amin; Ama, a kas iti kaaddam kaniak ken iti kaaddak kenka, ta agmaymaysada a kas iti panagmaymaysata.” 11 Iti nagan ni Jesucristo, amen.